މައްކާ ސިޓީ އަދި މުޤައްދަސް ބިންތަކާ ބެހޭ ރޯޔަލް ކޮމިޝަނުން "ޑިވެލޮޕްޑް ޑިސްޓްރިކްޓްސް ޕްރޮގްރާމް" ގެ ދަށުން ބޮޑު މަޝްރޫޢެއް އިޢުލާނުކޮށްފިއެވެ. މި މަޝްރޫޢުގެ ދަށުން އެ ކޮމިޝަނުން ވަނީ މައްކާގެ 6 ސަރަޙައްދެއް ތަރައްޤީކުރުމުގެ މަސައްކަތް ބަޔަކާ ޙަވާލުކޮށްފައެވެ. ޖުމްލަ 2.7 މިލިއަނަށްވުރެ ގިނަ އަކަމީޓަރުގެ ސަރަޙައްދަކަށް ފެތުރިފައިވާ މި މަޝްރޫޢުތަކުގެ ޖުމްލަ އިންވެސްޓްމަންޓްގެ އަގު 13.3 ބިލިއަން ސައޫދީ ރިޔާލަށް އަރައެވެ.
މި އިސްނެގުމަކީ މައްކާގެ ޢުމްރާނީ މާޙައުލު ކުރިއެރުވުމަށާއި، އިޤްޠިޞާދީ ދުވެލި ވަރުގަދަކުރުމަށާއި، ރައްޔިތުންގެ ދިރިއުޅުމުގެ ފެންވަރު މަތިކުރުމަށް ކޮމިޝަނުން ކުރާ މަސައްކަތްތަކުގެ ބައެކެވެ. މީގެ އިތުރުން މައްކާގައި ދެމެހެއްޓެނިވި ތަރައްޤީ ކުރިއެރުވުމަކީވެސް މި މަޝްރޫޢުގެ މައިގަނޑު އަމާޒެކެވެ.
ކޮމިޝަނުން ހާމަކުރި ގޮތުގައި، އަލަށް ޙަވާލުކުރި 6 ސަރަޙައްދު ހިމެނެނީ ތިރީގައިވާ އަވަށްތަކުގައެވެ:
-
ޖުރުހުމް ސައުތު
-
އަލްޚާލިދިއްޔާ
-
އަލްޙަޖްލަހް
-
އަލްހިންދާވިއްޔާ އީސްޓް
-
އަލްހިންދާވިއްޔާ ސައުތު
-
އަލްހިންދާވިއްޔާ ވެސްޓް
މި މަޝްރޫޢުތައް ކުރިއަށްގެންދާނީ ރިއަލް އެސްޓޭޓް ތަރައްޤީކުރާ ކުންފުނިތަކާއި، އިންވެސްޓްމަންޓް ކުންފުނިތަކުގެ އިތުރުން އިންވެސްޓްމަންޓް ފަންޑުތަކާ ގުޅިގެންނެވެ. މިއީ ދެމެހެއްޓެނިވި އިޤްޠިޞާދީ އަދި ތަރައްޤީގެ ފައިދާ މުޖުތަމަޢަށް ފޯރުކޮށްދިނުމަށްޓަކައި، ޤާނޫނީ އަދި ޢުމްރާނީ ބާރުތައް އެއްބާރުލުންދީގެން ހިންގާ ނަމޫނާ މަސައްކަތެކެވެ.
ކޮމިޝަނުން އިތުރަށް ބުނި ގޮތުގައި، މި މަޝްރޫޢުތަކުގެ އެހީގައި މައްކާގެ ބިމުގެ ބޭނުން އެންމެ ފުރިހަމަ ގޮތުގައި ހިފާނެއެވެ. އަދި އެ ސަރަޙައްދުތަކުގެ އަސާސީ އިންފްރާސްޓްރަކްޗަރާއި އާންމު ޚިދުމަތްތަކުގެ ފެންވަރު މަތިކޮށް، މިހާރު ހުރި ޢުމްރާނީ ގޮންޖެހުންތަކަށް ޙައްލު ހޯދައިދޭނެއެވެ. މިއާއެކު އިންވެސްޓަރުންނާއި ތަރައްޤީގެ މަސައްކަތްތަކަށް މައްކާއަކީ އިތުރަށް ޝައުޤުވެރި މަންޒިލަކަށް ހެދުމަށް މަގުފަހިވާނެއެވެ.
