ޓެރަރިސްޓް ހަމަލަތައް އިތުރު ވުމާ ގުޅިގެން ޕާކިސްތާން ރެއިލްވޭސް އަށް ކުރިމަތިލާން ޖެހިފައިވާ ސަލާމަތީ ކަންބޮޑުވުންތައް އިތުރުވުމުން، ބަލޮޗިސްތާނުގެ އެކި ހިސާބުތަކުގައި ރޭލު ދަތުރުތައް ހުއްޓިފައިވާ ކަމަށް ރިޕޯޓުތައް ބުނެއެވެ. ކުއެޓާއާއި ކަރާޗީއާ ދެމެދު ދަތުރުކުރާ މުހިންމު ރޭލު ޚިދުމަތެއް ކަމަށްވާ ބޯލާން މެއިލްގެ ދަތުރުތައް 20 ދުވަހަށް ވުރެ ގިނަ ދުވަސް ވަންދެން ވަނީ ހުއްޓާލާފައެވެ. އަދި ކުއެޓާއާއި ޕެޝާވަރާ ދެމެދު ލާހޯރު މެދުވެރިކޮށް ދަތުރުކުރާ ޖައުފަރު އެކްސްޕްރެސް ވެސް ވަނީ އެ ސަރަހައްދަށް ވަނުން މަނާކޮށްފައެވެ.
މިކަމާ ބެހޭ ގޮތުން ރަސްމީ ފަރާތްތަކުން ހާމަކުރައްވާ ގޮތުގައި، މި ދަތުރުތައް ހުއްޓާލުމުގެ މައިގަނޑު ސަބަބަކީ "ސަލާމަތީ ނުރައްކާތައް އިތުރުވެ ދަތުރުކުރާ މީހުންގެ އަދަދު މަދުވުން" އެވެ. އޮކްޓޯބަރު 9 ގައި ކަރާޗީއިން ފުރުމަށް ހަމަޖެހިފައިވާ ބޯލާން މެއިލްގެ ދަތުރު ކެންސަލްކުރުމާ ގުޅިގެން، ކުއެޓާއިން އެނބުރި އަންނަ ދަތުރު ވެސް ވަނީ މުޅިން ހުއްޓާލާފައި ކަމަށް އެފަރާތްތަކުން ބުނެއެވެ.
ރޭލްވޭގެ އިސްވެރިން ވަނީ މިކަން ވަގުތީ ކަމެއް ކަމަށް ސިފަކޮށް، ހާލަތު ރަނގަޅުވުމުން ހިދުމަތްތައް އަލުން ފަށާނެ ކަމަށް ބުނެފައެވެ. "ހިދުމަތްތައް އަލުން ފެށޭނެ އަމާން މާހައުލެއް ކަށަވަރުކުރުމަށްޓަކައި ސަލާމަތީ އެޖެންސީތަކާ އެކު އަބަދުވެސް ގުޅަމުން ގެންދަން،" ރޭލްވޭގެ ތަރުޖަމާނަކު ވިދާޅުވިއެވެ.
މި ދަތުރުތައް ހުއްޓާލާފައި މިވަނީ، ރޭލު ދަތުރުކުރާ އިންފްރާސްޓްރަކްޗަރ އާއި މުވައްޒަފުންނަށް ބަލޮޗީ ޓެރަރިސްޓުން ދޭ ހަމަލަތަކަށް ފަހުއވެ.
