އެމެރިކާގައި ދާއިމީކޮށް ދިރިއުޅުމަށް އެދޭ ފަރާތްތަކަށް ވިސާ ދޭ އިރު ފަހަލަ ކަމަށް ބެލެވޭ މީހުންނަށް ވިސާ ނުދިނުމަށް ޓްރަމްޕް އަންގައިފިއެވެ. އިމިގްރޭޝަނަށް ގެނެވުނު މި ބަދަލުގެ ދަށުން، ހިތުގެ ބަލިތަކާއި، ހަކުރު ބައްޔައި އަދި ނަފްސާނީ ބަލިތަކާ އެކު، ބަރުދަން އިތުރުވެފައިވާ މީހުން އެމެރިކާގެ ސިއްހީ ނިޒާމަށް ބުރައަކަށް ވެދާނެ ކަމަށް ބަލައި ވިސާ ދިނުމުގައި ދަތިކުރުމަށް ވަނީ އަންގާފައެވެ.
އޮފިޝަލުންނަށް ވަނީ، ވިސާއަށް އެދޭ ފަރާތްތަކަށް އެމީހުންގެ ދިގު މުއްދަތުގެ މެޑިކަލް ހަރަދުތައް ސަރުކާރުގެ އެހީތެރިކަމަށް ބަރޯސާ ނުވެ ހަމަޖެއްސޭނެ ގާބިލުކަން މާލީ ގޮތުން ކަށަވަރު ކޮށްދިނުމަށްވެސް އިރުޝާދު ދީފައެވެ. މި ޤަވާއިދަށް އަމަލުކުރަނީ ދާއިމީ ކޮށް އެމެރިކާއަށް ދިރިއުޅުން ބަދަލު ކުރަން ބޭނުންވާ މީހުންނަށް ވިސާ ދިނުމުގައެވެ.
ކުރު މުއްދަތުގެ ޓޫރިސްޓް ވިސާ ބީ2އަށް އެދޭ ފަރާތްތަކުގެ މެޑިކަލް ހަރަދުތައް އަމިއްލައަށް ހަމަޖެއްސޭނަމަ މި ޤަވާއިދުތައް ނުހިނގާނެއެވެ.
ވައިޓް ހައުސްގެ ތަރުޖަމާނު ޓޮމީ ޕިގޯ މި ފިޔަވަޅު ދިފާއުކޮށް ބުނެފައި ވަނީ މިއީ އެމެރިކާގެ ރައްޔިތުންގެ މަސްލަހަތު އިސްކުރުމާއި، ޓެކްސް ދައްކާ ފަރާތްތަކުގެ ފައިސާއިން ހިންގާ ހިދުމަތްތަކަށް ބާރުބޮޑުވުން ކުޑަކުރުމަށްޓަކައި އަޅާފައިވާ ފިޔަވަޅެއް ކަމަށެވެ.
މީގެ އިތުރުން، އިމިގްރޭޝަނަށް އިތުރު ބޮޑެތި ބަދަލުތަކެއް ވެސް ވަނީ ގެނެސްފައެވެ. އޭގެ ތެރޭގައި، ހުނަރުވެރި މަސައްކަތްތެރިންނަށް ދޫކުރާ އެޗް-1ބީ ވިސާއަށް އަހަރަކު 100،000 ޑޮލަރުގެ ފީއެއް ކުންފުނިތަކުން ދައްކަން ޖެހޭނެ ގޮތަށް ހަމަޖެއްސުން ހިމެނެއެވެ. މި ފީ ދައްކަން ޖެހޭނީ އެންމެ ގިނަވެގެން ހަ އަހަރަށެވެ. އަދި، އަވަސްކޮށް ވިސާ ދިނުމުގެ އާ ގޯލްޑް ކާޑް ޕްރޮގްރާމެއް ތައާރަފްކޮށްފައިވާއިރު، މާލީ ގޮތުން ބޮޑެތި އެހީތެރިކަން ފޯރުކޮށްދޭ ފަރާތްތަކަށް 80،000 ކާޑު ދޫކުރުމަށް ވަނީ ހަމަޖައްސާފައެވެ.
މި ބަދަލުތަކުގެ ތެރޭގައި، އަފްޣާނިސްތާނާއި، އީރާނާއި، ސޯމާލިއާ ފަދަ 12 ގައުމެއްގެ ރައްޔިތުންނަށް އެމެރިކާއަށް ދަތުރުކުރުން މުޅިން މަނާކޮށްފައި ވެއެވެ. ވެނެޒުއޭލާ އަދި ކިއުބާ ފަދަ އިތުރު ހަތް ގައުމަކަށް ވެސް ވަނީ ބައެއް ހިފެހެއްޓުންތައް ތައާރަފް ކޮށްފައެވެ.
