ތުރުކީވިލާތުގެ ވެރިރަށް އަންކާރާގައި ޖުލައި 7 އަދި 8 ގައި ބޭއްވުމަށް ހަމަޖެހިފައިވާ ނޭޓޯ ސަމިޓުގެ ކުރިން، ޓެރަރިޒަމާ ދެކޮޅަށް ހިންގި ޚާއްސަ އޮޕަރޭޝަންތަކެއްގައި 100 އަށް ވުރެ ގިނަ މީހުން ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށް އެންޓީވީ ޗެނަލުން ރިޕޯޓުކޮށްފިއެވެ.
އަންކާރާގެ ޕްރޮސެކިއުޓަރ އޮފީހުން ކުރިން ނެރުނު އަމުރެއްގެ ދަށުން ޓެރަރިސްޓް ޖަމާއަތްތަކާ ގުޅުން ހުރި ކަމަށް ތުހުމަތުކުރެވޭ 200 އަށް ވުރެ ގިނަ މީހުން ހިފަހައްޓާފައިވާ ކަމަށް ކުރިން ރިޕޯޓުތައް ބުނެފައިވެއެވެ. މީޑިއާ ވެބްސައިޓުގައިވާ ގޮތުން، ޕްރޮސެކިއުޓަރުގެ އެދުމުގެ މަތިން 129 މީހަކު ޝަރީއަތަށް ހާޒިރުކުރިއެވެ. އޭގެ ތެރެއިން 103 މީހަކު ބަންދުކޮށް، 23 މީހަކު ވަނީ ގޭބަންދުކޮށްފައެވެ. މި ހައްޔަރު ކުރެވުނު މީހުންގެ ތެރޭގައި ބައެއް ނޫސްވެރިންނާއި އާންމު ފަރާތްތައް ހިމެނެއެވެ.
ނޭޓޯ ސަމިޓާ ގުޅިގެން އަންކާރާގެ ސަލާމަތީ ފިޔަވަޅުތައް ވަނީ ވަރަށް ބޮޑަށް ވަރުގަދަކޮށްފައެވެ. މި ސަމިޓުގެ ކަންކަން ބެލެހެއްޓުމަށް ތުރުކީގެ 70،000 ސަލާމަތީ ފަރާތްތައް ހަރަކާތްތެރިވާނެއެވެ. އަދި ސަމިޓު ކުރިއަށްދާ ދުވަސްވަރު ވެރިރަށުގެ މައިގަނޑު ބައެއް މަގުތައް އާންމު ދަތުރުފަތުރަށް ބަންދުކުރުމަށް ވަނީ ނިންމާފައެވެ.
