ހޮނިހިރު ދުވަހު ބާއްވާ ތިން އިންތިޚާބުގެ ކުރިން، ޕީއެންސީގެ އެތައް ހާސް ސަޕޯޓަރުންނާއެކު މިއަދު މެންދުރުފަހު މާލޭގެ ބޮޑެތި މަގުތަކުގައި "ރައްޔިތުންގެ ބޮޑު ހިނގާލުން" މިހާރު ފަށައިގެން ކުރިއަށް ދެއެވެ. މި ހިނގާލުމުގައި އިސްވެ ތިއްބެވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދެވެ. މި ހަރަކާތުގައި ވަޒީރުންނާއި، ސަރުކާރުގެ އިސްވެރިންނާއި، ރައްޔިތުންގެ މަޖިލީހުގެ މެންބަރުންގެ އިތުރުން ކޮންގްރެސް ޕާޓީގެ އިސް ބޭފުޅުން ބައިވެރިވެވަޑައިގެންނެވިއެވެ.
މި ހިނގާލުމަކީ ވޭތުވެދިޔަ ދެ މަސްދުވަހުގެ ކެމްޕޭނުގެ ފަހު ހަރަކާތެވެ. މިފަހަރުގެ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި އެންމެ ގިނަ ކެންޑިޑޭޓުން ކުރިމަތިލާފައިވަނީ ކޮންގްރެސް ޕާޓީންނެވެ. ޕާޓީގެ ލީޑަރުން ވަނީ، އެ ޕާޓީގެ ކެންޑިޑޭޓުންނަށް ވޯޓު ދިނުމަށާއި، ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމާ މެދު މާދަމާ ނަގާ ފެންނަ ނުފެންނަ ވޯޓުގައި "އާނ" ބަސް ބުނުމަށް ރައްޔިތުންގެ ކިބައިން އެދިވަޑައިގެންފައެވެ.
މި ހަރަކާތުގައި ވާހަކަދެއްކެވި ބޭފުޅުން ހޮނިހިރު ދުވަހަކީ ނިންމުންތަކުގެ ދުވަހެއްގެ ގޮތުގައި ސިފަކުރެއްވިއެވެ. އެއީ ކައުންސިލް އިންތިޚާބާއި، ޑަބްލިއުޑީސީ އިންތިޚާބު އަދި ފެންނަ ނުފެންނަ ވޯޓެވެ. ޤައުމީ އިންތިޚާބުތައް އެއްކޮށްލުމަކީ ސިޔާސީ ހަމަޖެހުން ޤާއިމުވެ، ދައުލަތުގެ ޚަރަދުތައް ކުޑަވެގެންދާނެ ކަމެއްގެ ގޮތުގައި ސަރުކާރުން ވަނީ ފާހަގަކޮށްފައެވެ.
ހިނގާލުން ކުރިއަށްދިޔަ މަގުތަކުގެ ދެފަރާތުގައި ގިނަ އަދަދެއްގެ ބަޔަކު ޖަމާވެފައި އޮތްއިރު، ގިނަ ބަޔަކު ތިބީ ޕާޓީގެ ދިދަތަކާއި ކޮންގްރެސް ޕާޓީގެ ކެންޑިޑޭޓުންނަށް ތާއީދުކުރާކަން ހާމަކޮށްދޭ ބެނާތައް ހިފައިގެންނެވެ. ޕާޓީގެ އިސް ބޭފުޅުން ވަނީ، އެއްވެސް ކުރިމަތިލުމަކާ ނުލައި މިހާރުވެސް ކާމިޔާބުވެފައިވާ ގޮނޑިތަކަށް އިޝާރާތްކުރައްވައި، މިއީ އިންތިޚާބު ކާމިޔާބުވާނެ ކަމުގެ ވަރުގަދަ ހެއްކެއްގެ ގޮތުގައި ސިފަކުރައްވާފައެވެ.
މިއަދު ހަވީރު 6 ޖަހާއިރު ކެމްޕޭންގެ ހަރަކާތްތައް ނިމުމަކަށް އަންނާނެއެވެ. މިހާރު އެންމެންގެ ސަމާލުކަން ހުރީ ހޮނިހިރު ދުވަހުގެ ވޯޓަށެވެ. ޕީއެންސީ އޮފިޝަލުން ލަފާކުރާ ގޮތުގައި ރަށްރަށުގައި ވޯޓުލާން ނުކުންނަ މީހުންގެ އަދަދު އިތުރުވާނެއެވެ. ޕީއެންސީން ވޭތުވެދިޔަ ދެ މަސްދުވަހު ވަނީ ރާއްޖޭގެ ހުރިހައި އަތޮޅަކާއި ރަށެއްގައި ވަރުގަދަ ކެމްޕޭނެއް ކޮށްފައެވެ.
