އަމީތާބް ބައްޗަންއާއި އަބީޝޭކް ބައްޗަންއަށް މަރުގެ އިންޒާރު ދީފި

1984 ވަނަ އަހަރު އިންޑިއާގައި ސިކުންނާ ދެކޮޅު ހިންގި ހަމަނުޖެހުންތަކާ ގުޅޭގޮތުން ދެއްކި ކަމަށް ބުނާ ވާހަކައަކާ ގުޅިގެން، ބޮލީވުޑްގެ މަޝްހޫރު ފިލްމީ ތަރި އަމީތާބް ބައްޗަންއާއި އޭނާގެ ދަރިފުޅު އަބީޝޭކް ބައްޗަންއަށް، ގޭންގްސްޓަރެއް ކަމަށްވާ ގޯލްޑީ ދިލޯން މަރުގެ އިންޒާރު ދީފިއެވެ. ލޯރެންސް ބިޝްނޯއީގެ ނެޓްވޯކާ ގާތް ގުޅުމެއް އޮންނަ ކަމަށް ތުހުމަތުކުރެވޭ ގޯލްޑީ ދިލޯން މީސް މީޑިއާގައި އާންމުކުރި ޕޯސްޓެއްގައި ބުނެފައިވަނީ، ބައްޗަން އާއިލާއިން ކިތަންމެ ވަރުގަދަ ސަލާމަތީ ފިޔަވަޅުތަކެއް އެޅި ނަމަވެސް، އަދި ވަޒަން ނާރާނެ ފަދަ ބުލެޓްޕްރޫފް ކެބިންތަކުގެ ތެރޭގައި ތިބި ނަމަވެސް އެ ދެބަފައިންނަށް ހަމަލާދީ މަރާލާނެ ކަމަށެވެ.

މީސް މީޑިއާގެ މަންސައެއް ކަމަށްވާ ފޭސްބުކްގައި ދިލޯން އާންމުކުރި މި އިންޒާރުގައި، އަމީތާބް ބައްޗަންއާއި އަބީޝޭކް ބައްޗަންގެ ނަން ސީދާ ފާހަގަ ކޮށްފައިވެއެވެ. އެ ޕޯސްޓުގައި އޭނާ ބުނެފައިވަނީ، ދިއްލީ ފުލުހުންގެ ޚާއްސަ ސެލްއިން ދާދިފަހުން މުމްބާއީން ހައްޔަރުކުރި ވިކާސް ތާކޫރާއި ދީޕަކް ސިންގްއަކީ އޭނާގެ ދެ ބައިވެރިން ކަމަށާއި، އެ ދެ މީހުން އެހެން އެއްވެސް ގޭންގަކާ ގުޅުވައިގެން ނުވާނެ ކަމަށެވެ. އަދި އެ ދެ މީހުން ހައްޔަރުކުރުމަކުން މުމްބާއީގައި ދިނުމަށް ރާވާފައިވާ ހަމަލާއަށް އެއްވެސް ހުއްޓުމެއް ނާންނާނެ ކަމަށާއި، އޭނާގެ އިތުރު 200 އެޖެންޓުން މުމްބާއީގައި ތައްޔާރީ ހާލަތުގައި އެބަތިބި ކަމަށްވެސް ދިލޯން ބުނެފައިވެއެވެ.

މި މައްސަލައާ ގުޅޭގޮތުން ފުލުހުންގެ އިދާރާތަކުން ހާމަކޮށްފައިވާ މަޢުލޫމާތުތަކަށް ބަލާއިރު، ދިއްލީ ފުލުހުންގެ ޚާއްސަ ޓީމުން ނޮވެމްބަރު 13 ވަނަ ދުވަހު ހައްޔަރުކުރި އެ ދެ މީހުންނަކީ އަމީތާބް ބައްޗަން މުމްބާއީގައި ދިރިއުޅޭ ގެ "ޖަލްސާ" ގެ ބޭރުގައި ބަޑިޖަހައި ހަމަލާދިނުމަށް ރާވަމުންދިޔަ ކަމަށް ތުހުމަތުކުރެވޭ ދެ މީހުންނެވެ.

