އެމެރިކާގެ ރައީސް ޑޮނަލްޑް ޓްރަމްޕްގެ ޚަބަރުތައް ވަގުތީގޮތުން ގެނަސްދިނުން ހުއްޓާލި މައްސަލައިގައި، އެމެރިކާގެ ބޮޑެތި ފަސް ޓީވީ ނެޓްވޯކަކުން އެމެރިކާގެ ވާދަވެރިކަމާ ބެހޭ ގާނޫނުތަކާ ޚިލާފުވެފައިވޭތޯ ބެލުމަށް އެމެރިކާގެ ޖަސްޓިސް ޑިޕާޓްމަންޓުން ޚާއްސަ ތަހުގީގެއް ފަށައިފިއެވެ.
މި ތަހުގީގާ ގުޅިގެން ޖަސްޓިސް ޑިޕާޓްމަންޓުގެ އޮފިޝަލުން ވަނީ އޭބީސީ، ސީބީއެސް، ސީއެންއެން، އެންބީސީ އަދި ފޮކްސް ނިއުސްއަށް ގުޅައި، ވައިޓް ހައުސްގެ ޓެލެވިޒަން ޕްރެސް ޕޫލާ ގުޅޭ ލިޔެކިއުންތަކާއި މުއާމަލާތްތައް ހުށަހެޅުމަށް އަންގާފައެވެ. މިއީ އެމެރިކާގެ ރައީސުލްޖުމްހޫރިއްޔާގެ ހަރަކާތްތައް ވީޑިއޯކޮށް، އެހެނިހެން ނޫސް އިދާރާތަކަށް މީޑިއާ ކަވަރޭޖް ފޯރުކޮށްދިނުމަށް މީޑިއާ ގުޅިގެން ދެމެހެއްޓެނިވި ގޮތެއްގައި އަމަލުކުރަމުން އަންނަ ޒަމާންވީ އިންތިޒާމެކެވެ.
މި މައްސަލަ އުފެދެން މެދުވެރިވީ، ވައިޓް ހައުސްގެ ސަރަހައްދަށް ސީއެންއެންގެ ނޫސްވެރިން ވަނުން ރައީސް ޓްރަމްޕް މަނާކުރެއްވުމާ ގުޅިގެން، އެ ނެޓްވޯކަށް އެ އިންތިޒާމުގެ ތެރެއިން ބައިވެރިނުވެވޭތީ، އެހެން ނެޓްވޯކްތަކުން ގުޅިގެން ޓްރަމްޕްގެ ކަންކަމަށް ކަވަރޭޖް ދިނުން ގުޅިގެން ހުއްޓާލި ހިސާބުންނެވެ.
މި ތަހުގީގަކީ ޓްރަމްޕްގެ އިދާރާއާއި ވައިޓް ހައުސްގެ ނޫސްވެރިންނާ ދެމެދު އުފެދިފައިވާ ނު ތަނަވަސް ގުޅުންތައް އިތުރަށް ގޯސްވެ، ކުރިމަތިލުންތައް ވަރުގަދަވެފައިވާ ކަމުގެ ނިޝާނެކެވެ. މީގެ ކުރިންވެސް ޖަސްޓިސް ޑިޕާޓްމަންޓުން ވަނީ ނިއުޔޯކް ޓައިމްސްގެ ނޫސްވެރިންނަށް އަމުރު ފޮނުވައި، ވޮޝިންގްޓަން ޕޯސްޓުގެ ނޫސްވެރިއެއްގެ ލެޕްޓޮޕް ހިފަހައްޓާފައެވެ.
ޖަސްޓިސް ޑިޕާޓްމަންޓުގެ ތަރުޖަމާނު އެމިލީ ކޮވިންގްޓަން ވިދާޅުވީ، މި ތަހުގީގަކީ މި ނެޓްވޯކްތަކުން އެމެރިކާގެ ވާދަވެރިކަމާ ބެހޭ ގާނޫނުތަކާ ޚިލާފުވެފައިވޭތޯ ބެލުމަށް ހިންގާ ތަހުގީގެއް ކަމަށެވެ.
"ޓެލެވިޒަން ޕްރެސް ޕޫލްގެ މެންބަރުން ވަނީ ފާޅުކަން ބޮޑު ގޮތެއްގައި ވައިޓް ހައުސްގެ ހަރަކާތްތައް ކަވަރުކުރުން ބޮއިކޮޓްކޮށްފައި. ވާދަވެރި ވިޔަފާރިތަކުން ގުޅިގެން މިފަދަ ބޮއިކޮޓްތައް ކުރުމަކީ 'ޝާމަން އެކްޓް' ގާނޫނާ ޚިލާފު ކަމަކަށް ވެދާނެ،" ކޮވިންގްޓަން ހޮނިހިރު ދުވަހު ނެރުއްވި ބަޔާނެއްގައި ވިދާޅުވިއެވެ.
މި މައްސަލައިގެ ފެށުމަކީ މިދިޔަ ސެޕްޓެމްބަރު މަހުގެ 18 ވަނަ ދުވަހު، މީޑިއާއިން "ގަސްދުގައި ނޭދެވޭ ޚަބަރުތައް" ފަތުރާ ކަމަށް ބުނެ ސީއެންއެން، ޕޮލިޓިކޯ އަދި އެމްއެސް ނައު މީޑިއާ، ވައިޓް ހައުސްއަށް ވަނުން ޓްރަމްޕް މަނާކުރެއްވި ހާދިސާއާ ގުޅިގެން ފެށުނު ހާދިުސާއެކެވެ.
އެއާއެކު އެ ތިން މީޑިއާ އިދާރާއިން ވަނީ ސަރުކާރާ ދެކޮޅަށް ކޯޓަށް މައްސަލަ ހުށަހަޅައި، އެ ފިޔަވަޅަކީ ގާނޫނީގޮތުން ލިބިދީފައިވާ ޚިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމުގެ ހައްގަށް އަރައިގަތުން ކަމަށް ބުނެފައެވެ. ސަރުކާރުން ބުނެފައިވަނީ ވައިޓް ހައުސްއަށް ވަނުމުގެ ފުރުސަތަކީ އިމްތިޔާޒެއް ކަމަށެވެ.
ފެޑެރަލް ގާޟީއަކު ވަނީ ވައިޓް ހައުސްގެ އެ ނިންމެވުން ވަގުތީގޮތުން ސަސްޕެންޑްކޮށްފައެވެ. އަދި އެ ކޯޓު އަމުރުގެ މުއްދަތު އަންނަ އަންގާރަ ދުވަހަށް ހަމަވާނެއެވެ.
