ޓިބެޓާ އިންވެގެން އޮންނަ ނޭޕާލްގެ އުތުރު ބޯޑަރު ސަރަހައްދުގައި ދިރިއުޅޭ ރައްޔިތުން ޒަމާނުއްސުރެ ކުރަމުން އައި ސަގާފީ ވިޔަފާރިއާއި، ޖަނަވާރު ހިއްގުމާއި، އަދި އަޅުކަމުގެ ދަތުރުތަކަށް ޗައިނާ ސަރުކާރުން ހުރަސްއަޅަމުންދާތީ އެ ސަރަހައްދުގެ ރައްޔިތުންގެ މެދުގައި ނުރުހުން ވަރަށް ބޮޑަށް އިތުރުވެއްޖެއެވެ.
ނޭޕާލްގެ ސަލާމަތީ ބާރުތަކުން ނޭޕާލް-ޓިބެޓް ބޯޑަރުގެ "އުރާއީ ޕާސް" ސަރަހައްދުގައި ހިންގި ޚާއްސަ ޕެޓްރޯލް ދަތުރަކަށްފަހު އެކުލަވާލި ރިޕޯޓެއްގައިވާ ގޮތުން، ކޮވިޑް-19 ގެ ބަލިމަޑުކަމަށްފަހު 2020 ވަނަ އަހަރުން ފެށިގެން ޗައިނާއިން އެޅި ހަރުކަށި ފިޔަވަޅުތަކަށް އެއްވެސް ލުޔެއް ދީފައެއް ނުވެއެވެ.
ނޭޕާލްގެ ސިފައިންނާއި ހަތިޔާރު އެޅި ފުލުހުންގެ ޓީމަކުން ބާޖަންގް ޑިސްޓްރިކްޓްގެ ބޯޑަރު ސަރަހައްދު ބެލުމަށްފަހު ހާމަކުރި ގޮތުގައި، ޒަމާނުއްސުރެ ލޮނާއި، ކަންބަޅި އަދި ގޮދަން ބަދަލުކުރުމަށް ބޭނުންކުރި މުހިންމު ވިޔަފާރި މަގުތައް ޗައިނާއިން ވަނީ ބަންދުކޮށްފައެވެ.
މީގެ އިތުރުން، ބޯޑަރު ސަރަހައްދުގެ ހުއިހައްޕާ މީހުން ވާރޭ މޫސުމުގައި އެމީހުންގެ ކަންބަޅި، ބަކަރި އަދި ޔާކް ފަދަ ޖަނަވާރުތައް ޓިބެޓްގެ ވިނގަނޑުތަކަށް ގެންދިއުމުން ޗައިނާގެ ސަލާމަތީ ބާރުތަކުން ގޯނާކޮށް ހުރަސްއަޅާތީ، އެ މަސައްކަތް ވެސް މިހާރު ވަނީ ހުއްޓިފައެވެ. އަދި ހިންދޫންގެ މުގައްދަސް ބިމެއް ކަމަށްވާ ޓިބެޓްގެ މަންސަރޯވަރު ކޯރުން ފެން ނެގުމަށް ކުރާ އަޅުކަމުގެ ދަތުރުތައް ހުއްޓުމަކަށް އައުމުން، ކާބަފައިންގެ ދީނީ ރަސްމިއްޔާތުތައް ނުބޭއްވި، އާންމުންގެ ދީނީ ޝުއޫރުތަކަށް ވަނީ ބޮޑު އަސަރެއް ކޮށްފައެވެ.
ނޭޕާލާއި ޗައިނާއާ ދެމެދު ވެވިފައިވާ ބައިނަލްއަގުވާމީ އެއްބަސްވުންތަކުގައި ބޯޑަރު ސަރަހައްދުގެ ރައްޔިތުންނަށް މިފަދަ ސަގާފީ ހަރަކާތްތައް ހިންގުމުގެ ހައްގު ލިބިދީފައި އޮތް ނަމަވެސް، ޗައިނާއިން އެއްބަސްވުންތަކާ ޚިލާފުވަމުންދާ ކަމަށް އެ ސަރަހައްދުގެ އިސްވެރިޔާ މުކޭޝް ކުމާރު ކޭޝަރީ ވިދާޅުވިއެވެ.
ދެ ގައުމުގެ މެދުގައި ރަސްމީ ދާއިމީ މަޝްވަރާތަކެއް ނުބޭއްވޭތީ މި މައްސަލައަށް ހައްލެއް ލިބިފައިނުވާއިރު، ނޭޕާލްގެ ޗައިނާއަށް ތާއީދުކުރާ ސިޔާސީ ވެރިން ޗައިނާގެ މަސްލަހަތު ހިމާޔަތްކުރަން އަވަސްވެގަންނަ ވަރަށް، އަމިއްލަ ގައުމުގެ ރައްޔިތުންނަށް ލިބެމުންދާ އަނިޔާތަކާ މެދު އަޅާނުލާ ކަމަށް ބުނެ އާންމުން ދަނީ ކަންބޮޑުވުން ފާޅުކުރަމުންނެވެ.
