އިންޑިއާއާއި ޗައިނާއާ ދެމެދު އުފެދިފައިވާ ސަރަހައްދީ އިމުގެ މައްސަލަތަކަށް ހައްލުތަކެއް ހޯދެމުން ދިއުމާއެކު، ދެ ގައުމުގެ މެދުގައި އޮތް ގުޅުން އަލުން އާދައިގެ ހާލަތަކަށް އަންނަން ފަށާފައިވާ ކަމަށް އިންޑިއާގެ އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު ވިދާޅުވެއްޖެއެވެ.
ނިއުޔޯކުގައި އޭޝިއާ ސޮސައިޓީން އިންތިޒާމުކޮށްގެން ބޭއްވި ހަރަކާތެއްގައި ވާހަކަދައްކަވަމުން ޖައިޝަންކަރު ވިދާޅުވީ، ފާއިތުވި އަހަރުތަކާ އަޅާބަލާއިރު ދެ ގައުމުގެ ގުޅުން މިހާރު ވަރަށް ބޮޑަށް ރަނގަޅުވެފައިވާ ކަމަށެވެ. ޚާއްސަކޮށް ނިއުދިއްލީގައި ބޭއްވި ބްރިކްސް ސަމިޓަށް ޗައިނާގެ ރައީސް ޝީ ޖިންޕިން އިންޑިއާއަށް ކުރެއްވި ޒިޔާރަތަށްފަހު، ދެ ގައުމުގެ މެދުގައި އޮތް ހުރަސްތައް ނައްތާލުމަށް އެދެވޭ ކުރިއެރުންތަކެއް ލިބެމުންދާކަން އޭނާ ފާހަގަކުރެއްވިއެވެ. "2024 އަދި 2025 ވަނަ އަހަރާ އަޅާބަލާއިރު، މިއަދު ދެ ގައުމުގެ ގުޅުން އޮތީ މާ ރަނގަޅު ފައްތަރެއްގައެވެ،" ޖައިޝަންކަރު ވިދާޅުވިއެވެ.
2020 ވަނަ އަހަރު ސަރަހައްދީ އިމުގެ މައްސަލާގައި ހިނގާދިޔަ ނުރައްކާތެރި ކުރިމަތިލުންތަކަށްފަހު، ދެ ގައުމުގެ މެދުގައި ރަސްމީ ގުޅުންތައް މުޅިންހެން ހުއްޓުމަކަށް އައިކަން މިނިސްޓަރު ފާހަގަކުރެއްވިއެވެ. އެގޮތުން ޑިޕްލޮމެޓުންގެ ދަތުރުފަތުރާއި، ވިސާ ދޫކުރުމާއި، ސީދާ ވައިގެ ދަތުރުފަތުރު ހުއްޓުނު ނަމަވެސް، ވިޔަފާރީގެ މުއާމަލާތްތައް ކުރިއަށްދިޔަ ކަމަށް އޭނާ ވިދާޅުވިއެވެ. ނަމަވެސް، ސަރަހައްދީ އިމުގެ މައްސަލަތައް ހައްލުވާން ފެށުމާއެކު، އިދާރީ އަދި ޑިޕްލޮމެޓިކް ގުޅުންތައް އަލުން އިއާދަވުމަކީ ތަބީޢީ ކަމެއް ކަމަށް އޭނާ ސިފަކުރެއްވިއެވެ.
އިންޑިއާގެ ޚާރިޖީ ސްޓްރެޓެޖީއަށް އަލިއަޅުވާލައްވަމުން ޖައިޝަންކަރު ވިދާޅުވީ، ދެ ގައުމުގެ މެދުގައި އުފެދޭ މައްސަލަތަކުގެ ފައިދާ ތިންވަނަ ފަރާތަކުން ނެގުމަށް ފުރުސަތު ނުދިނުމަކީ ނިއުދިއްލީގެ ސިޔާސަތު ކަމަށެވެ. އަދި "ސަރަހައްދީ އިމުގެ ހަމަޖެހުމަކީ ދެ ގައުމުގެ ގުޅުން ސީދާ ބިނާވާ މައިގަނޑު އަސާސް" ކަމަށް އިންޑިއާއާއި ޗައިނާއިން ވެސް މިހާރު ގަބޫލުކުރާ ކަމަށް އޭނާ ވިދާޅުވިއެވެ.
ދުނިޔޭގެ ސިޔާސީ މަސްރަހަށް އަންނަމުންދާ ބަދަލުތަކާ ގުޅޭގޮތުން ވާހަކަދައްކަވަމުން، ދުނިޔެ މިހާރު މިސްރާބު ޖަހާފައިވަނީ ގިނަ ބާރުތަކެއް އެކުލެވޭ 'މަލްޓިޕޯލާ' ނިޒާމަކަށް ކަމަށް ޖައިޝަންކަރު ވިދާޅުވިއެވެ. އެމެރިކާގެ ރައީސް ޑޮނަލްޑް ޓްރަމްޕް އާއި ޗައިނާގެ ރައީސް ޝީ ޖިންޕިން ވޮޝިންގްޓަންގައި ބޭއްވެވި 'ޖީ2′ ސަމިޓަށް އިޝާރާތް ކުރައްވައި އޭނާ ވިދާޅުވީ، ދުނިޔޭގެ އެންމެ ބޮޑު ދެ އިގްތިސާދުގެ މެދުގައި އެއްބަސްވުންތަކެއްގެވުނު ނަމަވެސް، އެ ދެ ގައުމުގެ މެދުގައި އޮތީ ވާދަވެރިކަން ކަމަށެވެ.
