ޕާކިސްތާނުގެ ޚައިބަރު ޕަޚްތޫންޚުވާ ޕްރޮވިންސްގެ ބައްނޫ ޑިސްޓްރިކްޓުން 17 މަހުގެ އަންހެން ކުއްޖެއްގެ ހަށިގަނޑުން ޕޯލިއޯ ވައިރަސް ފެނި، މިއަހަރުގެ ތެރޭގައި އެ ގައުމުން ފެނުނު ޕޯލިއޯގެ ފަސްވަނަ ކޭސް ރިޕޯޓްކޮށްފިއެވެ.
ޕާކިސްތާނުގެ ނޭޝަނަލް އެމަޖެންސީ އޮޕަރޭޝަންސް ސެންޓަރުގެ އޮފިޝަލަކާ ހަވާލާދީ މީޑިއާ ރިޕޯޓްކޮށްފައިވާ ގޮތުގައި، އެންމެ ފަހުން ބަލި ޖެހުނު ކުއްޖަކީ ބައްނޫ ޑިސްޓްރިކްޓްގެ ގަބީލާ ސަރަހައދަށް ނިސްބަތްވާ ކުއްޖެކެވެ. މިއަހަރުގެ ތެރޭގައި އެ ގައުމުން ފެނުނު ފަސް ކޭސްގެ ތެރެއިން ހަތަރު ކޭސް ފެނިފައިވަނީ ބައްނޫ ޑިވިޜަންއިން ކަމަށްވާއިރު، އޭގެ ތެރެއިން ތިން ކޭސް ފެނިފައިވަނީ ސީދާ ބައްނޫ ޑިސްޓްރިކްޓުންނެވެ.
މި ސަރަހައްދަކީ ދީނީ އުސޫލުތައް ކަމަށް ބުނެ ޕޯލިއޯ ވެކްސިން ޖެހުން ހަރާން ކަމަށް ބުނާ ބަޔަކު އުޅޭ ސަރަހައްދެކެވެ.
ޕާކސިްތާންގެ ޕޯލިއޯ ނައްތާލުމަށް މަސައްކަތްކުރާ ނޭޝަނަލް ޕްރޮގްރާމްގެ ރަސްމީ ވެބްސައިޓުގައި ވެސް ވަނީ މި ކޭސް ކަށަވަރުކޮށްދީފައެވެ. އެ ޕްރޮގްރާމުން ފާހަގަކޮށްފައިވާ ގޮތުގައި، ދެކުނު ޚައިބަރު ޕަޚްތޫންޚުވާގައި ޕޯލިއޯ ވައިރަސް ފެތުރުން ހުއްޓުވިފައި ނުވާތީ، ބަލި ދެނެގަތުމަށް ކުރާ މަސައްކަތްތަކާއި ވެކްސިން ދިނުމުގެ ހަރަކާތްތައް މެދުކެނޑުމެއް ނެތި ކުރިއަށް ގެންދަން ޖެހެއެވެ. މިއަހަރުގެ ތެރޭގައި ޕާކިސްތާނުން ފެނުނު ފަސް ކޭސްގެ ތެރެއިން ހަތަރު ކޭސް ޚައިބަރު ޕަޚްތޫންޚުވާއިން ފެނިފައިވާއިރު، އެހެން ކޭސް ފެނިފައިވަނީ ސިންދު ޕްރޮވިންސްއިންނެވެ.
ފާއިތުވި އަހަރުތަކާ އަޅާބަލާއިރު ކޭސްތަކުގެ އަދަދު މަދުވެފައިވީ ނަމަވެސް، ޕާކިސްތާނުގެ އުތުރު ހުޅަނގު ސަރަހައްދުތަކުގައި ސެކިއުރިޓީ ހާލަތު އޮތް ގޮތުން ޕޯލިއޯ ނައްތާލުމަށް ކުރާ މަސައްކަތްތަކަށް ބޮޑެތި ގޮންޖެހުންތަކެއް ދަނީ ކުރިމަތިވަމުންނެވެ. ޚާއްސަކޮށް ބައްނޫ ސަރަހައްދަކީ ޕޯލިއޯއާ ދެކޮޅަށް މަސައްކަތް ކުރާ މީހުންނަށް ނުރައްކާ ބޮޑު ސަރަހައްދެއްގެ ގޮތުގައި ފާހަގަކުރެވިފައިވާ އިރު، ސެކިއުރިޓީ ނުރައްކާތަކާ ހުރެ ވެކްސިން ދިނުމުގެ ކެމްޕޭންތައް މެދުކަނޑާލަންޖެހުމާއި ނުރައްކާތަކާ ކުރިމަތިލާންޖެހޭ ކަމުގެ ރިޕޯޓްތައް ވަނީ ލިބިފައެވެ.
ސެކިއުރިޓީ ނުރައްކާތަކުގެ ސަބަބުން ވެކްސިން ދިނުމުގެ ހަރަކާތްތަކަށް ބުރޫއަރައި، އެކި ސަރަހައްދުތަކުގައި ތިބި ކުޑަކުދިންނަށް ސިއްހީ އެހީތެރިން ފޯރުކޮށްދިނުމަށް ބޮޑެތި ހުރަސްތަކެއް ކުރިމަތިވެއެވެ. މީގެ ސަބަބުން ވެކްސިން ފްރަންޓްލައިން ކަވަރޭޖަށް ބުރޫއަރައި، ވައިރަސް ފެތުރުން ހުއްޓުވުމަށް ކުރާ ދެމެހެއްޓެނިވި މަސައްކަތްތަކަށް ހުރަސްތައް ކުރިމަތިވެއެވެ. މިއީ ހަމައެކަނި ވެކްސިން ކެމްޕޭންތަކަށް އެކަނި ކުރިމަތިވާ ހުރަހެއް ނޫނެވެ. ނުރައްކާތެރި ސަރަހައްދުތަކުގައި ހަރަކާތްތެރިވާ ސިއްހީ އެހީތެރިންގެ ފުރާނައަށް ވެސް ބޮޑެތި ނުރައްކާތަކެއް އޮންނަކަން ފާހަގަކުރެވެއެވެ.
ޕޯލިއޯއަކީ ހަށިގަނޑުގެ ނާރުތަކަށް އަސަރުކުރުވައި، ދާއިމީ ގޮތެއްގައި ވާގިނެތުމަށް މެދުވެރިވާ އަދި ނުރައްކާތެރި ހާލަތްތަކުގައި މަރުގެ ނުރައްކާ ވެސް އޮންނަ، ވަރަށް ހަލުވިކަމާއެކު ފެތުރޭ ބައްޔެކެވެ. މިއީ ބަލި ޖެހުމަށްފަހު ވަކި ޚާއްސަ ފަރުވާއެއް އޮންނަ ބައްޔަކަށް ނުވިނަމަވެސް، ރައްކާތެރިކަމުގެ ފިޔަވަޅެއްގެ ގޮތުން ވެކްސިން ދިނުމުން މި ބަލިން މުޅިން ރައްކާތެރިކޮށްދެއެވެ.
