1985 ވަނަ އަހަރު ހިންގި މީހަކު މަރާލުމުގެ މައްސަލައެއްގެ ކުށް ސާބިތުވެ، އެމެރިކާގެ ޔޫޓާގެ ޖަލެއްގައި 41 އަހަރު ހޭދަކުރި މީހާ ކަފާލާތުގެ ދަށުން ދޫކޮށްލައިފިއެވެ. ކޯޓުން އޭނާ ދޫކުރީ ކުށް ކުރި ތަނުން ފެނުނު ޑީއެންއޭ ސާމްޕަލްތަކުގެ އާ ތަހުލީލުތަކުން އޭނާގެ އެއްވެސް ނިޝާނެއް ފެނިފައިނުވާތީއާއި، ތަހުޤީޤުގައި ބޮޑެތި އޮޅުވާލުންތަކެއް ހުރިކަން ހާމަވުމާ ގުޅިގެންނެވެ.
އުމުރުން 71 އަހަރުގެ ޑޯގްލަސް ސްޓިއުއާޓް ކާޓާގެ މައްޗަށް މަރުގެ ހުކުމް އިއްވީ އެވާ އޯލްސަން މަރާލިކަމުގެ ކުށް ސާބިތުވުމުންނެވެ. އެހެންނަމަވެސް، މުޅި މާޒީގައިވެސް އޭނާ ދިޔައީ އެ ކުށަށް އިންކާރު ކުރަމުންނެވެ. އޭނާ ބުނަމުންދިޔައީ ތަހުޤީޤަށް ދީފައިވާ އިޢުތިރާފަކީ ބިރުދައްކައިގެންނާއި މަޖުބޫރުކުރުވައިގެން ހޯދާފައިވާ އިޢުތިރާފެއް ކަމަށެވެ.
ފަނޑިޔާރު ޑެރިކް ގޯލަން އިއްވެވި ނިންމެވުމުގައިވާ ގޮތުން، ތަހުޤީޤަށް އަލުން ހުށަހެޅި ޑީއެންއޭގެ ދިރާސާތަކުން ދައްކާ ގޮތުގައި، ކުށް ކުރި ގޭގެ ދޮރުގެ އަތްގަނޑުންނާއި ވަޅީގެ އަތްގަނޑުން ފެނުނު ލެޔާއި ޖެނެޓިކް މާއްދާތަކަކީ ކާޓާގެ އެއްޗެއް ނޫނެވެ. މިއީ މީގެ ކުރިން އޭނާއާ ދެކޮޅަށް އޮތް މާއްދީ ހެކިތައް ނެތިދިއުމުގެ ބޮޑު ސަބަބެކެވެ.
މި މައްސަލައިގެ ފެށުމަށް ބަލާއިރު، 1985 ވަނަ އަހަރުގެ ފެބްރުއަރީ 27 ގައި އެވާ އޯލްސަން މަރާލާފައި އޮއްވާ ފެނުނީ ޔޫޓާގެ ޕްރޯވޯގައި ހުންނަ އޭނާގެ ގޭގެ ތެރެއިންނެވެ. އޭނާގެ ބުރަކަށީގެ އިތުރުން ބަނޑަށާއި މެއަށް ވަޅިން ހަމަލާދިނުމަށްފަހު، ބޮލުގެ ފަހަތަށް ވަނީ ބަޑިއަކުން ހަމަލާދީފައެވެ. ފުލުހުންގެ ތަހުޤީޤަށް އެއިރު ޝައްކުކުރެވުނީ އެގޭގެ ކައިރީގައި ދިރިއުޅެމުންދިޔަ ކާޓާއަށެވެ. ފުލުހުންގެ ބަންދުގައި ހުރެ އޭނާ އިޢުތިރާފު ބަޔާނެއްގައި ސޮއިކުރި ނަމަވެސް، މާއްދީ އެއްވެސް ހެއްކެއް އޭނާއާ ގުޅުވައިދެވިފައެއް ނުވެއެވެ.
ޝަރީޢަތުން މީގެ ކުރިން ކާޓާގެ މައްޗަށް ހުކުމް އިއްވީ ހަމައެކަނި އޭނާގެ އިޢުތިރާފާއި، ބަޔަކު ދިން ހެކިބަހުގެ މައްޗަށް ބިނާކޮށެވެ. ނަމަވެސް 2011 ވަނަ އަހަރު މެކްސިކޯއިން ވާހަކަ ދައްކަމުން އެ ދެ ހެކިން ވަނީ ފުލުހުންގެ ބިރު ދެއްކުމާއި މަޖުބޫރުކުރުވުމުގެ ސަބަބުން ދޮގު ހެކިބަސް ދޭން މަޖުބޫރުވީ ކަމަށް އިޢުތިރާފުވެފައެވެ. ފުލުހުން އެމީހުންނަށް ފައިސާގެ އެހީތެރިކަން ދީ، ޝަރީޢަތަށް އެކަން ސިއްރުކުރުމަށް އެންގިކަންވެސް ވަނީ ސާބިތުވެފައެވެ.
ޔޫޓާގެ ސުޕްރީމް ކޯޓުން 2025 ވަނަ އަހަރު ނިންމާފައިވަނީ ކާޓާގެ މައްޗަށް އިއްވާފައިވާ ހުކުމް ބާތިލުކޮށް، އާ ޝަރީޢަތެއް ހިންގުމަށެވެ. އެއީ ދިފާއަށް ހެކި ވަންހަނާކުރުމާއި، ދޮގު ހެކިބަސް ދިނުމަށް ހިތްވަރުދިނުން ފަދަ ޤާނޫނީ ޚިލާފުތައް ތަހުޤީޤުގައި ހިނގާފައިވާތީއެވެ.
މި ނިންމުމާ މެދު އަނިޔާލިބުނު އާއިލާއިން ވަނީ ކަންބޮޑުވުން ފާޅުކޮށްފައެވެ. އަދި ޑީއެންއޭ ދިމާނުވުމަކީ އޭނާ އެތަނުގައި ނެތުން ސާބިތުވާ ކަމެއް ނޫން ކަމަށް އާއިލާއިން ބުނެއެވެ. ނަމަވެސް ކާޓާގެ ވަކީލު ނީލް ހެމިލްޓަން ވިދާޅުވީ، މިއީ ފުލުހުންގެ ނުބައި ނިޔަތާއި އޮޅުވާލުންތައް ސަފުކޮށް ފެންނަ މައްސަލައެއް ކަމަށެވެ.
ކާޓާ ކަފާލާތުގެ ދަށުން މިހާރު ދޫކޮށްފައި ވަނީ އޭނާގެ ފައިގައި ޓްރެކިންގް ޓެގް ހަރުކޮށްފައެވެ. އޭނާގެ މައްޗަށް އާ ޝަރީޢަތެއް ހިންގުމަށް ތައްޔާރުވަމުންދާއިރު، މިއީ 40 އަހަރަށްފަހު އޭނާ ޖަލުން ބޭރުގައި ފައި ބެހެއްޓި ފުރަތަމަ ފަހަރެވެ.
