ބަންގްލަދޭޝްގެ ނޭޝަނަލް ހިއުމަން ރައިޓްސް ކޮމިޝަން (އެންއެޗްއާރުސީ) ގެ ފަސް މެންބަރުން ވެސް އިސްތިއުފާ ދެއްވައިފިއެވެ. މި މެންބަރުން އިސްތިއުފާ ދެއްވީ އައު ސަރުކާރުން އެ ކޮމިޝަނަށް ދީފައިވާ ގާނޫނީ ބާރުތައް އައުކޮށްދިނުމަށް ނުކުޅެދިފައިވާ ކަމަށް ބުނެ އެކަމާ ދެކޮޅަށް އިހުތިޖާޖު ކުރުމުގެ ގޮތުންނެވެ. ފެބްރުއަރީ މަހުގެ އިންތިޚާބު ކާމިޔާބު ކުރި ބަންގްލަދޭޝް ނޭޝަނަލް ޕާޓީ (ބީއެންޕީ) އިން މިހާތަނަށް އިންސާނީ ހައްގުތަކާ ގުޅޭ މުހިންމު ބިލްތައް މަޖިލީހަށް ހުށަހަޅާފައެއް ނުވެއެވެ.
އިސްތިއުފާ ދެއްވި މެންބަރުން ވިދާޅުވި ގޮތުގައި، އެ ބޭފުޅުން އައްޔަން ކުރެވުނީ ނޯބެލް އިނާމު ހާސިލްކުރައްވާފައިވާ މުހައްމަދު ޔޫނުސްގެ ވަގުތީ ސަރުކާރުން ނެރުއްވި 2025 ގެ ގަރާރުގެ ދަށުންނެވެ. އެ ގަރާރުގެ ދަށުން ސަލާމަތީ ބާރުތަކާ ގުޅޭ މައްސަލަތައް ތަހުގީގު ކުރުމުގެ ބާރު ކޮމިޝަނަށް ލިބިގެންވެއެވެ. ނަމަވެސް އައު މަޖިލީހުން އެ ގަރާރު ފާސްނުކުރުމުން، ކޮމިޝަން މިހާރު ހިންގަން ޖެހިފައިވަނީ ބާރުތައް ކުޑަ 2009 ވަނަ އަހަރުގެ ގާނޫނުގެ ދަށުންނެވެ.
ކޮމިޝަންގެ މެންބަރު ނޫރު ޚާން ވިދާޅުވީ، ސަރުކާރުން އެ ބޭފުޅުން އިސްތިއުފާ ދެއްވުމަށް އެދިފައި ނުވި ނަމަވެސް، ކޮމިޝަނަށް ބާރުދޭ ގާނޫނު ފާސްނުކުރުމަކީ އަނިޔާ ލިބޭ ފަރާތްތަކަށް އޮތް ބޮޑު ނުތަނަވަސްކަމެއް ކަމަށެވެ. އަދި ސަލާމަތީ ބާރުތަކުން ހިންގާ ގާނޫނާ ޚިލާފު މީހުން މެރުންތަކާއި މީހުން ގެއްލުވާލުން ފަދަ ސީރިއަސް މައްސަލަތައް ތަހުގީގު ކުރުމުގެ ބާރު ކޮމިޝަނަށް މިހާރު ގެއްލިފައިވާ ކަމަށް އޭނާ އިންޒާރު ދެއްވިއެވެ.
އިސްތިއުފާ ދެއްވި މެންބަރުން ނެރުއްވި ހުޅުވާލެވިފައިވާ ސިޓީއެއްގައި ބުނެފައިވަނީ، އެ ބޭފުޅުންގެ ނިންމުމަކީ އަމިއްލަ މަސްލަހަތަށްވުރެ ބޮޑަށް އަނިޔާ ލިބިފައިވާ ފަރާތްތަކުގެ ހައްގުގައި ނިންމި ނިންމުމެއް ކަމަށެވެ. ކުރީގެ ބާރު ނެތް ގާނޫނީ އޮނިގަނޑެއްގެ ތެރެއިން ކޮމިޝަނަށް އެދެވޭ ގޮތެއްގައި މަސައްކަތް ނުކުރެވޭނެ ކަމަށް އެ ބޭފުޅުން ވަނީ ފާހަގަކުރައްވާފައެވެ.
މި މައްސަލައިގެ ސިޔާސީ ފަސްމަންޒަރަށް ބަލާއިރު، މިއީ 2024 ވަނަ އަހަރުގެ ދަރިވަރުންގެ މުޒާހަރާތަކަށްފަހު ބޭއްވި ފުރަތަމަ އިންތިޚާބެވެ. މުހައްމަދު ޔޫނުސްގެ ވަގުތީ ސަރުކާރުން ވަނީ ދައުލަތުގެ އަނިޔާވެރިކަން ހުއްޓުވުމަށް ގިނަ އިސްލާހުތަކެއް ތައާރަފުކޮށްފައެވެ. ބީއެންޕީ ސަރުކާރުން ބުނެފައިވަނީ އެ ގަރާރުތައް އަލުން މަޖިލީހަށް ހުށަހެޅުމުގެ ކުރިން މުރާޖައާ ކުރަން ޖެހޭ ކަމަށެވެ.
ހޯމް މިނިސްޓަރު ސަލާހުއްދީން އަހުމަދާއި ލޯ މިނިސްޓަރު އަސަދުއްޒަމާން ވިދާޅުވީ، ސަރުކާރުގެ މަގްސަދަކީ ގާނޫނީ ފުށުއެރުންތައް ނައްތާލައި، މިހާރަށްވުރެ ޒަމާނީ އަދި އިންސާފުވެރި އޮނިގަނޑެއް ތައާރަފު ކުރުން ކަމަށެވެ. ނަމަވެސް، އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ދެކޭ ގޮތުގައި 2009 ވަނަ އަހަރުގެ ގާނޫނަށް ރުޖޫއަވުމަކީ ކޮމިޝަންގެ މިނިވަންކަން ގެއްލިގެންދާނެ ކަމެކެވެ.
