ޕާކިސްތާނުގައި ތަކެތީގެ އަގު އުފުލުމާއި އިންފްލޭޝަން މަތިވުމުގެ އިތުރުން، އާންމު އަސާސީ ޚިދުމަތްތައް އަމިއްލަ ޚަރަދުގައި ހޯދަންޖެހުމުގެ ސަބަބުން އެ ޤައުމުގެ މެދުފަންތީގެ އާއިލާތަކަށް ކުރިމަތިވެފައިވާ އިގްތިސާދީ ދަތިކަން އިންތިހާއަށް ބޮޑުވެ، އެ މީހުންގެ ދިރިއުޅުމުގެ ފެންވަރު ދަށަށް ދާން ފަށައިފިއެވެ. ދައުލަތުން ފޯރުކޮށްދޭންޖެހޭ އަސާސީ ޚިދުމަތްތައް ނިޒާމީ ގޮތެއްގައި ފެއިލްވުމުގެ ސަބަބުން، އަމިއްލަ ޖީބުން ބޮޑު ހޭދައެއް ކުރަންޖެހުން ވަނީ އާންމު ރައްޔިތުންނަށް އުފުލަންޖެހިފައިވާ ބޮޑު ބާރަކަށް ވެފައެވެ.
ޕާކިސްތާނުގެ ބިއުރޯ އޮފް ސްޓެޓިސްޓިކްސްއިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، 2024-25 ވަނަ އަހަރު އެ ޤައުމުގެ އާއިލާއަކަށް މަހަކު އެވަރެޖްކޮށް ލިބެނީ 82,179 ރުޕީސްއެވެ. ނަމަވެސް އާއިލާއެއްގެ މަހު ޚަރަދު އުޅެނީ 79,150 ރުޕީސްގައެވެ. މިއީ މަހެއްގެ މައްޗަށް އެންމެ 3,000 ރުޕީސްގެ ކުޑަ މާޖިންއެކެވެ. މީގެ ސަބަބުން ސިއްހީ ކުއްލި ނުރައްކަލެއް ނުވަތަ ވަޒީފާ ގެއްލުން ފަދަ ކަމެއް ކުރިމަތިވެއްޖެނަމަ، އެފަދަ އާއިލާތައް ދަރުވާލުމުގެ ނުރައްކާ ވަނީ ބޮޑުވެފައެވެ.
ކަރަންޓުގެ އަގުތައް އިންތިހާއަށް އުފުލުމަކީ މެދުފަންތީގެ އާއިލާތަކަށް އޮތް އެންމެ ބޮޑު އެއް ގޮންޖެހުމެވެ. ބައިނަލްއަޤްވާމީ މާލީ އިދާރާ (އައިއެމްއެފް) ގެ ޕްރޮގްރާމްގެ ދަށުން ކަރަންޓު ޓެރިފްތަކަށް ގެންނަން ހުށަހެޅި ބަދަލުތަކާއެކު، އާންމު ގޭބިސީތަކުން ދައްކަންޖެހޭ ބިލުތައް ވަނީ އިންތިހާއަށް މަތިވެފައެވެ. ދައުލަތުގެ ކަރަންޓު ނިޒާމުގައި ހުރި މައްސަލަތަކާއި ދަރަނިތަކުގެ ބުރަ، ސަރުކާރުން ވަނީ އާންމު ރައްޔިތުންގެ ކަންކަށިމައްޗަށް އަރުވާފައެވެ. ހޫނުމޫސުމުގައި ކަރަންޓު ބޭނުންކުރުން މަދުކުރުމަށް އިރުޝާދު ދިން ކަމުގައިވީ ނަމަވެސް، ޒަމާނީ ދިރިއުޅުމުގައި ކަރަންޓަކީ އާންމު ދިރިއުޅުމާ ގުޅިފައިވާ އަސާސީ ޚިދުމަތެކެވެ.
