ސަރުކާރުން ކުރިއަށްގެންދާ "މޯލްޑިވްސް 2.0″ ޑިޖިޓަލް ޓްރާންސްފޯމޭޝަން ޕްރޮގްރާމް ނިމުމުން، ރާއްޖޭގެ ކަނޑު އުޅަނދުފަހަރަށް އަރާ އަދި ފައިބާ ބިދޭސީން މޮނިޓަރ ކުރެވޭނެ ނިޒާމެއް ތައާރަފުކުރާނެ ކަމަށް ދާޚިލީ ސަލާމަތާއި މަސައްކަތްތެރިކަމާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.
ދައުލަތުގެ މީޑިއާގައި ވާހަކަދައްކަވަމުން ވަޒީރު އިޙްސާން ވިދާޅުވީ، ރާއްޖޭގެ ކަނޑުދަތުރުފަތުރުގެ ނިޒާމުގެ ތެރެއިން ބިދޭސީންގެ ހަރަކާތްތައް ދެނެގަތުމަކީ މިހާތަނަށް ކުރިމަތިވެފައިވާ ބޮޑު ގޮންޖެހުމެއް ކަމަށެވެ. އަލަށް ގާއިމުކުރާ ނިޒާމުގެ ސަބަބުން ކޮންމެ ބަނދަރަކުން އުޅަނދަށް އަރާ އަދި ފައިބާ ބިދޭސީން ދެނެގަނެވޭނެ ކަމަށާއި، މީގެ ސަބަބުން ގަވާއިދާ ޚިލާފަށް އުޅޭ ބިދޭސީން އެއް ރަށުން އަނެއް ރަށަށް ދަތުރުކުރުން ހުއްޓުވޭނެ ކަމަށް ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، "އޮޕަރޭޝަން ކުރަނގި" ގެ ތިންވަނަ ފިޔަވަހީގެ މުއްދަތު ހަމަވުމުގެ ކުރިން، މިއަހަރުގެ ނޮވެމްބަރު 17 ގެ ނިޔަލަށް ގަވާއިދާ ޚިލާފަށް އުޅޭ ހުރިހާ ބިދޭސީން ރާއްޖެއިން ފޮނުވާލުމަކީ ސަރުކާރުގެ އަމާޒެއް ކަމަށެވެ. އަދި މި އޮޕަރޭޝަންގެ ދަށުން ރަޖިސްޓްރީވެފައިވާ ބިދޭސީން ގަވާއިދުގެ ތެރެއަށް ފެއްތުމުގެ މަސައްކަތް މިހާރުވެސް ކުރިއަށްދާ ކަމަށް އޭނާ ވިދާޅުވިއެވެ.
"މި ސަރުކާރުގެ ދައުރު ނިމޭއިރު، ބިދޭސީ މަސައްކަތްތެރިންނަށް ކަންތައްތައް ބެހެއްޓުމުގައި ބައިނަލްއަގުވާމީ ގޮތުން އެންމެ ނަމޫނާ އެއް ގައުމަށް ރާއްޖެ ވެގެންދާނެ،" ވަޒީރު އިޙްސާން ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "މޯލްޑިވްސް 2.0″ އެޖެންޑާއަކީ ޑިޖިޓަލް އައިޑެންޓިޓީ، ސައިބަރ ސެކިއުރިޓީ އަދި އާންމު ޚިދުމަތްތައް ހިމެނޭހެން 8 ދާއިރާއަކަށް ބަހާލައިގެން ކުރިއަށްގެންދާ މަޝްރޫއެކެވެ. ބިދޭސީން މޮނިޓަރ ކުރާ ނިޒާމު ހިމެނިގެންދާނީ މި ޕްރޮގްރާމްގެ ޑިޖިޓަލް އައިޑެންޓިޓީ އަދި ޑޭޓާ ހިއްސާކުރުމުގެ އޮނިގަނޑުގެ ތެރޭގައެވެ.
ރާއްޖޭގައި ގާތްގަނޑަކަށް 200,000 ބިދޭސީން އުޅޭއިރު، އޭގެ ތެރެއިން ގިނަ ބަޔަކީ ގަވާއިދާ ޚިލާފަށް މަސައްކަތްކުރާ މީހުންނެވެ. 1,000 އަށްވުރެ ގިނަ ރަށްތަކުގެ މައްޗަށް އެކުލެވޭ ރާއްޖޭގައި ކަނޑުމަގުން ކުރާ ދަތުރުތައް މޮނިޓަރ ކުރެވޭނެ ހަރުދަނާ ނިޒާމެއް ގާއިމުވުމަކީ ބިދޭސީންގެ މައްސަލަ ހައްލުކުރުމަށް އެޅޭ މުހިންމު ފިޔަވަޅަކަށް ވެގެންދާނެއެވެ.
