މާލޭގައި ދިވެހި ބޭސްވެރިކަމަށް ބޭނުންވާ ފަތްޕިލާވެލި ލިބުން ދަތިވެފައިވާތީ، ސިޓީ ކައުންސިލުގެ ބެލުމުގެ ދަށުން މާލޭގެ ހުސްބިންތަކުގައި އެފަދަ ގަސްތައް އިންދައި ބެލެހެއްޓުމަށް މާލެ ސިޓީ ކައުންސިލުން މިއަދު އިއްތިފާޤުން ފާސްކޮށްފިއެވެ. މިއަދުގެ ޖަލްސާގައި މި ނިންމުން ނިންމާފައިވަނީ، ގަބުރުސްތާނުތަކުގައި ގަސް އިންދުމާ މެދު ކައުންސިލަރުންގެ މެދުގައި ބޮޑެތި ޚިޔާލުތަފާތުވުންތަކެއް އުފެދުމަށްފަހުއެވެ.
މާލޭގެ މޭޔަރު އާދަމް އާޒިމް ފުރަތަމަ ހުށަހެޅުއްވީ ޖާގަ އޮތް ގަލޮޅު ސަހަރާ ފަދަ ގަބުރުސްތާނުތަކުގެ ހުސް ތަންތަނުގައި މި ގަސްތައް އިންދުމަށެވެ. މޭޔަރު ވިދާޅުވީ ދިވެހި ބޭސްކުރާ މީހުންނަށް ފަތްޕިލާވެލި ނުލިބޭތީ ކަންބޮޑުވުން ފާޅުކުރަމުންދާ ކަމަށާއި، ދީނީގޮތުން ބެލިއިރުވެސް ސަހަރާގައި ގަސް އިންދުމުގެ އެއްވެސް ހުރަހެއް ނެތް ކަމަށެވެ.
ނަމަވެސް، މީހުން ވަޅުލާ ސަހަރާތަކުގައި ބެލެހެއްޓުމެއް ނެތި މިފަދަ ގަސްތައް އިންދުމާ މެދު ބައެއް ކައުންސިލަރުން ވަރަށް ބޮޑަށް ދެކޮޅު ހެއްދެވިއެވެ. ކައުންސިލަރުން ފާހަގަކުރެއްވި ކަންބޮޑުވުންތަކަކީ:
-
އަމިއްލަކުރުން: ވަކި ނިޒާމެއް ނެތި ދޫކޮށްލައިފި ނަމަ، ބައެއް މީހުން އެ ގަސްތައް އަމިއްލަކޮށް، ޢާންމުންނަށް އޭގެ ފައިދާ ނުލިބި ހިނގައިދާނެއެވެ.
-
ބިދޭސީންގެ ވިޔަފާރި: މިހާރުވެސް ބައެއް ބިދޭސީން ގަސްތައް އުފުރައިގެން ވިޔަފާރިކުރަމުންދާއިރު، ބެލެހެއްޓުމެއް ނެތްނަމަ ދިވެހިންނަށް އޭގެ އެއްވެސް މަންފާއެއް ނުލިބޭނެއެވެ.
-
ތަނުގެ ޙުރުމަތް: މީހުން ވަޅުލާފައިވާ ގަބުރުސްތާނެއްގައި އެފަދަ ގަސްތައް އިންދައި ހެދުމަކީ އެންމެ އެކަށީގެންވާ ކަމެއް ނޫނެވެ.
މި ޚިޔާލުތަފާތުވުންތަކާ ގުޅިގެން، ކައުންސިލަރުން އެންމެ ފަހުން އެއްބަސްވީ ސަހަރާ ނޫން އެހެން ހުސްބިންތައް މިކަމަށް ހޯދުމަށެވެ. އަދި އެ ގަސްތަކަކީ މާލޭ ސިޓީ ކައުންސިލުން ޚާއްޞަ ސަމާލުކަމެއް ދީގެން ބަލަހައްޓާ، އެންމެހައި ރައްޔިތުންނަށް ހަމަހަމަކަމާއެކު ބޭނުންކުރެވޭނެ ފަދަ އިންތިޒާމެއްގެ ދަށުން ހެދޭ ގަސްތަކަކަށް ހެދުމަށް ވަނީ ނިންމާފައެވެ.
