މިނިވަންކަމުގެ ރޫޙާއި ޒުވާނުންގެ ނުރުހުން އެއްވަމުންދާ މި ދަނޑިވަޅުގައި، އިންޑިއާގެ ސިޔާސީ މަސްރަހަށް މުޅިން އާ ބޮޅެއް އިތުރުވެއްޖެއެވެ. ދިއްލީގެ ޖަންތަރު މަންތަރުގައި ފެނިގެންދިޔަ ޖެން-ޒީ ޕްރޮޓެސްޓްތަކުން ހިތްވަރު ލިބިގެން، އިންޑިއާގެ މިނިވަންކަމުގެ ތާރީޚީ ބަތަލު ނޭތާޖީ ސްބާޝް ޗަންދްރާ ބޯސްގެ ކާފަދަރިކަލުން، ޗަންދްރާ ކުމާރު ބޯސް، އާ ސިޔާސީ ޕާޓީއެއް އުފައްދަވާނެކަން އިއުލާނުކުރައްވައިފިއެވެ.
މީޑއާއާ ވާހަކަ ދައްކަވަމުން ޗަންދްރާ ކުމާރު ބޯސް ވިދާޅުވީ އުފައްދަން ނިންމާފައިވާ 'އާޒާދު ހިންދު ޕާޓީ' ޚާއްސަވެގެންދާނީ ޤައުމުގެ މުސްތަޤުބަލަށްޓަކައި ތެދުވަމުންދާ ޒުވާނުންނަށާއި، ނޭތާޖީގެ ވަށާ ޖެހޭ ސެކިއުލަރ ވިސްނުމުގެ މައްޗަށް ކަމަށެވެ.
ޒުވާނުންގެ ނުރުހުމާއި ސިޔާސީ ބަދަލުތައް
ފާއިތުވި ދުވަސްތަކުގައި އިންޑިއާގެ ވެރިރަށުގައި ފެނިގެންދިޔަ ޒުވާނުންގެ މުޒާހަރާތަކަކީ، އިމްތިޙާނުތަކުގެ ނަތީޖާ އޮޅުވާލުމާއި ސުއާލު ކަރުދާސް ލީކުކޮށްލުމާއި ޒުވާނުންގެ ވަޒީފާގެ ފުރުޞަތުތައް ހަނިވަމުންދިއުމުގެ ސަބބުން އުފެދިފައިވާ ފުން ނުރުހުމުގެ ނަތީޖާއެކެވެ. ޗަންދްރާ ކުމާރު ބޯސް ފާހަގަކުރެއްވި ގޮތުގައި، މިހާރުގެ ސިޔާސީ ނިޒާމާއި، ތަޢުލީމާއި ޞިއްޙީ ދާއިރާގައި ފެތުރިފައިވާ ކޮރަޕްޝަންގެ ސަބަބުން ޒުވާނުން ތިބީ މާޔޫސްވެފައެވެ.
"އަޅުގަނޑުމެންނަށް ފެންނަމުން މިދަނީ ޤައުމުގެ އެކި ކަންކޮޅުތަކުގައި ކޮރަޕްޝަން އާންމުވެ، ޒުވާނުންގެ އުއްމީދުތައް ފުނޑުފުނޑުވަމުންދާ މަންޒަރު. މިފަދަ ދަނޑިވަޅެއްގައި، ނޭތާޖީގެ އާޒާދު ހިންދު ފައުޖުގެ ރޫޙުގައި، ޒުވާނުންނަށް އަމިއްލަ ޙައްޤުތަކަށް މަސައްކަތްކުރެވޭނެ ސާފު މާޙައުލެއް ބޭނުންވޭ،" އޭނާ ވިދާޅުވިއެވެ.
މާޒީގެ ތަޖުރިބާތަކާއި އާ ފެށުމެއް
ޗަންދްރާ ކުމާރު ބޯސްގެ ސިޔާސީ ދަތުރަކީ ފަސޭހަ ދަތުރެއް ނޫނެވެ. މީގެކުރިން ބީ.ޖޭ.ޕީ އާއި ވެސްޓް ބެންގަލްގެ ވެރިކަންކުރާ ޕާޓީއާ ގުޅިވަޑައިގެން މަސައްކަތްކުރެއްވި ނަމަވެސް، މައިގަނޑު ސިޔާސީ ޕާޓީތަކުގެ ކެތްތެރިކަން ކުޑަ ސިޔާސަތުތަކުގެ ސަބަބުން އެ ޕާޓީތައް ދޫކޮށްލައްވަންޖެހުނު ކަމަށް އޭނާ ވިދާޅުވިއެވެ.
އޭނާ ވިދާޅުވިގޮތުގައި، ކުރިން ބީ.ޖޭ.ޕީއާ ގުޅުނީ ނޭތާޖީގެ ފިކުރު ފެތުރުމަށް ޚާއްޞަ މެހުފިލެއް އުފައްދާނެ ކަމަށް ވެވުނު ވައުދުގެ މައްޗަށެވެ. ނަމަވެސް އެކަން ނުވުމުންނާއި، ފަހުން ތިރުނަމޫލް ކޮންގްރެސްގައި ހުންނެވި ދުވަސްވަރުވެސް އެދެވޭ މާޙައުލެއް ނުލިބުމުން، މިއަދު އަމިއްލަ ޒަޢާމަތުގައި އާ ޕާޓީއެއް އުފައްދަވަން ނިންމެވީއެވެ.
މި އާ ސިޔާސީ ފިޔަވަޅަކީ އިންޑިއާގެ ޒުވާނުންގެ މެދުގައި އާ ޖޯޝެއް އުފައްދައި، ޤައުމުގެ މުސްތަޤުބަލު ބައްޓަންކުރުމުގައި ޒުވާނުންނަށް މުހިންމު ދައުރެއް ކުޅެދެވޭނެ މަގުފަހިވެގެންދާނެ ކަމެއް ކަމަށް ވާނެ ބާވައެވެ؟
