2022 ވަނަ އަހަރުގެ ޖޫން މަހުން ފެށިގެން ޕާކިސްތާނުގެ ދައުލަތުގެ ޖުމްލަ ދަރަނި 76 އިންސައްތައަށް އިތުރުވެ، ހިނގަމުންދާ މާލީ އަހަރުގެ ގްރޮސް ފައިނޭންސިންގ ބޭނުންތައް (ޖީއެފްއެން) 28.65 ޓްރިލިއަން ރުޕީސްއަށް އަރާފައިވަނިކޮށް، ބަޖެޓު ޑެފިސިޓް ހަމަޖެއްސުމަށްޓަކައި އިތުރު 6.86 ޓްރިލިއަން ރުޕީސް ދަރަންޔަށް ނެގުމަށް އިސްލާމްއާބާދުން ނިންމައިފިއެވެ.
ޕާކިސްތާނުގެ ފިނޭންސް މިނިސްޓްރީން ނެރުނު "އެނުއަލް ބޮރޮވިންގ ޕްލޭން 2027″ ގައި ބުނެފައިވާ ގޮތުގައި، 2022 ޖޫންގެ ނިޔަލަށް 49.3 ޓްރިލިއަން ރުޕީސްގައި ހުރި ދައުލަތުގެ ދަރަނި، 2026 ޖޫންގެ ނިޔަލަށް ވަނީ 86.7 ޓްރިލިއަން ރުޕީސްއަށް އިތުރުވެފައެވެ.
މިއީ ފާއިތުވި ހަތަރު އަހަރުގެ ތެރޭގައި 76 އިންސައްތައިގެ ބޮޑު އިތުރުވުމެކެވެ. މީގެ ތެރޭގައި އެތެރޭގެ ދަރނީގެ ގޮތުގައި 59.4 ޓްރިލިއަން ރުޕީސް އަދި ބޭރުގެ ދަރނީގެ ގޮތުގައި 27.3 ޓްރިލިއަން ރުޕީސް ހިމެނެއެވެ.
މި އަހަރު އަލަށް ނަގާ ސާފު ދަރނީގެ ތެރެއިން 6.046 ޓްރިލިއަން ރުޕީސް އެތެރޭގެ މާކެޓުން ނަގާއިރު، 813 ބިލިއަން ރުޕީސް ނެގުމަށް ހަމަޖެހިފައިވަނީ ބޭރުގެ ވަސީލަތްތަކުންނެވެ.
ސަރުކާރުގެ ބަޖެޓުގެ ޖުމްލަ ޑެފިސިޓް 7.020 ޓްރިލިއަން ރުޕީސްގައި ހުންނާނެ ކަމަށް ލަފާކުރެވޭއިރު، ދަރަނި ދެއްކުމަށް ބޭނުންވާ ފައިސާއާއެކު ޖީއެފްއެން 28.647 ޓްރިލިއަން ރުޕީސްއަށް އަރާނެއެވެ. މިއީ 2027 ވަނަ މާލީ އަހަރުގެ ގައުމީ އުފެއްދުންތެރިކަމުގެ ގާތްގަނޑަކަށް 20 އިންސައްތައެވެ.
ޕާކިސްތާން ފިނޭންސް މިނިސްޓްރީން ބުނީ ކުރު މުއްދަތުގެ ޓްރެޜަރީ ބިލްތަކަށް ބަރޯސާވާ މިންވަރު ކުޑަކޮށް، މެދު މުއްދަތާއި ދިގު މުއްދަތުގެ "ޕާކިސްތާން އިންވެސްޓްމަންޓް ބޮންޑް" (ޕީއައިބީ) އަށް މިފަހަރު އިސްކަންދޭނެ ކަމަށެވެ. އަދި އިސްލާމީ މާލީ ވަސީލަތެއް ކަމަށްވާ "އިޖާރާ ސުކޫކް" މެދުވެރިކޮށް 3.785 ޓްރިލިއަން ރުޕީސް ހޯދުމަށްވެސް ވަނީ ރޭވިފައެވެ.
މީގެއިތުރުން، ބޭރުގެ މާލީ އިދާރާތަކުންނާއި ބައިނަލްއަޤްވާމީ މާކެޓްތަކުން ފައިސާ ހޯދުމަށްޓަކައި ޔޫރޯބޮންޑާއި ސުކޫކް ވިއްކައިގެން 2 ބިލިއަން ޑޮލަރަށްވުރެ ގިނަ ފައިސާ ހޯދުމަށް ސަރުކާރުން ދަނީ މަސައްކަތްކުރަމުންނެވެ. ވޭތުވެދިޔަ މަހުވެސް ޕާކިސްތާނުން ވަނީ ޔޫރޯބޮންޑް މެދުވެރިކޮށް 3 ބިލިއަން ޑޮލަރު ހޯދާފައެވެ.
ފިނޭންސް މިނިސްޓްރީން ފާހަގަކުރި ގޮތުގައި، ފާއިތުވި 10 މާލީ އަހަރު (2017 އިން 2026 އަށް) ބަޖެޓު ޑެފިސިޓްގެ އެވްރެޖްކޮށް 81 އިންސައްތަ ހަމަޖައްސާފައި ވަނީ އެތެރޭގެ ވަސީލަތްތަކުންނެވެ. ނަމަވެސް ނިމުނު 2026 މާލީ އަހަރު ބަޖެޓުގެ 25 އިންސައްތަ ހަމަޖައްސަންޖެހުނީ ބޭރުގެ ދަރނީގެ މައްޗަށް ބަރޯސާވެގެންނެވެ.
