މެދުއިރުމަތީގެ އެންމެ ކުރިއަރާފައިވާ ބަނދަރުމަތީ ސިޓީގެ މަޤާމު ދުބާއީން ދަމަހައްޓައި، ދުނިޔޭގެ ފެންވަރުގައި ކަނޑުގެ ދަތުރުފަތުރުގެ ވިލުންތެރިކަމުގެ މިންގަނޑުން ފަސް ވަނަ ހޯދައިފިއެވެ. މި ކާމިޔާބީ ހާމަވެފައިވަނީ "ލީޑިންގ މެރިޓައިމް ސިޓީސް" (އެލްއެމްސީ) އިން ކޮންމެ ދެ އަހަރަކުން އެއް އަހަރު ނެރޭ ބައިނަލްއަޤްވާމީ ރިޕޯޓުގައެވެ.
"ޑީއެންވީ" އާއި "މެނޮން އިކޮނޮމިކްސް" ގުޅިގެން އެކުލަވާލި މި ރިޕޯޓުގައި، ދުނިޔޭގެ އެންމެ މުހިންމު ކަނޑުގެ ދަތުރުފަތުރުގެ މަރުކަޒުތަކުގެ ތެރެއިން ޖުމްލަ ގުިންތި ކުރުމުގައި ދުބާއީއަށް ލިބިފައިވަނީ 12 ވަނައެވެ.
މި ނަތީޖާ އައިސްފައި ވަނީ ސަރަޙައްދީ ވިޔަފާރީގެ މަގުތަކަށް ބޮޑެތި ބުރޫއެރުންތަކެއް ކުރިމަތިވެ، މެދުއިރުމަތީގެ ސަޕްލައި ޗެއިންތަކަށް ދަތިތަކެއް ދިމާވި އުނދަގޫ އަހަރަކަށް ފަހުގައެވެ. އެފަދަ ދަތި ދަނޑިވަޅެއްގައިވެސް ދުބާއީގެ ކަނޑުގެ ދާއިރާއާއި ޖަބަލް ޢަލީ ބަނދަރުން ވަނީ މުދާ އުފުލުމުގެ ޚިދުމަތް މެދުކެނޑުމެއްނެތި ފުރިހަމަ ކެޕޭސިޓީގައި ކުރިއަށް ގެންގޮސްފައެވެ.
ސަރުކާރުގެ އިދާރާތަކާއި އަމިއްލަ ވިޔަފާރިތަކުގެ މެދުގައި އޮތް ގާތް ގުޅުމާއި، ކަސްޓަމްސްގެ ފަސޭހަ ނިޒާމުތަކާއި، އެއްގަމު މަގާއި ރޭލުގެ ވިއުގަ އަދި ފްރީ ޒޯންތަކުގެ ސަބަބުން މި ކާމިޔާބީއަށް ބޮޑު އެހީތެރިކަމެއް ލިބުނެވެ.
މި އަހަރުގެ ރިޕޯޓުގައި އަލަށް ތަޢާރަފުކުރި ކަނޑުގެ ދަތުރުފަތުރުގެ ވިލުންތެރިކަމުގެ ބައިން ދުބާއީ ފަސްވަނައަށް އައިސްފައިވަނީ، ދުނިޔޭގެ އެންމެ ބޮޑެތި މަރުކަޒުތައް ކަމަށްވާ ސިންގަޕޫރު، ރޮޓަރޑަމް، ޝަންހާއީ އަދި ލަންޑަނާއެކު އެންމެ ކުރީގެ ފަސް ސިޓީގެ ތެރޭގައި ހިމެނިގެންނެވެ.
ތަޖުރިބާކާރުން ވަނީ ދުބާއީގެ ޒަމާނީ އުމްރާނީ ތަރައްޤީއާއި، ސްޓްރެޓެޖީ ގޮތުން އޮތް މުހިންމު ސަރަޙައްދީ ބައްޓަމުގެ އިތުރުން، ކުރިއަރަމުންދާ ވިޔަފާރީގެ ދާއިރާތަކަށް ތަޢުރީފުކޮށްފައެވެ.
