ސައުދީ އަރަބިއްޔާގައި ބޭއްވުމަށް ހަމަޖެހިފައިވާ 2034 ވަނަ އަހަރުގެ ފީފާ ވޯލްޑް ކަޕަށް ހަދާ ފުޓްބޯޅަ ސްޓޭޑިއަމެއްގެ ޑިޒައިން ކަމަށް ބުނެ އޭއައި މަބްއިން އުފައްދާފައިވާ ވީޑިއޯއެއް މި ހަފްތާގައި ސޯޝަލް މީޑިއާގައި ބޮޑު ސަމާލުކަމެއް ހޯދައިފި އެވެ. އުސް އިމާރާތެއްގެ މަތީގައިވާ މި ވިދާ ސްޓޭޑިއަމްގެ ވީޑިއޯއަކީ ސައުދީގެ ރަސްމީ ޑިޒައިނެއް ކަމަށް ބުނެ އެކައުންޓުތަކުން ހިއްސާކޮށްފައިވާއިރު، މިލިއަނަކަށް ވުރެ ގިނަ މީހުން ވަނީ އެއީ ހަގީގަތެއް ކަމަށް ގަބޫލުކޮށްފަ އެވެ.
ނަމަވެސް، މި ވީޑިއޯއަކީ ސައުދީގެ ރަސްމީ ޕްލޭންތަކާ އެއްވެސް ގުޅުމެއް ނެތް އެއްޗެއް ކަމަށް އެގައުމުގެ ކަމާބެހޭ ފަރާތްތަކުން ވަނީ ހާމަކޮށްފަ އެވެ. ސައުދީން ވަނީ 'ދަ ލައިން' ކިޔާ މުސްތަގްބަލުގެ މެގާސިޓީ ޕްރޮޖެކްޓެއްގައި ރިއަލް އެސްޓޭޓް ކޮމްޕްލެކްސްއެއްގެ މަތީގައި ފުޓްބޯޅަ ދަނޑެއް އެޅުމުގެ ޕްލޭންތައް ހާމަކޮށްފައެވެ. ނަމަވެސް، ވައިރަލްވެފައިވާ ޑިޒައިންގެ ވީޑިއޯއާއި ހަގީގީ ސްޓޭޑިއަމާ އެއްވެސް ގުޅުމެއް ނެތް ކަމަށް ބުނެއެވެ. މިކަމާ ގާތުން މަސައްކަތްކުރާ މަސްދަރަކުން އޭއެފްޕީއަށް މައުލޫމާތު ދެމުން ބުނީ، "މި ޑިޒައިނަކީ މުޅިން ފޭކް އެއްޗެއް. ސައުދީ އަރަބިއްޔާގެ އެއްވެސް ރަސްމީ ޕްލޭނަކާ އެއްގޮތް ކަމެއް އެއަކު ނެތް،" ކަމަށެވެ.
ފްރާންސް މީޑިއާގައި މި ވީޑިއޯއަށް އިޝާރާތްކޮށް ލިޔެފައިވާ ލިޔުންތައް ފަހުން ވަނީ ޑިލީޓްކޮށް ނުވަތަ އަޕްޑޭޓްކޮށްފަ އެވެ. އޭއެފްޕީގެ ޑިޖިޓަލް އިންވެސްޓިގޭޝަން ޓީމުން މި ވީޑިއޯގެ އަސްލު ހޯދިއިރު، އެއީ އޭއައި އިން އުފައްދާފައިވާ މުސްތަގްބަލުގެ ސްޓޭޑިއަމްތަކުގެ ކޮންޓެންޓް ގަވާއިދުން ޕޯސްޓްކުރާ އިންސްޓަގްރާމް އެކައުންޓަކުން ހާމަކުރި އެއްޗެއްކަން ހާމަވިއެވެ. މި އެކައުންޓްގެ ވެރިމީހާ ވަނީ މި ވީޑިއޯ އުފެއްދިކަން ކަށަވަރުކޮށްދީފަ އެވެ.
ސައުދީ އަރަބިއްޔާއިން ދަނީ 2034 ވަނަ އަހަރުގެ ދުނިޔޭގެ އެންމެ ބޮޑު ފުޓްބޯޅަ އިވެންޓަށް ތައްޔާރުވުމުގެ ގޮތުން ބޮޑެތި އިންފްރާސްޓްރަކްޗާ މަޝްރޫއުތަކަށް ބޮޑުކޮށް ހޭދަ ކުރަމުންނެވެ.
