ހަނގުރާމަތަކަކީ ހަމައެކަނި ވަޒަނާއި ބޮމުން ކުރެވޭ ކަމެއް ނޫނެވެ. އިލެކްޓްރޯމެގްނެޓިކް ރާޅުތަކުން ވެސް ހަނގުރާމަ ކުރެއެވެ. މިހާރު ޖީޕީއެސްއަށް އޮޅުވާލުމަކީވެސް ހަނގުރާމައިގެ ބައެކެވެ. އާދައިގެ ލޮލަށް ނުފެނުނު ކަމުގައި ވިޔަސް، ޖީޕީއެސް ޖޭމްކުރުމުގެ ސަބަބުން ބޮޑެތި މައްސަލަތަކާއި، މުއާސަލާތީ ހުރަސްތަކާއި، އަދި ފުރާނައަށް ނުރައްކާވާ ފަދަ އެކްސިޑެންޓްތައް ހިނގައިފާނެއެވެ.
ފަހަކަށް އައިސް، ޖީޕިއެސް ޖޭމްކުރުމުގެ ސަބަބުން ޔޫރަޕްގެ މަތިންދާބޯޓުތަކުގެ މަގުތަކަށް ވަނީ އަސަރުކޮށްފައެވެ. މީގެ ތެރޭގައި ޔޫރަޕިއަން ކޮމިޝަންގެ ރައީސް ބޭނުންކުރެއްވި ބޯޓެއް ވެސް ހިމެނެއެވެ. އަދި މިއީ ޔޫކްރޭން ހަނގުރާމައިގައި ކޮންމެ ދުވަހަކު ފެންނަ ކަމެކެވެ. މިހާރު މެދުއިރުމަތީގައި ހަމަނުޖެހުންތައް ފެށިފައިވާއިރު، އިލެކްޓްރޯނިކް ހަނގުރާމައިގެ އަސަރު އިތުރު ސަރަހައްދުތަކަށް ދަނީ ފެތުރެމުންނެވެ.
މިދިޔަ އަހަރު އިސްރާއީލާއި އީރާނާ ދެމެދު ހިނގި 12 ދުވަހުގެ ހަނގުރާމައިގައި ވެސް މި ސަރަހައްދުގައި މިފަދަ ކަންކަން ހިނގާފައިވެއެވެ. އަދި ބޯލްޓިކް ކަނޑުގައި ދަތުރުކުރާ އުޅަނދުފަހަރުގެ ނެވިގޭޓަރުންނަށް ވެސް އިލެކްޓްރޯނިކް އުނދަގޫތަކާ ކުރިމަތިލާން ޖެހުނެވެ.
އުޅަނދުފަހަރު ފާހަގަ ކުރާ އޭއައިއެސް ބޭނުންކުރަނީ އެއް އުޅަނދު އަނެއް އުޅަނދާ މުޑިއެރުވުން ހުއްޓުވުމަށެވެ. އެތައް ލައްކަ ޓަނެއްގެ ތެޔޮ އުފުލާ 300 މީޓަރު ދިގު ޓޭންކަރެއް އަނބުރާލުމަށް ނުވަތަ ހުއްޓުވުމަށް ގިނަ ވަގުތު ނަގާނެއެވެ. އަދި މިފަދަ އުޅަނދުތަކުގެ މިސްރާބު މުޅިން ބަދަލުކޮށްލުމުގެ ކުރިން އެތައް ކިލޯމީޓަރަކަށް ދަތުރުކޮށްފާނެއެވެ.
ކައިރީގައި ހުރި އުޅަނދުފަހަރު ހުރި ތަނެއް ޔަގީން ނުވާނަމަ، އެކްސިޑެންޓްވުމުގެ ފުރުސަތު ބޮޑުވެއެވެ. ހާއްސަކޮށް ރޭގަނޑު ނުވަތަ ފެންނަ މިންވަރު ދަށް ހާލަތްތަކުގައެވެ. އީރާނާ ދެކޮޅަށް ދޭ ޓެރަރިސްޓް ހަމަލައަށް ފަހު ހުރުމުޒު ކަނޑު އޮޅީގައި ޖީޕީއެސް ޖޭމް ކުރުން ވަނި އާންމު ވެފައެވެ. ތުހުމަތު ކުރެވެނީ މިއީ އީރާނުން ކުރާ ކަމެއް ކަމަށެވެ. އަދި އެމެރިކާއިން އީރާނުގެ އުޅަނދުތަކަށް މި ވަސީލަތް ބޭނުން ކުރެއެވެ.
ޖީޕީއެސް ސިސްޓަމްތަކުން ބޭނުންކުރާ ސިގްނަލްތަކަކީ ވަރަށް ބަލިކަށި ސިގްނަލްތަކަކަށް ވުމުން، އެ ޖޭމްކުރުމަކީ ފަސޭހަ ވެއެވެ. އަދި ޖީޕީއެސް ޖޭމްކުރުމުގެ ސަބަބުން ކަނޑުމަތީގެ އެކްސިޑެންޓެއް ހިނގުމުގެ ނުރައްކާ ބޮޑުވެއެވެ.
