ބައިނަލްއަގުވާމީ ކްރެޑިޓް ރޭޓިންގ އެޖެންސީ، ފިޗް ރޭޓިންގްސްއިން އިންޑިއާގެ ސޮވަރިން ކްރެޑިޓް ރޭޓިންގ ބީބީބީ މައިނަސް ގައި ހިފަހައްޓައި، އައުޓްލުކް "ސްޓޭބަލް" ނުވަތަ ހަމަޖެހޭ ހާލަތެއްގައިވާ ކަމަށް ކަނޑައަޅައިފިއެވެ. ފިޗުން ބުނެފައިވާ ގޮތުގައި މި ނިންމުން ނިންމާފައިވަނީ އިންޑިއާގެ އިގްތިސާދީ ކުރިއެރުން ވަރުގަދަކޮށް ދެމިއޮތުމާއި، މާލީ ނިޒާމުގެ ތެރޭގައި ހުރި ހެޔޮ ބަދަލުތަކަށް ބެލުމަށްފަހުގައެވެ.
ފިޗްގެ ރިޕޯޓުގައިވާ ގޮތުން ދުނިޔޭގެ އިގްތިސާދަށް ނުރައްކާތަކާ ކުރިމަތިލާންޖެހިފައިވީ ނަމަވެސް، އިންޑިއާއަކީ ދުނިޔޭގެ އެންމެ އަވަހަށް ކުރިއަރަމުން އަންނަ ބޮޑެތި އިގްތިސާދުތަކުގެ ތެރެއިން އެކެކެވެ. ގައުމުގެ އެތެރޭގެ އުފެއްދުންތެރިކަމާއި، އުމްރާނީ ތަރައްގީއަށް ކުރެވޭ އިންވެސްޓްމަންޓްތަކުގެ ސަބަބުން އިގްތިސާދީ ދުވެލި ވަރުގަދަވެފައިވާކަން ރިޕޯޓުގައި ފާހަގަކޮށްފައިވެއެވެ. ނަމަވެސް، ސަރުކާރުގެ ދަރަނި މަތީ މިންވަރެއްގައި ހުރުމާއި، ގައުމީ އާމްދަނީއާ އަޅާބަލާއިރު ދަރަނި ދެއްކުމަށް ކުރަންޖެހޭ ހަރަދުތައް ބޮޑުވުމަކީ އަދިވެސް އޮތް ގޮންޖެހުމެކެވެ.
އިންޑިއާ ސަރުކާރުން ބަޖެޓު ޑެފިސިޓް ކުޑަކުރުމަށް ކުރަމުންދާ މަސައްކަތްތަކަށް ފިޗުން ވަނީ ތައުރީފުކޮށްފައެވެ. ކުރިއަށް އޮތް ތަނުގައި މާލީ އިސްލާހުތައް ހަރުދަނާކޮށް، ދަރަނި ކުޑަކުރެވިއްޖެނަމަ، އިންޑިއާގެ ރޭޓިންގ އިތުރަށް މަތިވުމުގެ ފުރުސަތު އޮތްކަންވެސް އެޖެންސީން ވަނީ ހާމަކޮށްފައެވެ.
