ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމަށް ހުށަހަޅާފައިވާ ހުށަހެޅުމަށް ސިޔާސީ ލީޑަރުން ސީރިއަސްކޮށް ވިސްނެވުމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހީމް ގޮވާލައްވައިފިއެވެ. ގާސިމް ވިދާޅުވީ، ގިނަ ދުވަސްތަކެއް ވަންދެން ވައުދުވެފައިވާ އިސްލާހުތައް ގެނައުން އިތުރަށް ލަސްކުރުމުގެ ގާބިލުކަން ދިވެހިރާއްޖޭގައި ނެތް ކަމަށެވެ.
ޕީ.އެސް.އެމްގެ ޕްރޮގްރާމެއްގައި ވާހަކަދައްކަވަމުން ގާސިމް ވިދާޅުވީ، ޖުޑީޝަލް ސާވިސް ކޮމިޝަން އިސްލާހުކުރުމާއި މަޖިލީހުގެ މެންބަރުންގެ އަދަދު އިތުރުވުން ކޮންޓްރޯލްކުރުން ފަދަ ގާނޫނީ މުހިންމު ކަންކަމުގައި މީގެ ކުރީގެ ސަރުކާރުތަކުން ތަކުރާރުކޮށް ފެއިލްވެފައިވާ ކަމަށެވެ. އެމްޑީޕީ ސަރުކާރުން ޖޭއެސްސީ އިސްލާހު ކުރުމަށް ކޯލިޝަން ބައިވެރިންގެ އެހީތެރިކަމަށް އެދުނު ނަމަވެސް، އަމަލީ އެއްވެސް މަސައްކަތެއް ނުކުރާ ކަމަށް އޭނާ ވިދާޅުވިއެވެ.
މަޖިލިސް މެންބަރުންގެ އަދަދު 82 ނުވަތަ 87 ގައި ހިފެހެއްޓުމަށް އޭނާ އަމިއްލައަށް ހުށަހެޅުއްވި ނަމަވެސް، އެމްޑީޕީގެ މެޖޯރިޓީ އޮތް މަޖިލީހުން އެ އިސްލާހު ބޭރުކޮށްލާފައިވާ ކަމަށް އޭނާ ވިދާޅުވިއެވެ. "އަޅުގަނޑު ހުރީ ކޯލިޝަންގައި. އެހެން މެންބަރަކު ވެސް ދެ ފަހަރެއްގެ މަތިން އެކަން ހުށަހެޅުއްވި. ކޮންމެ ފަހަރަކު ވެސް އެމް.ޑީ.ޕީން އެކަން ބޭރުކޮށްލީ،" އޭނާ ވިދާޅުވިއެވެ.
ދެ އިންތިޚާބު އެއްކޮށްލުމާއި، މެންބަރުންގެ އަދަދު ހިފެހެއްޓުމާއި، ޖޭ.އެސް.ސީގެ ގާނޫނު އިސްލާހުކުރުން ހިމެނޭހެން ގާނޫނުއަސާސީއަށް އިސްލާހު ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ނިންމެވުމަށް މަރުހަބާ ވިދާޅުވާ ކަމަށް ގާސިމް ވިދާޅުވިއެވެ. ރައީސް ވިދާޅުވެފައިވަނީ މި ބަދަލުތައް އެކުއެކީގައި ހުށަހަޅުއްވާނެ ކަމަށެވެ.
"ދައުލަތުން އެކި ސިފައިގައި ހަރަދުކޮށްގެން އެކި ކަންކަން ކޮށްދޭނެ ކަމުގައި ބުނެގެން ވައުދުވެގެން، ސަރުކާރު ލިބޭ ފަރާތުން ކުރާހާވެސް ކަމަކީ މަޖިލީހުގެ އަޣުލަބިއްޔަތު ހޯދަން މަސައްކަތްކުރުން. އެގޮތަށް ނަތީޖާ ނިކުންނަނީ އެގޮތަށް ހަރަދުކޮށްގެން އެގޮތަށް ހުރިހާ ވަސީލަތްތަކެއް ބޭނުންކޮށްގެން. ސަރުކާރުން ރައްޔިތުންނަށް ހިދުމަތްކުރުމުގެ ބަދަލުގައި ވެރިކަމުގެ ފަރާތަށް ބޭނުންވަނީ ރައްޔިތުންގެ މަޖިލިސް ހޯދުމަށް. ދެ އިންތިހާބު އެއް ދުވަހެއްގަައި ބޭއްވުމުން އެކަމުންވެސް ސަލާމަތްވީ، ރައްޔިތުންނަށް ހިދުމަތްކުރަން ހަ މަސްދުވަސް ލިބުނީ ދޯ؟" ގާސިމް
ގާސިމް ވަކާލާތު ކުރެއްވި ގޮތުގައި އިސްލާހުތައް ލަސްނުކޮށް ތައާރަފުކުރަން ޖެހެއެވެ. ނަމަވެސް، ގެނެވޭ އިސްލާހުތަކަކީ ރައީސުލްޖުމްހޫރިއްޔާގެ ބާރުތައް ހީނަރުވާނެ ފަދަ އިސްލާހުތަކަކަށް ވެގެންނުވާނެ ކަމަށް އޭނާ ބާރުއެޅުއްވިއެވެ. "ބާރު އޮވެގެން ރަނގަޅު ކަމެއް ނުވަތަ ނުބައި ކަމެއް ވެސް ކުރެވޭނީ. ބާރެއް ނެތިއްޔާ އެއްވެސް ކަމެއް ނުކުރެވޭނެ." އޭނާ ވިދާޅުވިއެވެ.
ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމުން، ކޮންމެ ރިޔާސީ އިންތިޚާބަކަށްފަހު އަންނަ ހަ މަސް ދުވަހުގެ ސިޔާސީ ކުޅިވަރުތަކަށް ނިމުމެއް އަންނާނެ ކަމަށް އޭނާ ވިދާޅުވިއެވެ. "މިހާތަނަށް ކޮންމެ ވެރިއަކު ވެސް އިންތިޚާބުވުމަށްފަހު ފުރަތަމަ ހަ މަސް ހޭދަކުރައްވަނީ ހަމައެކަނި ސިޔާސީ މަންފާ ހޯއްދެވުމަށް. އަމާޒަކީ ރައްޔިތުންނަށް ޚިދުމަތް ކުރުމެއް ނޫން،" އޭނާ ވިދާޅުވިއެވެ.
އިންތިޚާބުތައް އެއްކޮށްލުމުން ރައްޔިތުންނަށް ސާފު ނިންމުމެއް ނިންމުމުގެ ފުރުސަތު ލިބޭނެ ކަމަށް ގާސިމް ވިދާޅުވިއެވެ. "ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހަކު ބާއްވައިފިނަމަ، ރައްޔިތުން ބޭނުންވާ ނަމަ ރައީސްކަމަށް ހޮވޭ މީހަކަށް މަޖިލިސް ވެސް ލިބޭނެ. ބޭނުން ނުވާ ނަމަ ނުލިބޭނެ. މިއީ ވަރަށް ސާދާ ކަމެއް،" އޭނާ ވިދާޅުވިއެވެ.
އާބާދީ އިތުރުވާ ނިސްބަތުން ދާއިރާތައް އޮޓޮމެޓިކުން އިތުރުވާ ގޮތަށް އޮތް އޮތުން ހުއްޓުވުމަށް ހުށަހެޅި ހުށަހެޅުން 19 ވަނަ މަޖިލީހުން ބޭރުކޮށްލުމުން އޭނާ އެކަމަށް ފާޑުވިދާޅުވިއެވެ. އޭނާ ވިދާޅުވީ މިހާރު އޮތް ނިޒާމުގެ ސަބަބުން މަޖިލިސް ބޭނުންނެތް ގޮތުގައި ބޮޑުވެ، ދައުލަތަށް މާލީ ބުރައަކަށް ވެފައިވާ ކަމަށެވެ.
މަޖިލިސް މެންބަރުންގެ އަދަދު 2009 ވަނަ އަހަރު 77 ގައި ހުރިއިރު، 2014 ގައި 85 އަށް، 2019 ގައި 87 އަށް އަދި މިހާރުގެ ދައުރުގައި ވަނީ 93 އަށް އިތުރުވެފައެވެ. ގާސިމް މީގެ ކުރިން ހުށަހެޅުއްވީ އެ އަދަދު 87 ގައި ހިފެހެއްޓުމަށެވެ. ނަމަވެސް އެ އިސްލާހު ފާހެއް ނުވިއެވެ.
އޭނާ ވިދާޅުވީ އިތުރުވާ ކޮންމެ މެންބަރަކަށް މުސާރައާއި އިނާޔަތްތަކުގެ ގޮތުގައި އަހަރަކު ގާތްގަނޑަކަށް 1 މިލިއަން ރުފިޔާ ދައުލަތުން ޚަރަދުވާ ކަމަށެވެ. "މެންބަރުންގެ އަދަދު ވަކިވަރެއްގައި ހިފެހެއްޓުމުން މާލީ ބުރަ ކުޑަވާނެ،" އޭނާ ވިދާޅުވިއެވެ.
ގާސިމް ވިދާޅުވީ ރާއްޖޭގެ ގާނޫނުތައް މިއަދުގެ ހަގީގަތްތަކާ އެއްގޮތަށް އާބާތުރަ ފިލުވަން ޖެހޭ ކަމަށެވެ. "ކޮންމެ ފަހަރަކު ވެސް ސިޔާސީ ބޭފުޅުން ރައްޔިތުންނަށް ވައުދުވަނީ ވެރިކަމަށް އައުމުން ކަންކަން އިސްލާހުކުރާނެ ކަމަށް."“ދެން އެމީހުންނަށް ނިންމުންތައް ނިންމާ ގޮނޑިއަށް އާދެވުމުން އެކަން ހަނދާން ނެތެނީ ކަމަށް ވިދާޅުވިއެވެ.
އޭނާ ވިދާޅުވީ ގައުމަށް ފައިދާ ކުރާނީ އިސްލާހީ ބަދަލުތައް އަވަސްކޮށް، އެއްގޮތަކަށް އެކަންކަން ތަންފީޒުކޮށްގެން ކަމަށެވެ.
