އެމެރިކާގެ އިންތިހާބީ ރައީސް ޑޮނަލްޑް ޓްރަމްޕްގެ ވަކީލު ޓޮޑް ބްލާންޗްގެ ފޯނު ޗައިނާގެ ހެކަރުން ޓެޕް ކުރިކަން އެފްބީއައި އިން އަންގާފައިވާ ކަމަށް ސީއެންއެން އިން ރިޕޯޓުކޮށްފިއެވެ. މީޑިއާ މަސްދަރުތަކުން ހާމަކުރި ގޮތުގައި ހެކަރުން ވަނީ ވޮއިސް ރެކޯޑްތަކާއި ޓެކްސްޓް މެސެޖުތަކަށް ވަދެފައެވެ. ނަމަވެސް އެމީހުންނަށް ގިނައިން ލިބިފައިވާ މައުލޫމާތަކީ، ބްލާންޗްގެ އާއިލާއާ އޭނާގެ ޒާތީ މުއާމަލާތްތަކާ ބެހޭ މައުލޫމާތެވެ. މިދިޔަ ހަފްތާގައި ރިޕޯޓްކޮށްފައިވާ މި ހާދިސާގެ ސީދާ އަސަރެއް ޓްރަމްޕަށް ކޮށްފައެއް ނުވެއެވެ. އަދި ރައްކާތެރިކަމުގެ ފިޔަވަޅެއްގެ ގޮތުން ބްލާންޗް ވަނީ އައު ފޯނު ނަންބަރެއް ގެންގުޅެން ފަށާފައެވެ.
މިއީ ޓްރަމްޕްގެ ގާނޫނީ ޓީމާ ގުޅިގެން ހެކުކޮށްފައިވާ ކަމުގެ ދެވަނަ ހާދިސާ އެވެ. އޮގަސްޓް މަހު ވަކީލު ލިންޑްސީ ހެލިގަންގެ ފޯނު ވަނީ އީރާނުގެ ގްރޫޕަކުން ހެކްކޮށްފަ އެވެ.
ނިއުޔޯކް ޓައިމްސް އިން ކުރިން ރިޕޯޓްކޮށްފައިވާ ގޮތުގައި ޗައިނާގެ ހެކަރުން ރިޕަބްލިކަން ޕާޓީގެ ކެންޑިޑޭޓުންގެ ފޯނުތަކަށްވެސް އަމާޒުކުރިއެވެ. އެމައްސަލާގެ ތަހުގީގު އެފްބީއައި އިން ވަނީ އޮކްޓޯބަރު މަހުގެ ފަހުކޮޅު ފަށާފަ އެވެ.
ޗައިނާއިން ވަނީ މިކަމުގައި ބައިވެރިވާ ކަމަށް ބުނާ ވާހަކަތައް ދޮގުކޮށްފައެވެ. އަދި ސައިބަރ ހަމަލާތަކާ ދެކޮޅު ހަދައި، އެމެރިކާއަކީ “ދުނިޔޭގެ ހެކަރުންގެ ބޮޑު ހެކަރު އެމްޕަޔަރ” ކަމަށް ބުނެ ޗައިނާއިން ވަނީ ފާޑުކިޔާފައެވެ.
