ޕާކިސްތާނުގެ އިޤްތިޞާދަށް ވަގު ވިޔަފާރިން އަހަރަކު 12.1 ބިލިއަން ޑޮލަރު (3.4 ޓްރިލިއަން ޕާކިސްތާނު ރުޕީސް) ގެ ގެއްލުން ވަމުންދާ ކަމަށް އެ ޤައުމުގެ ޕޮލިސީ ރިސާޗް އިންސްޓިޓިއުޓް އޮފް މާކެޓް އިކޮނޮމީ (ޕްރައިމް) އާއި ޓްރާންސްނޭޝަނަލް އެލައަންސް ޓު ކޮމްބެޓް އިލިސިޓް ޓްރޭޑް (ޓްރެސިޓް) ގުޅިގެން ހަދާފައިވާ ދިރާސާއަކުން ދައްކައިފިއެވެ.
މި އަދަދަކީ ޕާކިސްތާނުގެ ޖީޑީޕީގެ 3.5 އިންސައްތައެވެ. އަދި މިއީ މި މާލީ އަހަރަށް ސަރުކާރުން އަމާޒުކޮށްފައިވާ ޖުމުލަ ޓެކްސް އާމްދަނީގެ 26 އިންސައްތައެވެ. މިއީ ޤައުމުގެ ބަޖެޓު އަދި ބައިނަލްއަޤްވާމީ އިލްތިޒާމުތައް އަދާކުރުމަށް މަސައްކަތްކުރަމުންދާ ދަނޑިވަޅެއްގައި ޤައުމަށް ލިބޭ ވަރަށް ބޮޑު ގެއްލުމެކެވެ.
ދިރާސާއިން ހާމަވި އެންމެ ކަންބޮޑުވާންޖެހޭ އެއް ކަމަކީ ވަގު ވިޔަފާރިން ލިބޭ ގެއްލުމުގެ 30 އިންސައްތަ (3.56 ބިލިއަން ޑޮލަރު) އަކީ އަފްޣާން ޓްރާންސިޓް ޓްރޭޑް (އޭޓީޓީ) ފެސިލިޓީގެ ނަހަމަ ބޭނުން ހިފުމުގެ ސަބަބުން ލިބޭ ގެއްލުމެވެ. އަފްޣާނިސްތާނަށް މުދާ އެތެރެކުރުމަށް ހަދާފައިވާ މި ނިޒާމުގެ ބޭނުން ނަހަމަ ގޮތުގައި ހިފައި، ގިނަ މުދާތަކެއް ޕާކިސްތާނުގެ މާކެޓަށް އަންނަކަން ފާހަގަކުރެވިފައިވެއެވެ.
ވަގު ވިޔަފާރީގެ ސަބަބުން އެންމެ ބޮޑު އަސަރެއް ކުރަނީ ދުންފަތުގެ ވިޔަފާރިއަށެވެ. ދުންފަތުގެ އުފެއްދުންތަކަށް މަތީ ޓެކްސް ނެގުމާއި ހަރުކަށި ޤަވާއިދުތައް ހެދިފައި ވީނަމަވެސް، މާކެޓުގެ ތިންބައިކުޅަ އެއްބައި ހިއްސާކުރަނީ ޓެކްސް ނުދައްކާ، ވަގު ވިޔަފާރީގެ ތެރެއިން އެތެރެކުރާ އުފެއްދުންތަކެވެ.
މި ރިޕޯޓުން ދައްކާގޮތުގައި ވަގު ވިޔަފާރި މިހާ ފުޅާވެފައިވަނީ ޤާނޫނީ ހުސްކަންތަކާއި، ބޯޑަރު ސެކިއުރިޓީގެ ދަށްކަމާއި، ޤާނޫނު ތަންފީޒުކުރުމުގައި ހުރި މައްސަލަތަކުގެ ސަބަބުންނެވެ. މީގެ ތެރޭގައި އިލެކްޓްރޯނިކް ތަކެއްޗާއި، އަންނައުނާއި، ޓަޔަރާއި، ހަކުރާއި ކާބޯތަކެތީގެ ތެލުގެ ވަގު ވިޔަފާރި ހިމެނެއެވެ.
