ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ޖަލުން މިނިވަންކުރުމަށް ގޮވާލައި އޭނާގެ ޕާކިސްތާން ތަހްރީކޭ އިންސާފް (ޕީޓީއައި) އިން ވެރިރަށް އިސްލާމްއާބާދަށް މާޗުކުރުމަށް ރާވާފައިވާ އިހުތިޖާޖާ ދިމާކޮށް، ސަރުކާރުން އިސްލާމްއާބާދަށް ވަދެވެން ހުރި މައި މަގުތައް ބަންދުކޮށް، މުޅި ސިޓީގެ ސެކިއުރިޓީ އިންތިހާއަށް ވަރުގަދަކޮށްފިއެވެ. ޕާކިސްތާނުގެ އިދިކޮޅު އެންމެ ބޮޑު ލީޑަރު މިނިވަންކުރުމަށް ގޮވާލައި ބާއްވާ މި އިހުތިޖާޖާ ގުޅިގެން، ސަރުކާރުން ވަނީ އިސްލާމްއާބާދާއި ޚައިބަރު ޕަޚްތޫންޚުވާ ގުޅުވައިދޭ މޯޓަރވޭތަކާއި ގްރޭންޑް ޓްރަންކް ރޯޑު އާންމު ދަތުރުފަތުރަށް މުޅިން ބަންދުކޮށްފައެވެ.
އިސްލާމްއާބާދުގެ ސެކިއުރިޓީ ބެލެހެއްޓުމަށްޓަކައި ޕަންޖާބާއި ސިންދުން 19,000 އަށްވުރެ ގިނަ ސިފައިންނާއި ފުލުހުން ވަނީ ގެންގޮސްފައެވެ. އަދި ސިޓީއަށް ވަދެވޭ މައި ސަރަހައްދުތަކުގައި 2,000 އަށްވުރެ ގިނަ ޝިޕިން ކޮންޓޭނަރު ބަހައްޓައި، މަގުތައް ވަނީ މުޅިން ބަންދުކޮށްފައެވެ. މީގެ އިތުރުން ސެކިއުރިޓީ ސިފައިން ތިބުމަށްޓަކައި އިސްލާމްއާބާދުގެ ބައެއް ސުކޫލުތަކާއި ކޮލެޖުތައް ވަނީ ބަންދުކޮށްފައެވެ. މީޑިއާ ރިޕޯޓުތައް ބުނާ ގޮތުގައި މި އިހުތިޖާޖުގައި 20,000 އާއި 25,000 އާ ދެމެދުގެ އަދަދަކަށް މީހުން ބައިވެރިވާނެ ކަމަށް ބެލެވެއެވެ.
އިހުތިޖާޖު ފެށުމުގެ ކުރިން ސަރުކާރުން ވަނީ އިމްރާން ޚާންގެ ތިން އަންހެން ކޮއްކޯއިން ކަމަށްވާ އަލީމާ ޚާން، އުޒްމާ ޚާން އަދި ނޫރީން ނިއާޒީގެ އިތުރުން ޕީޓީއައިގެ 1،500 އަށްވުރެ ގިނަ ސަޕޯޓަރުންނާއި ޤާނޫނުހަދާ މަޖިލީހުގެ މެންބަރުން ހައްޔަރުކޮށްފައެވެ. މި ހައްޔަރުކުރުންތަކާ ގުޅިގެން ޕީޓީއައިގެ ޗެއަރމަން ޖައުހަރު އަލީ ޚާން ވިދާޅުވީ، އެ ޕާޓީން މަސައްކަތް ކުރަނީ ސުލްހަވެރިކަމާއެކު ކަމަށާއި، އަދަބު ދެމުންދަނީ ސުލްހަވެރިކޮށް ތިބުމުން ކަމަށެވެ.
ޕާކިސްތާނުގެ ދާޚިލީ ވަޒީރު މުހްސިން ނަޤްވީ ވަނީ އިހުތިޖާޖުކުރާ ފަރާތްތަކަށް ވަރުގަދަ އިންޒާރެއް ދެއްވާފައެވެ. ނަޤްވީ ވިދާޅުވީ މިފަހަރު ސަރުކާރުން "ދާއިމީ ފިޔަވަޅުތަކެއް" އަޅާނެ ކަމަށާއި، އިސްލާމްއާބާދުގައި ގިނަ ދުވަސްތަކެއް ވަންދެން އިހުތިޖާޖުކޮށްގެން ތިބުމުގެ ފުރުސަތު ނުދޭނެ ކަމަށެވެ. ނަމަވެސް، އިހުތިޖާޖު އިސްކޮށް މެނޭޖުކުރައްވާ ޚައިބަރު ޕަޚްތޫންޚުވާގެ ޗީފް މިނިސްޓަރު ސުހޭލް އަފްރީދީ ވިދާޅުވީ، މިއީ ކުރު މާޗެއް ނޫން ކަމަށާއި، މިއީ ދިގު މުއްދަތަކަށް ކުރިއަށްދާނެ ސިޔާސީ ހަރަކާތެއް ކަމަށެވެ.