ކަރަންޓުގެ އިތުރުން ފެނުގެ ޚިދުމަތް ފޯރުކޮށްދިނުމުގައިވެސް ބޮޑެތި މައްސަލަތަކެއް ވަނީ ފާހަގަކުރެވިފައެވެ. ކަރާޗީ ފަދަ ބޮޑެތި ރަށްތަކުގައި އާންމު ފެނުގެ ނިޒާމު ފެއިލްވެފައިވުމުން، ގޭބިސީތަކުން ޖެހެނީ އަމިއްލަ ތާންގީ ލޮރިތަކުގައި ފެން ގަންނާށެވެ.
އިންޓަރނޭޝަނަލް ގްރޯތު ސެންޓަރުގެ ދިރާސާއަކުން ދައްކާ ގޮތުގައި، ކަރާޗީގެ އާއިލާއަކުން މަހަކު އެވްރެޖްކޮށް 2,500 ރުޕީސް އާންމު ބޭނުންތަކުގެ ފެނަށް އަދި 736 ރުޕީސް ބޯފެނަށް ޚަރަދުކުރެއެވެ. ޓެކްސް ދެއްކުމަށްފަހުވެސް، އަސާސީ ޚިދުމަތްތައް ހޯދުމަށް ދެވަނަ ފަހަރަށް އަމިއްލަ ޖީބުން ހޭދަކުރަންޖެހުމަކީ ސަރުކާރުގެ އިޖުތިމާއީ އެގްރީމަންޓާމެދު އުފެދޭ ބޮޑު ސުވާލެކެވެ.
ދައުލަތުގެ ސިއްހީ ނިޒާމާއި ތައުލީމީ ނިޒާމު ފެއިލްވުމުން، މެދުފަންތީގެ އާއިލާތަކަށް މަޖުބޫރުވަނީ އަމިއްލަ ހޮސްޕިޓަލްތަކަށާއި އަމިއްލަ ސްކޫލްތަކަށް ބޮޑު ހޭދައެއް ކުރާށެވެ. މީގެ ސަބަބުން އާއިލާތަކުގެ ރައްކާކުރެވޭ ފައިސާ މަދުވެ، ޒުވާން ދަރިވަރުންނާއި ގްރެޖުއޭޓުން ޤައުމު ދޫކޮށް ދިއުމަކީ އިގްތިސާދީ ގޮތުން މަޖުބޫރު ކަމަކަށް ވަނީ ވެފައެވެ.
ކަންކަން މިހެން ހުރިއިރު، ފަގީރުންގެ ހާލަތު ވަކިން ގޯހެވެ. ވަރލްޑް ބޭންކުގެ އަންދާސާ ތަކުން ދައްކާ ގޮތުގައި 2025 ވަނަ މާލީ އަހަރު ޕާކިސްތާނުގެ އާބާދީގެ 22.5 އިންސައްތަ މީހުން އުޅެނީ ޤައުމީ ފަގީރުކަމުގެ މިންގަނޑަށް ވުރެ ދަށުގައެވެ. މެދުފަންތީގެ އާއިލާތަކުން އަސާސީ ޚިދުމަތްތައް ހޯދުމަށް ކުރަންޖެހޭ ޚަރަދުތައް މަތިވުމަކީ، މުޅި އިގްތިސާދީ ނިޒާމު ނުރައްކަލުގެ ތެރެއަށް ވެއްޓެމުންދާކަމުގެ ނުރައްކާތެރި ސިގްނަލެކެވެ. ސަރުކާރުން ރައްޔިތުންގެ ކިބައިން ކެތްތެރިވުމަށާއި ޚަރަދު ކުޑަކުރުމަށް އެދުނު ނަމަވެސް، މިއީ ސިޔާސީ ގޮތުންނާއި އިގްތިސާދީ ގޮތުން ގެންގުޅޭ ނުބައި ސްޓްރެޓެޖީ ތަކުގެ ނަތީޖާ ކަމަށް ފާހަގަކުރެއެވެ.
