މޮރޮކޯގެ ސުހައިލާ އައްޠާހިރީއާ ކައިވެނިކުރުމާ ގުޅިގެން އިސްލާމްދީން ޤަބޫލުކުރި ކަމަށް ބުނެ ފެތުރުނު ޚަބަރުތައް ބްރެޒިލްގެ ފުޓްބޯޅަ ލީޑަަރު ރޮބާޓޯ ކާލޯސް ދޮގުކޮށްފިއެވެ.
"ޔާއްލާ ކޫރާ" ވެބްސައިޓަށް ދިން އިންޓަވިއުއެއްގައި ކާލޯސް ބުނީ، އޭނާގެ ކައިވެނީގެ ޙަފްލާގައި ޢަރަބި އިސްލާމީ ސަޤާފީ ރަސްމިއްޔާތުތަކާއި އީސާއީ ދީނުގެ އިންޖީލީ ރަސްމިއްޔާތުތައް ވެސް ކުރިއަށް ދިޔަ ކަމަށެވެ. އަދި އިސްލާމީ ކައިވެންޏެއް ކުރުމަކީ އޭނާ ދީން ބަދަލުކުރި ކަމުގެ ހެކިތަކެއް ނޫން ކަމަށެވެ.
ބްރެޒިލްގެ ކުރީގެ ވާތް ފަރާތު ބެކަށް ކުޅުނު ކުޅުންތެރިޔާ ހާމަކުރި ގޮތުގައި އޭނާގެ އަންހެނުން ސުހައިލާއަކީ މުސްލިމެކެވެ. އަދި އޭނާއަކީ ނަސްރާނީ ދީނުގެ މީހެކެވެ. ކައިވެނީގެ ޙަފްލާގެ ތެރޭގައި އިސްލާމީ ރަސްމިއްޔާތުތައް ހިމެނީ ދެފަރާތުގެ އާދަކާދައަށް އިޙްތިރާމްކުރުމުގެ ގޮތުން ކަމަށް އޭނާ ފާހަގަކުރިއެވެ.
ކާލޯސް ވަނީ އޭނާ ދީން ބަދަލުކުރި ކަމަށް ބުނެ ފާއިތުވި ދުވަސްތަކުގައި ސޯޝަލް މީޑިއާގައި ދެކެވުނު ވާހަކަތަކުގެ ޙަޤީޤަތް ސާފުކޮށްދީފައެވެ.
