ދެކުނު އޭޝިއާ އަދި ދެކުނު އިރުމަތީ އޭޝިއާގެ ސަރަޙައްދީ މަސްރަހުގައި ދިފާޢީ ގުޅުންތައް އިތުރަށް ބަދަހިކުރުމުގެ ގޮތުން، އިންޑިއާގެ ސިފައިންގެ 55 ވަނަ އާމީ ހަޔަރ ކޮމާންޑް ކޯހުގެ ވަފްދެއް އިންޑޮނޭޝިއާގެ ވެރިރަށް ޖަކާޓާއަށް ޒިޔާރަތްކޮށްފިއެވެ. މި ދަތުރުގެ ތެރެއިން، އިންޑޮނޭޝިއާގެ ނޭޝަނަލް އާމްޑް ފޯސަސް އިންޓަރނޭנޭޝަނަލް ކޯޕަރޭޝަން ސެންޓަރ (ޓީ.އެން.އައި-އައި.ސީ.ސީ) ގެ އިސް އޮފިޝަލުންނާ ބައްދަލުކުރައްވައި، ދިފާޢީ އަދި ސަލާމަތީ ކަންކަމުގައި ދެ ޤައުމުގެ އެއްބާރުލުން އިތުރުކުރުމާ ގުޅޭގޮތުން ވަނީ ފުޅާދާއިރާއެއްގައި މަޝްވަރާކުރައްވާފައެވެ.
ބުދަ ދުވަހު ކުރިއަށްދިޔަ މި ޒިޔާރަތުގައި، އިންޑިއާގެ ވަފްދަށް މަރުޙަބާ ވިދާޅުވީ ޓީ.އެން.އައި-އައި.ސީ.ސީ ގެ ކޮމާންޑަރ، ބްރިގޭޑިއަރ ޖެނެރަލް ޓީ.އެން.އައި ޕެރީ ސަންދީ ސިޓޮމްޕުލްއެވެ.
ޖަކާޓާގައި ހުންނަ އިންޑިއާގެ އެމްބަސީން ޢާންމުކުރި މަޢުލޫމާތަށް ބިނާކޮށް، މި ބައްދަލުވުމުގައި އިންޑޮނޭޝިއާގެ ޤައުމީ ދިފާޢީ އަދި ސަލާމަތީ ކަންކަމާ ބެހޭގޮތުންނާއި، ޤައުމު ބިނާކުރުމާއި ސަލާމަތީ ކަންކަމުގައި ސިފައިން އަދާކުރާ މުހިންމު ދައުރާ ގުޅޭގޮތުން ޚާއްސަ ޕްރެޒެންޓޭޝަނެއް ހުށަހަޅާފައިވެއެވެ.
މި ޒިޔާރަތާ ގުޅޭގޮތުން ވާހަކަދައްކަވަމުން އިންޑޮނޭޝިއާގައި ހުންނަ އިންޑިއާގެ އެމްބަސީން ބުނީ، މިފަދަ ބައްދަލުވުންތަކުގެ ސަބަބުން ދެ ޤައުމުގެ ސިފައިންގެ މެދުގައި އޮތް ގުޅުން ބަދަހިވެ، ކުރިއަށް އޮތްތަނުގައި ގުޅިގެން މަސައްކަތްކުރެވޭނެ އިތުރު ދާއިރާތައް ދެނެގަނެވޭނެ ކަމަށެވެ. އަދި މިއީ އިންޑިއާގެ ސިފައިންގެ މުސްތަޤުބަލުގެ ލީޑަރުންނަށް އިންޑޮނޭޝިއާގެ ސަލާމަތީ މަސްރަހާއި ޙާލަތްތައް ފުންކޮށް ދެނެގަތުމަށް ލިބުނު މުހިންމު ފުރުޞަތެއް ކަމަށްވެސް ފާހަގަކޮށްފައިވެއެވެ.
މި ޒިޔާރަތް އައިސްފައިވަނީ، އިންޑިއާއާއި އިންޑޮނޭޝިއާ ގުޅިގެން ކުރިއަށްގެންދިޔަ 12 ވަނަ ޖޮއިންޓް މިލިޓަރީ އެކްސަސައިޒް "ގަރުދާ ޝަކްތި 2026″ ކާމިޔާބުކަމާއެކު ނިމުނުތާ ކުޑަ ދުވަސްކޮޅެއްގެ ތެރޭގައެވެ. އިންޑޮނޭޝިއާގެ 11 ދުވަހުގެ މުއްދަތަކަށް ކުރިއަށްދިޔަ މި ތަމްރީނުތައް ނިމިފައިވަނީ ނޮވެމްބަރު 5 ވަނަ ދުވަހުއެވެ. އޮކްޓޯބަރު 27 ގައި ފެށުނު މި އެކްސަރސައިޒްގައި އިންޑިއާގެ ފަރާތުން ޕެރަޝޫޓް ރެޖިމެންޓްގެ ސިފައިން ބައިވެރިވެފައިވާއިރު، އިންޑޮނޭޝިއާގެ ފަރާތުން ބައިވެރިވީ އެ ޤައުމުގެ ޚާއްސަ ސިފައިންނެވެ.
މި ޖޮއިންޓް ތަމްރީނުތަކުގައި ޖަންގަލިތަކާއި، ޖަޒީރާ ސަރަޙައްދުތަކުގެ އިތުރުން އައްސޭރިފަށުގެ މާޙައުލުތަކުގައި ޙަރަކާތްތެރިވާނެ ގޮތުގެ ހަރުދަނާ ތަމްރީނުތައް ދީފައިވެއެވެ. އަދި 48 ގަޑިއިރުގެ މުއްދަތަކަށް ކުރިއަށްދިޔަ ޖޮއިންޓް ވެލިޑޭޝަން އެކްސަސައިޒެއްގެ ތެރެއިން، ދެ ޤައުމުގެ ސިފައިންގެ މެދުގައި އޮތް އަސްކަރީ ޤާބިލުކަމާއި، ޓެކްޓިކަލް އެއްބާރުލުން އަދި ހަނގުރާމައިގެ ޙާލަތްތަކުގައި ތައްޔާރަށް އޮތް މިންވަރު ވަނީ ދައްކުވައިދީފައެވެ.
