އިންޑިއާ އާއި ރަޝިޔާއާ ދެމެދު އޮތް ޒަމާންވީ ގުޅުމަށް ބުރޫއަރުވާލުމަށް ބޭރުގެ ބައެއް ގައުމުތަކުން ކުރި މަސައްކަތްތައް ނާކާމިޔާބުވެފައިވާ ކަމަށް އިންޑިއާގައި ހުންނަވާ ރަޝިޔާގެ އެމްބަސީގެ ރޯމަން ބަބުޝްކިން ވިދާޅުވެއްޖެއެވެ. އޭނާ ވިދާޅުވީ ދަތިކުރުމުގެ ފިޔަވަޅުތަކާއި ޖިއޯޕޮލިޓިކަލް ފިއްތުންތަކާ އެކުވެސް ދެ ގައުމުގެ ގުޅުން މެދުނުކެނޑި ކުރިއަށްދާ ކަމަށެވެ.
ބަބުޝްކިން ފާހަގަކުރެއްވި ގޮތުގައި، ދުނިޔޭގެ ފެންވަރުގައި ކުރިމަތިވަމުންދާ ހުރަސްތަކާ އެކުވެސް، ދެ ގައުމުން ވަނީ އާ ހާލަތްތަކަށް ހޭނިފައެވެ. މިގޮތުން ދެ ގައުމުގެ ފައިސާއިން މުއާމަލާތް ކުރެވޭނެ އާ ނިޒާމުތަކެއް ގާއިމުކުރުމާއި، މުދާ އުފުލުމުގެ އިތުރު މަގުތައް ހޯދުމުގެ އިތުރުން، އިގްތިސާދީ އަދި ވިޔަފާރީގެ ގުޅުންތައް ވަރުގަދަކުރުމަށް ގިނަ މަސައްކަތްތަކެއް ކުރެވިފައިވާ ކަމަށް އޭނާ ވިދާޅުވިއެވެ.
މީގެ އިތުރުން، އދ. އާ ގުޅުންހުރި ކަންކަމުގައާއި މެދުއިރުމަތީގެ މައްސަލަތަކުގައި ދެ ގައުމުގެ މެދުގައި ދާދި ފަހުން މަޝްވަރާ ކުރެވިފައިވާކަން ބަބުޝްކިން ފާހަގަކުރެއްވިއެވެ. އޭނާ ވިދާޅުވީ ދެ ގައުމުގެ މެދުގައި އޮތް ވާހަކަދެއްކުންތަކަކީ "ވަރުގަދަ" ވާހަކަދެއްކުންތަކެއް ކަމަށާއި، އިންޑިއާ އާއި ރަޝިޔާއަކީ އަދިވެސް އިތުބާރު ހުރި ބައިވެރިން ކަމަށެވެ.
މި ބަޔާން ނެރުއްވާފައިވަނީ އިންޑިއާގެ އެކްސްޓާނަލް އެފެއާޒް މިނިސްޓަރު އެސް. ޖައިޝަންކަރު އަދި ރަޝިޔާގެ ފޮރިން މިނިސްޓަރު ސަރްގޭ ލަވްރޯފް ފޯނުން ގުޅުއްވައި، ހުޅަނގު އޭޝިއާގެ މަސްރަހާއި ދެ ގައުމުގެ އެއްބާރުލުމާ ގުޅޭގޮތުން މަޝްވަރާ ކުރައްވާފައިވާ ދަނޑިވަޅެއްގައެވެ. "ގުޅުން ބަދަލުކޮށްލުމަށް ކުރި މަސައްކަތްތައް ވަނީ ނާކާމިޔާބުވެފައި" ކަމަށް ބަބުޝްކިން ތަކުރާރުކޮށް ވިދާޅުވިއެވެ.