ފާއިތުވި މަސްތަކުގެ ތެރޭގައި ބައްޗަންގެ ގެއަށް ބޮމުގެ ހަމަލާއެއް ދޭނެ ކަމުގެ އިންޒާރު ލިބޭ އީމެއިލްތަކެއްވެސް ފުލުހުންނަށް ލިބިފައިވެއެވެ. މި ސަލާމަތީ ނުރައްކާތަކާ ގުޅިގެން، މި ނޮވެމްބަރު މަހުގެ އެއްވަނަ ދުވަހު އަމީތާބް ބައްޗަން އޭނާގެ ގޭގެ ބޭރުގައި ސަޕޯޓަރުންނާ ބައްދަލުކުރީވެސް ވަޒަން ނާރާނެ ފަދަ ބިއްލޫރި ކެބިންއެއްގެ ތެރޭގައި ހުރެގެންނެވެ. ނަމަވެސް ނޮވެމްބަރު 15 ވަނަ ދުވަހު އޭނާ ސަޕޯޓަރުންނާ ބައްދަލުކުރި އިރު އެ ރައްކާތެރި ބިއްލޫރި ކެބިން ބޭނުން ކޮށްފައެއް ނުވެއެވެ.

ގޯލްޑީ ދިލޯންގެ ޕޯސްޓުގައި 1984 ވަނަ އަހަރު ހިނގި ސިކުންނާ ދެކޮޅު ހަމަނުޖެހުންތަކަށް އަލިއަޅުވާލަމުން ބުނެފައިވަނީ، އެ ހާދިސާތަކުގެ ޒިންމާ ނަގަންޖެހޭ ފަރާތްތަކަށް، އެ ބަޔަކު ދުނިޔޭގެ ކޮންމެ ތަނެއްގައި ދިރިއުޅުނު ނަމަވެސް، ދުވަހަކުވެސް މަޢާފު ނުކުރާނެ ކަމަށެވެ. ހަމައެއާއެކު، ސިކުންގެ މުޖުތަމަޢާ ދެކޮޅަށް ވާހަކަދައްކާ ކޮންމެ މީހަކީ އޭނާގެ ނެޓްވޯކްގެ ދުޝްމަނެއްގެ ގޮތުގައި ބަލައި، އެ ފަރާތްތަކަށް އަދަބު ދޭނެ ކަމުގެ އިންޒާރުވެސް ދީފައިވެއެވެ.

ބޭރު ޤައުމެއްގައި ހުރެގެން އިންޑިއާއާއި ކެނެޑާގައި ކުށުގެ ހަރަކާތްތައް ހިންގާ ކަމަށް ބެލެވޭ ގޯލްޑީ ދިލޯންގެ ނަމުގައި އާންމުވެފައިވާ މި ޕޯސްޓުގެ ޞައްޙަކަން އިންޑިއާގެ ސަލާމަތީ އިދާރާތަކުން މިހާރު ދަނީ ތަޙުޤީޤުކުރަމުންނެވެ. ފާއިތުވި މަސްތަކުގައި ބޮލީވުޑްގެ އިތުރު ފަންނާނުންނަށްވެސް މިފަދަ އިންޒާރުތައް ލިބެމުންދާތީ، މުމްބާއީ ފުލުހުންނާއި ޖާސޫސީ އިދާރާތަކުން ވަނީ ބައްޗަން އާއިލާގެ ސަލާމަތީ ކަންކަން އިތުރަށް ވަރުގަދަކޮށް، މަސްރަހު ވަރަށް ގާތުން ބަލަން ފަށާފައެވެ.

ހިއްސާ ކުރައްވާ!