މި އަހަރުގެ ފުރަތަމަ ހަތަރު މަސް ދުވަހުގެ ތެރޭގައި ޖޫރިމަނާ ފައިސާގެ ގޮތުގައި ދައުލަތަށް 38 މިލިއަން ރުފިޔާ ލިބިއްޖެއެވެ. ދައުލަތުގެ ޓެކްސް އިދާރާ (މީރާ) ގެ ތަފާސްހިސާބުތައް ދައްކާ ގޮތުން، މިއީ މިދިޔަ އަހަރުގެ މި މުއްދަތާ އަޅާބަލާއިރު 40 ޕަސެންޓް އިތުރު އަދަދެކެވެ. މިދިޔަ އަހަރުގެ ފުރަތަމަ ހަތަރު މަހު ޖޫރިމަނާގެ ގޮތުގައި ދައުލަތަށް ލިބުނީ 27 މިލިއަން ރުފިޔާއެވެ.
މި އަހަރުގެ ފުރަތަމަ ހަތަރު މަހުގެ ތެރެއިން ޖޫރިމަނާގެ ގޮތުގައި އެންމެ ބޮޑު އާމްދަނީއެއް ވަދެފައިވަނީ އޭޕްރީލް މަހުއެވެ.
- އޭޕްރީލް މަހުގެ ޖޫރިމަނާ: 20 މިލިއަން ރުފިޔާ (މިއީ ހަތަރު މަހުގެ ޖުމްލަ އާމްދަނީގެ ދެބައިކުޅައެއްބަޔަށްވުރެ ގިނަ އަދަދެކެވެ).
- އޭޕްރީލް މަހުގެ ޖުމްލަ އާމްދަނީ: އޭޕްރީލް މަހުގެ ނިޔަލަށް މީރާއަށް 14 މިލިއަން ރުފިޔާގެ ސީދާ އާމްދަނީއެއް ލިބުނުއިރު، އޭގެ ތެރެއިން ޑޮލަރުން ލިބުނީ 660,000 ޑޮލަރެވެ.
މިއަހަރުގެ ފުރަތަމަ ހަތަރު މަހު ދައުލަތަށް ވަތް ޖުމްލަ އާމްދަނީ ވަނީ މިދިޔަ އަހަރުގެ އެ މުއްދަތަށްވުރެ ދެ ބިލިއަން ރުފިޔާ އިތުރުވެފައެވެ.
ޓޫރިޒަމް ދަށްވުމުން ޖުމްލަ އާމްދަނީއަށް އަސަރުކޮށްފި
ޖޫރިމަނާގެ އާމްދަނީ އިތުރުވީ ނަމަވެސް، މިދިޔަ އޭޕްރީލް މަހު ދައުލަތަށް ލިބުނު ޖުމްލަ އާމްދަނީ ވަނީ އޭގެ ކުރީ އަހަރުގެ އޭޕްރީލް މަހާ އަޅާބަލާއިރު ދަށްވެފައެވެ.
މީރާއިން ފާހަގަކުރި ގޮތުގައި މީގެ އެންމެ ބޮޑު ސަބަބަކީ ޓޫރިޒަމް ދާއިރާއިން ލިބޭ ޓީޖީއެސްޓީ ދަށްވުމެވެ. މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ރާއްޖެއަށް ޓޫރިސްޓުން އަންނަ މިންވަރު މަދުވެ، ވޭތުވެދިޔަ ދެ މަސްދުވަހުގެ ތެރޭގައި ރާއްޖޭގެ ޓޫރިޒަމް ދާއިރާއަށް ވަނީ ބޮޑު ގެއްލުމަކާ ކުރިމަތިލާން ޖެހިފައެވެ.
