އިންސާނީ ޙައްޤުތަކަށް މަސައްކަތްކުރާ ޕާކިސްތާނުގެ ވަކީލު އިމާން ޒައިނަބު މަޒާރީ-ހާޒިރާއި އޭނާގެ ފިރިކަލުން ހާދީ ޢަލީ ޗައްތާ ވަގުތުން ދޫކޮށްލުމަށް އދ. ގެ އިންސާނީ ޙައްޤުތަކާ ބެހޭ މާހިރުން ގޮވާލައްވައިފިއެވެ. މި ދެމަފިރިން ވަނީ ކަފާލާތުގެ ދަށުން ދޫކޮށްލިތާ ކުޑަވަގުތުކޮޅެއްގެ ތެރޭގައި ޖަލު ތެރޭގައި ތިއްބައި އަލުން ހައްޔަރުކޮށްފައެވެ.
ސޯޝަލް މީޑިއާގައި ކުރި ޕޯސްޓްތަކަކާ ގުޅިގެން އިލެކްޓްރޯނިކް ކުށްތައް ހުއްޓުވުމުގެ ޤާނޫނު (ޕެކާ) ގެ ދަށުން ދެ މީހުންނަށް ކޮށްފައިވާ ތުހުމަތުތަކާ ގުޅިގެން، މިއަހަރުގެ ޖަނަވަރީ 24 ގައި އިސްލާމްއާބާދުގެ ސެޝަންސް ކޯޓަކުން ވަނީ އިމާން އާއި ހާދީގެ މައްޗަށް ޖުމްލަ 17 އަހަރުގެ ޖަލު ހުކުމެއް އިއްވާފައެވެ. މި ހުކުމާ ގުޅިގެން ވަކީލުންނާއި އދ. ގެ މާހިރުންގެ ބޮޑު ފާޑުކިޔުމެއް ޕާކިސްތާނު ސަރުކާރަށް އަމާޒުވެފައި ވެއެވެ.
މި މައްސަލައިގައި ސެޕްޓެމްބަރު 17 ގައި ދުވަހު ޕާކިސްތާނުގެ ސުޕްރީމް ކޯޓުން ވަނީ އެ ދެމަފިރިންގެ މައްޗަށް އިއްވާފައިވާ ހުކުމް ތަންފީޒުކުރުން ފަސްކޮށް، ކޮންމެ މީހަކު 200،000 ރުޕީސްގެ ކަފާލާތެއްގެ ދަށުން ދޫކޮށްލުމަށް އަމުރުކޮށްފައެވެ. އެ ފައިސާ ނެގުމަށްފަހު ސުޕްރީމް ކޯޓުން ކަފާލާތު ދިންތާ ކުޑަ އިރުކޮޅެއްގެ ތެރޭގައި، ކުރީގެ އެހެން މައްސަލައަކާ ގުޅުވައިގެން ޓެރެރިޒަމްގެ ތުހުމަތުގައި އެ ދެމަފިރިން އަލުން ހައްޔަރު ކުރިއެވެ.
ހިއުމަން ރައިޓްސް ޑިފެންޑަރުންނާ ބެހޭ އދ. ގެ ޚާއްޞަ ރެޕަޓުއާ ނެރުއްވި ބަޔާނެއްގައި ވިދާޅުވެފައިވަނީ، އިމާން އާއި ހާދީ ޗައްތާ ވަގުތުން ދޫކޮށްލަންޖެހޭ ކަމަށާއި، އެ ދެމަފިރިންގެ މައްޗަށް ކޮށްފައިވާ އަސާސެއް ނެތް ޖިނާއީ އަދި ޓެރެރިޒަމްގެ ސިޔާސީ ތުހުމަތުތައް އަނބުރާ ގެންދަންޖެހޭ ކަމަށެވެ.
"ކަފާލާތު ލިބުމާ ގުޅިގެން ކުރީގެ މައްސަލައެއް ނަގައިގެން އަލުން ހައްޔަރުކުރުމަކީ، ޚިޔާލުފާޅުކުރުމުގެ މިނިވަންކަމާއި އިންސާނީ ޙައްޤުތަކަށް ވަކާލާތުކުރުމުގެ އަދަބެއްގެ ގޮތުގައި ޖިނާއީ ޢަދާލަތުގެ ނިޒާމު ބޭނުންކުރުން," އދގެ ރެޕަޓުއާގެ ބަޔާނުގައިވެއެވެ.
އދ. ގެ މާހިރުންވިދާޅުވީ، ޖަނަވަރީ މަހު އެ ދެމަފިރިން ފުރަތަމަ ހައްޔަރުކުރީއްސުރެ މައްސަލައިގެ ވަށައިގެންވާ ކަންކަން ބަލަމުންދާ ކަމަށާއި، މި ޝަރުޢީ މަރުޙަލާތަކުގެ އަސްލު މަޤްޞަދަކީ އެ ވަކީލުންނަށް އަދަބުދީ ބިރުދެއްކުން ކަމަށް ގަބޫލުކުރެވޭ ކަމަށެވެ. އަދި މިއީ އެ ދާއިރާގައި މަސައްކަތްކުރާ އެހެން ވަކީލުންނަށްވެސް ދެވޭ ނުރައްކާތެރި އިންޒާރެއް ކަމަށް މާހިރުން ފާހަގަކުރެއްވިއެވެ.
އިންސާނީ ޙައްޤުތައް ހިމާޔަތްކޮށް، އެކަމަށް ވަކާލާތުކުރުމަށް ވަކީލުންނަށް އޮތް ޙައްޤަށް ހުރަސްއެޅުމަށްޓަކައި "އޮޅުންބޮޅުން ބޮޑު އަދި ފުޅާ ދާއިރާއެއްގައި މާނަކުރެވޭ" ޓެރެރިޒަމްގެ ޤާނޫނުތައް ޕާކިސްތާނު ސަރުކާރުން ބޭނުންކުރުން އދ. ގެ މާހިރުން ވަނީ ކުށްވެރިކުރައްވާފައެވެ.
"ބައިނަލްއަޤްވާމީ މިންގަނޑުތައް ބުނާގޮތުން، ބިރުދެއްކުމާއި، ގޭންގުތަކާއި ނުޙައްޤު ނުފޫޒުތަކާއި، އަދި ޤާނޫނީ ވާޖިބު އަދާކުރުމުގެ ސަބަބުން ދަޢުވާލިބުމުން ވަކީލުން ހިމާޔަތްކޮށްދޭން ސަރުކާރުތަކަށް ލާޒިމުވެއެވެ. މިއީ ވަކީލުންގެ ޚިޔާލުފާޅުކުރުމުގެ މިނިވަންކަންވެސް ކަށަވަރުކޮށްދޭ މިންގަނޑުތަކެއް," ބަޔާނުގައި ބުނެފައިވެއެވެ.
އދ. ގެ މާހިރުން އިތުރަށް ވިދާޅުވީ، އެ ދެމަފިރިންނަށް އެމީހުން އިޚްތިޔާރުކުރާ ޤާނޫނީ ވަކީލުންނާއި، އާއިލާއާއި، އަދި ބޭނުންވާ ސިއްޙީ ފަރުވާ ފުރިހަމައަށް ލިބޭނެ އިންތިޒާމު މިހާރުވެސް ހަމަޖެހިފައި އޮންނަންޖެހޭނެ ކަމަށެވެ.