މި ކާމިޔާބީއާ ގުޅިގެން ޕޯޓްސް، ކަސްޓަމްސް އެންޑް ފްރީ ޒޯން ކޯޕަރޭޝަންގެ ރައީސް ޢަބްދުﷲ ބިން ދަމީޘާން ވިދާޅުވީ، މިއީ ދުބާއީގެ ވެރިންގެ ދުރުވިސްނުމާއި ދުނިޔޭގެ ފެންވަރުގެ ނިޒާމެއް ބިނާކުރުމަށް ކުރާ މަސައްކަތުގެ ނަތީޖާ ކަމަށެވެ. އަދި ކަނޑުގެ ދަތުރުފަތުރުގެ ކުންފުނިތަކުގެ މައި މަރުކަޒުތައް ޤާއިމުކުރުމަށް އެންމެ އިސްކަންދޭ ސިޓީތަކުގެ ތެރޭގައި ދުބާއީ ހިމެނުމަކީ ކޮންމެ ޙާލަތެއްގައިވެސް އެ ސިޓީގެ ހިންގުންތެރިކަން ހަރުދަނާކަން ސާބިތުކޮށްދޭ ކަމެއް ކަމަށް އޭނާ ފާހަގަކުރެއްވިއެވެ.
ޑީޕީ ވޯލްޑް ޖީސީސީގެ ސީއީއޯ އަދި މެނޭޖިންގ ޑިރެކްޓަރު އަޙްމަދު ޔޫސުފް އަލްޙަސަން ވިދާޅުވީ، ސަރަޙައްދީ ވިޔަފާރިއަށް ކުރިމަތިވި ގޮންޖެހުންތަކާއެކުވެސް، އައު މަގުތަކާއި ތަފާތު ދަތުރުފަތުރުގެ ވަސީލަތްތައް ބޭނުންކޮށްގެން ގާތްގަނޑަކަށް އެއް މިލިއަން ކޮންޓެއިނަރު ދުބާއީ މެދުވެރިކޮށް އުފުލާފައިވާ ކަމަށެވެ.
ދުނިޔޭގެ 15،000 އަށްވުރެ ގިނަ ބަނދަރުމަތީ ސިޓީތަކުގެ ތެރެއިން އެންމެ ރަނގަޅު 50 ސިޓީ ވަޒަންކޮށްފައިވަނީ 208 ތަޖުރިބާކާރުންގެ ޚިޔާލާއި ތަފާސްހިސާބުތަކުގެ މައްޗަށް ބިނާކޮށް، ފަސް އަސާސެއްގެ ދަށުންނެވެ.
މީގެ ތެރެއިން ވިޔަފާރިއަށް އޮތް ޝައުޤުވެރިކަމާއި ވާދަވެރިކަމުގެ ބައިން ދުބާއީ ވަނީ ނުވަ ދަރަޖަ ކުރިއަށް ޖެހިލައި، 15 ވަނައިން ހަވަނައަށް އަރާފައެވެ. މިއީ 2024 އަދި 2026 ވަނަ އަހަރުގެ ރިޕޯޓުތަކުގައި އެންމެ ކުރީގެ 15 ސިޓީގެ ތެރެއިން ސިޓީއަކުން ހޯދި އެންމެ ބޮޑު ކުރިއެރުމެވެ.
މީގެއިތުރުން، ވިޔަފާރިވެރިކަމުގެ ދާއިރާއިން އަބޫދާބީއާއެކު ދުބާއީ އެއްވަނަ ހޯދިއިރު، އިންސާނީ ވަސީލަތްތަކުގެ ބައިން ދުނިޔޭގެ ދެވަނަ އަދި ވާދަވެރިކަމުން ހަތަރުވަނަ ވަނީ ލިބިފައެވެ. އަދި ކުރިއަށް އޮތް ފަސް އަހަރުގެ ތެރޭގައި ދުނިޔޭގެ ކަނޑުގެ ދަތުރުފަތުރުގެ ދާއިރާގެ އެންމެ ކުރީގައި އުޅޭނެ ކަމަށް ލަފާކުރެވޭ ސިޓީތަކުގެ ތެރެއިން ދުބާއީއަށް ވަނީ ރޮޓަރޑަމްއާއި ލަންޑަނަށްވުރެ ކުރިން ތިންވަނަ ލިބިފައެވެ. މި ރިޕޯޓު ރަސްމީކޮށް އިފްތިތާޙުކޮށްފައިވަނީ ދުބާއީގައި ބޭއްވި ފުރަތަމަ "ސީޓްރޭޑް މެރިޓައިމް ލޮޖިސްޓިކްސް މިޑްލް އީސްޓް" ސަމިޓްގައެވެ.
