އެމެރިކާގެ ރިއާސީ އިންތިޚާބުގެ ރޭހުން ޖޯ ބައިޑެން ދުރަށް ޖެހިވަޑައިގަންނަވާ ކަން އިއުލާން ކުރެއްވުމާއެކު އޭނާ މަގާމުން ވަކި ކުރުމަށް ޑޮނަލްޑް ޓްރަމްޕް ގޮވާލައްވައިފިއެވެ. ބައިޑެން ވަނީ އޭނާގެ ނާއިބް ރައީސް ކަމެލާ ހެރިސްއަށް ރިއާސީ ޓިކެޓް ދިނުމަށް ތާއީދު ކުރައްވާ ކަމަށް ވިދާޅުވެފައެވެ.
ހެރިސް ވަނީ ޕާޓީގެ ޕްރައިމަރީން ގޮތެއް ނިންމުމަށާއި ގުޅިގެން ކާމިޔާބު ކުރެވޭނެ ކަމުގައި ވިދާޅުވެ ބަޔާނެއް ދެއްވާފައެވެ.
ހެރިސްއާ މެދު ޓްރަމްޕް:
ރިޕަބްލިކަން ޕާޓީގެ ކެންޑިޑޭޓް ޓްރަމްޕް ވިދާޅުވީ އޭނާ ހެރިސްއާ މެދުވެސް ވިދާޅުވާން އޮތީ ބައިޑެންއާ ބެހޭ ގޮތުން ވިދާޅުވި ވާހަކަތައް ކަމަށެވެ. އަދި ހެރިސްއަކީ މަގާމަށް ޤާބިލު ބޭފުޅެއް ނޫންކަމަށް ވިދާޅުވިއެވެ.
ހެރިސްއަށް ތާއިދުކުރުން:
ޑިމޮކްރެޓިކް ޕާޓީގެ ބޭފުޅުން ވަނީ އިންތިޚާބު ކައިރިވެފައި ވަނިކޮށް ބައިޑެން ރޭހުން ބޭރުވެ ވަޑައިގަތުމުން ހެރިސްއަށް ތާއީދު ކުރައްވާކަމަށް ވިދާޅުވެފައެވެ. ނަމަވެސް ޕާޓީގެ އިސް ބައެއް ބޭފުޅުން ވަނީ ބައިޑެންގެ ނިންމެވުމަށް މަރުހަބާ ވިދާޅުވެފައެވެ. ނަމަވެސް އެބޭފުޅުން ހެރިސްއަށް ސީދާ ތާއީދު ކުރައްވާކަމަށް ވިދާޅެއް ނުވެއެވެ. އޭގެ ތެރޭގައި ކުރީގެ ރައީސް ބަރަކް އޮބާމާއާއި ކުރީގެ ކޮންގްރެސްގެ ސްޕީކަރ ނެންސީ ޕެލޯސީއާއި މެމްބަރު ޖެފްރީ ހަކީމް ހިމެނިވަޑައިގަންނަވައެވެ.
ހެރިސްގެ ޓީމް:
ހެރިސްގެ ޓީމުން ވަނީ ބައިޑެންގެ ކެމްޕޭންގެ އެކްސް އެކައުންޓްގެ ހެންޑްލްވެސް ހެރިސްގެ ކެމްޕޭނަށް ބަދަލުކޮށްފައެވެ. އަދި އޭނާގެ ޓީމުން ބުނެފައި ވަނީ، ގާނޫނީ ވަކީލެއްގެ ހައިސިއްޔަތުންނާއި ކުރީގެ ޕްރޮސެކިއުޓަރެއްގެ ހައިސިއްޔަތުން ހެރިސް އަކީ، ޓްރަމްޕް ފަދަ ކުށްވެރިއަކާ ތަފާތު ޝަޚުސިއްޔަތެއް ކަމަށެވެ. އަދި ހެރިސް ތަފާތެއް ދައްކަވާނެ ކަމަށެވެ.
ޕާޓީގެ ތާއީދު:
ޑިމޮކްރެޓިކް ޕާޓީން އެކި ސްޓޭޓްތަކުގައި ބައްދަލުވުންތައް ބާއްވައި ހެރިސްއަށް ތާއީދުކުރުމަށް މަސައްކަތް ކުރުމަށް ހަމަޖެހިފައި ވެއެވެ. ބުދަ ދުވަހު ވޮޝިންޓަނުގައި ބާއްވާ ބައްދަލުވުމުގައި ޕާޓީން މަޝްވަރާތައް ކުރާނެއެވެ. އަދި އަންނަ މަހުގެ 9 ހާ ހިސާބުގައި ޕާޓީގެ ފެންވަރުގައި އޭނާއަށް ތާއީދު ކުރުމަށް ނިންމުމަށް ބައްދަލުވުމެއް ބާއްވާނެއެވެ.
