Pދިއްލީގައި ކުރިއަށްދާ ދަރިވަރުންގެ އިހުތިޖާޖުތަކުގެ ތެރެއިން، މަރުކަޒީ ސަރުކާރާއެކު ބޭއްވި ދެވަނަ މަތީ ފެންވަރުގެ ބައްދަލުވުމުގެ ތެރެއިން، ކޮކްރޯޗް ޖަންތާ ޕާޓީ (ސީޖޭޕީ) ގެ ތަރުޖަމާނުން ކަމަށްވާ އަޝުތޯޝް ރަންކާ އަދި ސޯރަވް ދާސް، މިއަދު ހުކުރު ދުވަހު ބީޖޭޕީގެ ވަޒީރުން ކަމަށްވާ ޖޭޕީ ނައްޑާ އަދި ޖިތެންދުރާ ސިންގްއާ ބައްދަލުކުރައްވައިފިއެވެ. ބައްދަލުވުމަށްފަހު މީޑިއާއަށް މައުލޫމާތު ދެއްވަމުން ރަންކާ ވިދާޅުވީ، ސަރުކާރުން "އުސޫލީ ގޮތުން" ދެ ކަމަކަށް އެއްބަސްވެފައިވާ ކަމަށާއި، ވަޒީރު ދަރުމެންދުރާ ޕްރަދާން ގެ އިސްތިއުފާއަށް އެދިފައިވާ މައްސަލައިގައި ޖަވާބެއް ދިނުމަށް މާދަމާއާ ހަމައަށް ސަރުކާރުން ވަގުތު ހޯދާފައިވާ ކަމަށެވެ.
މިއީ ތައުލީމީ އިސްލާހުތަކަށް އެދިއާއި، ނީޓް-ޔޫޖީ އިމްތިހާނު ކަރުދާސް ލީކުވި މައްސަލައިގައި ޕްރަދާންގެ އިސްތިއުފާއަށް އެދި ބޮޑު އިހުތިޖާޖެއް ކުރިއަށްގެންދާ ސީޖޭޕީއާއި ސަރުކާރާ ދެމެދު ބޭއްވުނު ދެވަނަ ބައްދަލުވުމެވެ.
"ދަރުމެންދުރާ ޕްރަދާން އިސްތިއުފާ ދެއްވަންޖެހޭ، ނޫންނަމަ އޭނާ މަގާމުން ވަކިކުރަންޖެހޭ. މިކަމާ ގުޅޭގޮތުން ތަފްސީލުކޮށް ސަރުކާރާއެކު ވާހަކަދެއްކިން. މި އެދުމަށް ޖަވާބެއް ދިނުމަށް ސަރުކާރުން ވަނީ މާދަމާ މެންދުރުފަހާ ހަމައަށް ވަގުތު ހޯދާފައި،" ނޫސްވެރިންނަށް މައުލޫމާތު ދެއްވަމުން ރަންކާ ވިދާޅުވިއެވެ. އަދި ޕްރަދާން މަގާމުން ވަކިކުރުން ލަސްވާ ވަރަކަށް އިހުތިޖާޖުތައް ބޮޑުވެގެންދާނެ ކަމަށް އޭނާ އިންޒާރު ކުރެއްވިއެވެ.
މީޑިއާއާ ވާހަކަދައްކަވަމުން ރަންކާ އިތުރަށް ވިދާޅުވީ، ސީޖޭޕީގެ ދެ އެދުމަކަށް ސަރުކާރުން "އުސޫލީ ގޮތުން" އެއްބަސްވެފައިވާ ކަމަށެވެ. އެއީ އަމިއްލައަށް މަރުވި ނީޓް އިމްތިހާނު ހަދަން އުޅުނު ދަރިވަރުންގެ އާއިލާތަކަށް މާލީ ބަދަލު ދިނުމާއި، އިހުތިޖާޖުކުރާ ދަރިވަރުންނާ ދެކޮޅަށް ގާނޫނީ ފިޔަވަޅު ނޭޅުމެވެ.
ރަންކާ ވިދާޅުވީ، ސަރުކާރުން ޕްރަދާން ވަރަށް އަވަހަށް މަގާމުން ވަކިކުރާނެ ކަމަށް ސީޖޭޕީން އުންމީދުކުރާ ކަމަށެވެ.
