ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ ބައި-އިލެކްޝަންގައި ތ. ގުރައިދޫގެ ހުރިހާ ގޮނޑިއެއް ސަރުކާރު ހިންގާ ޕީއެންސީން ކާމިޔާބުކޮށް، އެ ރަށުގެ ސައްތައިންސައްތަ ތާއީދު ސަރުކާރަށް އޮތްކަން ހާމަކޮށްފިއެވެ. މި އިންތިޚާބުގައި ގުރައިދޫގެ 10 ގޮނޑިވެސް ކާމިޔާބުކުރީ ކޮންގްރެސް ޕާޓީގެ ކެންޑިޑޭޓުންނެވެ.
ގުރައިދޫ ކައުންސިލްގެ ރައީސް ކަމަށް އިންތިޚާބުވީ ކޮންގްރެސް ޕާޓީގެ ކެންޑިޑޭޓް ތަޢުފީޤް އަލީ އެވެ.
އޭނާ މި ގޮނޑި ކާމިޔާބުކުރީ 668 ވޯޓް ހޯދައިގެންނެވެ.
އޭނާއާ ވާދަކުރި އަމިއްލަ ކެންޑިޑޭޓް މުޙައްމަދު ޒަޢީމްއަށް ލިބުނީ 529 ވޯޓެވެ.
މީގެ އިތުރުން، ކައުންސިލްގެ މެންބަރުކަމުގެ ދެ ގޮނޑިވެސް ކާމިޔާބުކުރީ ކޮންގްރެސްގެ ކެންޑިޑޭޓުންނެވެ.
އެއީ 695 ވޯޓް ހޯދި އަބްދުالله ޔަޝައު އާއި 687 ވޯޓް ހޯދި ޝަމީމް އިބްރާހިމެވެ. މި ގޮނޑިތަކަށް ވާދަކުރި އެމްޑީޕީގެ ކެންޑިޑޭޓަށް ލިބުނީ 380 ވޯޓެވެ.
ކައުންސިލްގައި އަންހެނުންނަށް ޚާއްސަ ކުރެވިފައިވާ ދެ ގޮނޑިވެސް ކާމިޔާބުކުރީ ކޮންގްރެސްގެ ކެންޑިޑޭޓުންނެވެ.
އެގޮތުން އައިޝަތު ފަރީނާ 806 ވޯޓާއެކު އިންތިޚާބުވިއިރު، ފާތިމަތު ފަތޯނާ ވަނީ 670 ވޯޓް ހޯދާފައެވެ.
މި ގޮނޑިތަކަށް ވާދަކުރި އަމިއްލަ ކެންޑިޑޭޓަށް ލިބުނީ 555 ވޯޓެވެ.
މީގެ އިތުރުން، އަންހެނުންގެ ތަރައްޤީއަށް މަސައްކަތް ކުރާ ކޮމެޓީ (ޑަބްލިއުޑީސީ) ގެ ރައީސާގެ ގޮނޑި ހިމެނޭހެން ފަސް ގޮނޑިވެސް ކާމިޔާބުކުރީ ކޮންގްރެސް ޕާޓީންނެވެ.
ތ. ގުރައިދޫއަކީ އަބަދުވެސް ސަރުކާރު ހިންގާ ކޮންގްރެސް ޕާޓީއަށް ބޮޑު ތާއީދެއް އޮންނަ ރަށެކެވެ.
އެންމެ ފަހުން ބޭއްވުނު ރިޔާސީ އިންތިޚާބުގައި ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް އެންމެ ބޮޑު އަޣްލަބިއްޔަތެއް ލިބުނު އެއް ރަށަކީ ގުރައިދޫއެވެ.
އަދި އޭގެ ފަހުން ބޭއްވި ރައްޔިތުންގެ މަޖިލީހުގެ އިންތިޚާބުގައި ވެސް އެ ރަށުގެ ރައްޔިތުން ވަނީ ކޮންގްރެސް ޕާޓީގެ ކެންޑިޑޭޓް އިންތިޚާބުކޮށްފައެވެ.
