ސަރުކާރާ ގުޅިގެން މަސައްކަތްކުރާ މޮނިޓަރިން ގްރޫޕެއް ކަމަށްވާ "ބްރިޓިޝް މުސްލިމް ޓްރަސްޓް" އިން ހާމަކޮށްފައިވާ ގޮތުގައި، ފާއިތުވި އަހަރުގެ ތެރޭގައި އިނގިރޭސިވިލާތުގެ 70 އަށް ވުރެ ގިނަ މިސްކިތަކަށް ވަނީ ހަމަލާދީފައެވެ. މިއީ އެވްރެޖްކޮށް ކޮންމެ ފަސް ދުވަހަކުން އެއް މިސްކިތަށް ހަމަލާއެއް ދިނުމެވެ.
މުސްލިމުންނާ ދެކޮޅަށް ހިންގާ މި އަނިޔާވެރި އަމަލުތަކުގެ ތެރޭގައި ޖިސްމާނީ ގޯނާކުރުމާއި، މުދަލަށް ގެއްލުން ދިނުމާއި، އަލިފާން ރޯކުރުމުގެ އަމަލުތަކާއި، ބިރުދެއްކުމާއި، ހުރަސް އެޅުމުގެ އިތުރުން އޮންލައިންކޮށް ފުރައްސާރަކުރުން ފަދަ ކަންކަން ހިމެނެއެވެ. މިކަމާ ގުޅިގެން ސަރުކާރުން ވަގުތުން ފިޔަވަޅު އެޅުމަށް ގާނޫނު ހަދާ މަޖިލީހުގެ މެންބަރުންނާއި މުޖުތަމައުގެ ލީޑަރުން ވަނީ ގޮވާލާފައެވެ.
ބީއެމްޓީން ބުނާ ގޮތުގައި، އިނގިރޭސިވިލާތުގައި މުސްލިމުންނާ ދެކޮޅަށް ހިންގާ ހަމަނުޖެހުންތައް އެންމެ ގިނައީ ލަންޑަން، ގްރޭޓާ މެންޗެސްޓާ އަދި ވެސްޓް މިޑްލަންޑްސްގައެވެ. ލަންޑަންގައި އެކަނި ވެސް ނުވަ ހާދިސާއެއް ރިކޯޑުކުރެވިފައިވާއިރު، ބާމިންހަމްގެ މިސްކިތަކަށް އެކަނި ވެސް 12 މަސް ދުވަހުގެ ތެރޭގައި ތިން ފަހަރު ހަމަލާދީފައިވެއެވެ.
އިންޓީރިއާ މިނިސްޓްރީގެ ތަފާސްހިސާބުތައް ދައްކާ ގޮތުން، 2025 ވަނަ އަހަރުގެ މާޗް މަހުގެ ނިޔަލަށް އިނގިރޭސިވިލާތާއި ވޭލްސްގައި މުސްލިމުންނާ ދެކޮޅަށް ހިންގާފައިވާ ހޭޓް ކްރައިމްސް ވަނީ 19% އިތުރުވެފައެވެ. އެއީ 2024 ވަނަ އަހަރުގެ މާޗް މަހާ ހަމައަށް ރިކޯޑުކުރެވުނު 2,690 ކުށާ އަޅާބަލާއިރު 3,199 ކުށެވެ.
މިކަމަށް ރައްދު ދިނުމުގެ ގޮތުން، 2026-27 ވަނަ އަހަރަށް މިސްކިތްތަކާއި، މުސްލިމުންގެ ސްކޫލްތަކާއި، ކޮމިއުނިޓީ ސެންޓަރުތަކުގެ ސަލާމަތީ ކަންކަން ވަރުގަދަ ކުރުމަށް 40 މިލިއަން ޕައުންޑް ހޭދަކުރާނެ ކަމަށް ސަރުކާރުން ވަނީ ވައުދުވެފައެވެ.
ނަމަވެސް، ދީނީ ލީޑަރުންނާއި އެކްޓިވިސްޓުން އިންޒާރު ދެނީ، ގާނޫނީ އަދި އިދާރީ ގޮންޖެހުންތަކާއި، ބިއުރޮކްރެސީގެ ސަބަބުން ސަލާމަތީ ފިޔަވަޅުތައް އެޅުން 18 މަސް ދުވަހާ ހަމައަށް ލަސްވެ، މިސްކިތްތައް ނުރައްކަލުގެ ތެރޭގައި އޮތް ކަމަށެވެ.
"މިސްކިތްތަކަށް ހަމަލާދޭ މިންވަރު އިތުރުވަމުންދާތީ، މިސްކިތްތައް ހިމާޔަތް ކުރުމަށް ސަރުކާރުން ކުރެވެން ހުރި ހުރިހާ ކަމެއް ކުރަންޖެހޭ،" ބީއެމްޓީގެ ޗީފް އެގްޒެކެޓިވް އަކީލާ އަހުމަދު ވިދާޅުވިއެވެ. އޭނާ ފާހަގަކުރެއްވި ގޮތުގައި، ސަލާމަތީ އެހީތެރިކަން ހޯދުމަށް ހުށަހަޅަންޖެހޭ ލިޔެކިޔުންތައް ގިނަކަމުން، މިސްކިތްތައް ހާލުގައި ޖެހިފައިވެއެވެ.
ލަންޑަންގެ މޭޔަރު ސާދިގް ޚާން ވިދާޅުވި ގޮތުގައި، މި ފަދަ ހަމަލާތައް އިތުރުވުމުގެ އަސްލަކީ ސިޔާސީ ފަރާތްތަކުންނާއި މީޑިއާ ފަތުރާ ނަފްރަތުގެ ބަސްތަކެވެ. އަދި ލޭބާ ޕާޓީގެ މެންބަރު ޑަޔަން އެބޮޓް ވެސް ވަނީ މުސްލިމުންނާ ދެކޮޅަށް ހިންގާ ހަމަނުޖެހުންތައް ކުށްވެރިކޮށް، ސަރުކާރުގެ ފަރާތުން އެކަށީގެންވާ ފިޔަވަޅުތަކެއް ނޭޅޭތީ ފާޑުވިދާޅުވެފައެވެ.
