ނިއުޒީލަންޑުގެ ޚާރިޖީ ވަޒީރު އަދި 'ނިއުޒީލަންޑް ފަސްޓް' ޕާޓީގެ ލީޑަރު ވިންސްޓަން ޕީޓަރސް، ޕާލަމެންޓްގައި ބަހުސެއްގެ ތެރެއިން ޗައިނާ ދަރިކޮޅުގެ ގާނޫނުހަދާ މެމްބަރަކަށް އަމާޒުކުރައްވައި "ރަށަށް އެނބުރި ދާށޭ!" ބުނުމާ ގުޅިގެން، ނަސްލީ ތަފާތުކުރުމުގެ ތުހުމަތުތަކާއެކު ނިއުޒިލެންޑްގެ ސިޔާސީ މައިދާނުގައި ބަހުސެއް އުފެދިއްޖެއެވެ.
މި ހާދިސާ ހިނގާފައިވަނީ ކޮވިޑް-19 އާ ދެކޮޅަށް ސަރުކާރުން ކުރި މަސައްކަތްތަކާ މެދު ޕާލިމަންޓުގައި ކުރިއަށްދިޔަ ބަހުސެއްގެ ތެރޭގައެވެ. ބަހުސްގެ ތެރެއިން ގްރީން ޕާޓީއަށް ނިސްބަތްވާ، އަދި ޗައިނާއިން ނިއުޒީލަންޑަށް ހިޖުރަކޮށްފައިވާ މެމްބަރު ލޯރެންސް ޝޯ-ނާން ވަނީ ޚާރިޖީ ވަޒީރާ ސުވާލު ކުރައްވައި، "ވެކްސިން ޖެއްސެވިންތޯ؟" އެއްސަވާފައެވެ.
އެ ސުވާލަށް ރައްދު ދެއްވަމުން ޚާރިޖީ ވަޒީރު ޕީޓަރސް ވިދާޅުވީ، އެ މެމްބަރަކީ "މިއަދާ ހަމައަށް އެތަނަށް އައިސް ފައިބައިގެން އުޅޭ" ބޭރުމީހެއް ކަމަށެވެ.
"އަމިއްލަ ގައުމަށް އެނބުރިދޭ؛ އެތަނުގައި މީހުން ލަދުހަޔާތެއް ނެތި ދޮގުހަދާ… އެކަމަކު މިތަނަކު އެގޮތަކަށް ދޮގެއް ނުހަދާނެ. މިއީ ޑިމޮކްރެޓިކް ނިޒާމެއް، ކަލޭ ބޮޑުވެ އުޅުނު ތަނާ މުޅިން ތަފާތު ތަނެއް މިއީ. ރަށަށް އެނބުރިދޭ،" ޕީޓަރސް ވިދާޅުވިއެވެ.
ޗައިނާ ސަފީރުގެ ރައްދާއި ސިޔާސީ ކުރިމަތިލުން
މި ވާހަކަތަކާއެކު ނިއުޒީލަންޑުގައި ހުންނަވާ ޗައިނާގެ ސަފީރު ވަންގް ޝިއާއޯލޮންގް ވަނީ އެކްސްގައި ނުރުހުން ފާޅުކުރައްވާފައެވެ. ސަފީރު ވިދާޅުވީ، އާންމުކޮށް އެހެން ގައުމުތަކުގެ އެތެރޭގެ ސިޔާސީ ކަންކަމުގެ ތެރެއަށް އޭނާ ނުވަންނަ ކަމަށާއި، ނަމަވެސް މިފަދަ ވާހަކަތަކުން ދައްކުވައިދެނީ އެ ވާހަކަ ދައްކާ މީހާގެ އަޚުލާގީ ފެންވަރު ކަމަށެވެ.
ނަމަވެސް، ޕީޓަރސް ވަނީ ސަފީރުގެ ވާހަކަތަކަށް ރައްދު ދެއްވައި، އެ މެސެޖުންވެސް އޭނާގެ ވާހަކައިގެ ތެދުކަން ސާބިތުވާ ކަމަށް ވިދާޅުވެފައެވެ. އަދި ނިއުޒީލަންޑަކީ ޚިޔާލުފާޅުކުރުމުގެ މިނިވަންކަން އޮތް ގައުމެއް ކަމަށާއި، އެހެން ބައެއް ގައުމުތަކުގައި އެ ހައްގުތައް ބާރުގެ ބޭނުންކޮށްގެން ހިފަހައްޓާ ކަމަށް ވިދާޅުވިއެވެ.
މި މައްސަލައިގައި ބޮޑުވަޒީރު ވަނީ ޚާރިޖީ ވަޒީރުގެ ވާހަކަތައް ކުށްވެރިކުރައްވާފައެވެ. ބޮޑުވަޒީރު ވިދާޅުވީ މިއީ ސަމާލުކަން ހޯދުމުގެ ނިޔަތުގައި ޕީޓަރސް ކުރައްވާ ކަންކަމުގެ ތެރެއިން ކުރެއްވި ކަމެއް ކަމަށެވެ.
މެމްބަރު ޝޯ-ނާން ވަނީ، ސަރުކާރުގެ ނާކާމިޔާބީތައް ފޮރުވުމަށްޓަކައި ހިޖުރަވެރިން ގުރުބާން ކުރުން ހުއްޓާލުމަށް ސަރުކާރަށް ގޮވާލައްވާފައެވެ. އަދި ނިއުޒީލަންޑަކީ އެކުވެރި، އެކަކު އަނެކަކަށް އެހީތެރިވާ މުޖުތަމައެއް އޮތް ގައުމެއްކަން ފާހަގަކުރައްވައި، ސިޔާސީ ފައިދާއަށްޓަކައި "ސަގާފީ ހަނގުރާމަތައް" ގައުމުގެ ތެރެއަށް އުފަން ނުކުރުމަށް އޭނާ އިލްތިމާސްކުރެއްވިއެވެ.
ޕާލަމެންޓްގެ ރިޔާސަތުން ވަނީ ވަޒީރުގެ ނަސްލީ ތަފާތު ކުރުމުގެ ބަސްތަކަކީ އެކަށީގެންވާ ބަސްތަކެއް ނޫން ކަމަށް ބުނެފައެވެ. ނަމަވެސް، ބަހުސްގެ ތެރޭގައި އެކަމާ މެދު ނުކުތާއެއް އުފައްދާފައި ނުވާތީ އިދާރީ ފިޔަވަޅެއް އަޅާފައެއް ނުވެއެވެ.
މިއީ ޕީޓަރސްއާއި އޭނާގެ ޕާޓީން ހިޖުރަވެރިންނާ ދެކޮޅަށް ނަސްލީ ތަފާތު ކުރުމުގެ ބަސްތައް ބޭނުންކުރި ފުރަތަމަ ފަހަރެއް ނޫނެވެ. މީގެ ކުރިންވެސް ޕާލަމެންޓްގައި އެހެން ގައުމުތަކުން ހިޖުރަކޮށްފައިވާ މެމްބަރުންނަށް އަމާޒުކޮށް މިފަދަ އިހާނެތި ބަސްތައް ބޭނުންކޮށްގެން ބޮޑެތި ފާޑުކިޔުންތަކެއް ވަނީ އަމާޒުވެފައެވެ.
