2026 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގެ ޓިކެޓްތައް، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ ސިޔާސީ މަސްރަހާ މެދު ހުރި ކަންބޮޑުވުންތަކާ ގުޅިގެން އެތައް ހާސް ބަޔަކު ކެންސަލް ކުރަމުންދާ ކަމުގެ ރިޕޯޓްތަކެއް ސޯޝަލް މީޑިއާގައި ފެތުރެން ފަށައިފިއެވެ.
އެކްސް، ފޭސްބުކް އަދި އިންސްޓަގްރާމް ފަދަ ވަސީލަތްތަކުގައި ވައިރަލްވަމުންދާ ޕޯސްޓްތަކުގައި ބުނާ ގޮތުން، އެމެރިކާގައި ސިއްރު ފުލުހުން އިމިގްރޭޝަން ގާނޫނުތައް ވަރުގަދަކުރުމާއި، އާންމު ރައްކާތެރިކަމާ ގުޅޭ ހާދިސާތަކުގެ އިތުރުން، ބޭރުގެ ފަރާތްތަކަށް އެ ގައުމުން މަރުހަބާ ނުކިޔާ ފަދަ މާހައުލެއް އޮތުމުގެ ސަބަބުން ގިނަ ބަޔަކު ދަނީ އެމެރިކާއަށް ދަތުރުކުރުމާ މެދު ދެވަނަ ވިސްނުމަކަށް ދަމުންނެވެ.
ސޯޝަލް މީޑިއާގެ ބައެއް އެކައުންޓްތަކުން ފަތުރާ ގޮތުގައި ފާއިތުވި ދުވަސްތަކުގައި 16،000 އާއި 25،000 އާ ދެމެދުގެ އަދަދަކަށް ޓިކެޓް ވަނީ ކެންސަލްކޮށްފައެވެ. ނަމަވެސް، ދުނިޔޭގެ ފުޓްބޯޅައިގެ މައި އިދާރާ، ފީފާއިން މިހާތަނަށް މިފަދަ އެއްވެސް އަދަދެއް ކަށަވަރުކޮށްދީފައެއް ނުވެއެވެ.
ފީފާއިން އެންމެ ފަހުން އާންމުކޮށްފައިވާ މައުލޫމާތުތަކަށް ބަލާއިރު، ވޯލްޑް ކަޕްގެ ޓިކެޓަށް އޮތް ޑިމާންޑް ވަނީ ރެކޯޑް މިންވަރަކަށް އިތުރުވެފައެވެ. އެގޮތުން މިހާރު ކުރިއަށްދާ ޑްރޯ ފޭސްގައި އެކަނިވެސް 150 މިލިއަނަށްވުރެ ގިނަ ޓިކެޓް ރިކުއެސްޓް ލިބިފައިވާ ކަމަށާއި، މީގެ ކުރީގެ މަރުހަލާތަކުގައި ގާތްގަނޑަކަށް 2 މިލިއަން ޓިކެޓް ވިއްކާފައިވާ ކަމަށް އެ އިދާރާއިން ބުނެއެވެ.
މާހިރުން ފާހަގަކުރާ ގޮތުގައި ފީފާގެ ޓިކެޓް ޕޮލިސީއަކީ އާންމުގޮތެއްގައި ފައިސާ އަނބުރާ ނުލިބޭ (ނޮން-ރިފަންޑަބަލް) ޕޮލިސީއަކަށް ވުމުން، މިހާ ބޮޑު އަދަދަކުން ޓިކެޓް ކެންސަލް ކުރުމަކީ ހަގީގަތުގައި ވެސް ހިނގާފައިވާ ކަމެއްތޯ ބެލުމަށް ދަތިތަކެއް ހުންނާނެއެވެ. އަދި ޓިކެޓް ވިކޭ މިންވަރު ދަށްވަމުންދާ ކަމަށް ބެލެވެއެވެ.
