އޮފީސް ނިންމާލުމަށްފަހު ހަފުތާގެ ބަންދު ދުވަސްތަކުގައި ވަޒީފާގެ މަސައްކަތްތަކުން އެކީއެކަށް މިނިވަންވެ، އާއިލާއާއި އަމިއްލަ ކަންކަމަށް ވަގުތު ހުސްކުރުމުގެ ސަގާފަތް އުފެދުނުތާ ގަރުނެއް ފުރެން ކައިރިވެފައިވާއިރު، ޒަމާނީ ޓެކްނޮލޮޖީއާއި މަސައްކަތުގެ ވައްޓަފާޅިއަށް އައި ބަދަލުތަކާއެކު އެ ބަންދުގެ އަސްލު މަގުސަދު ގެއްލެމުންދާ ކަމުގެ ބަހުސް ވަނީ އަލުން ފެށިފައެވެ.
އާންމު އިޖުތިމާއީ ތާރީހަށް ބަލާއިރު، ހަފުތާއަކު ފަސް ދުވަހު (40 ގަޑިއިރު) މަސައްކަތްކޮށް، ދެ ދުވަސް ބަންދުކުރުމުގެ ނިޒާމު އެންމެ ފުރަތަމަ އާންމުކޮށް ތައާރަފުކުރީ 1926 ވަނަ އަހަރުގެ މެއި މަހު އެމެރިކާގެ މަޝްހޫރު ކާރު އުފައްދާ ކުންފުނި ފޯޑް މޯޓަރސް އިންނެވެ.
އެ ކުންފުނީގެ ބާނީ ހެންރީ ފޯޑް އެ ނިންމެވުން ނިންމެވީ ހަމައެކަނި އިންސާނީ ހަމްދަރްދީއަކުން ނޫނެވެ. އިގުތިސާދީ ނަޒަރިއްޔާތަކުން ބަލާއިރު، މަސައްކަތްތެރިންނަށް ފައިސާގެ އިތުރުން ވަގުތު ލިބިގެން މެނުވީ، އުފައްދާ މުދަލާއި ހިދުމަތްތައް ގަނެ، އިގުތިސާދީ ދައުރުވުން ދެމެހެއްޓޭކަށް ނެތެވެ. މި ނިޒާމު ފަހުން މުޅި ދުނިޔެއަށް އާންމުވެ، 1938 ގައި އެމެރިކާގެ ގާނޫނުތަކުގެ ތެރެއަށް ވަދެ، ދުނިޔޭގެ އެކި ކަންކޮޅުތަކުގައި ވަޒީފާގެ މިންގަނޑަކަށް ބަދަލުވިއެވެ.
ނަމަވެސް، ސަތޭކަ އަހަރަށްފަހު މިއަދު ސުވާލު އުފެދެނީ ގާނޫނީ ގޮތުން ކަނޑައެޅިފައިވާ މި ބަންދު ދުވަސްތަކުގެ ހަގީގީ ބޭނުން ހިފޭތޯއެވެ.
ސްމާޓްފޯނާއި، އީމެއިލް، އަދި އޮންލައިން މީޓިންގތަކުގެ ސަބަބުން ވަޒީފާގެ މާހައުލާއި ގޭތެރޭގެ އަމިއްލަ ދިރިއުޅުމުގެ މެދުގައި އޮތް ރައްކާތެރި އިން ވަނީ ރޫޅިފައެވެ. އޮފީހުން ނުކުމެގެން ގެއަށް ދިޔަޔަސް، ނުވަތަ ބަންދު ދުވަހު އާއިލާއާއެކު ވަގުތު ހޭދަކުރާއިރުވެސް، މެސެޖުތަކަށް ޖަވާބުދިނުމާއި، ފައިލްތައް ޗެކްކުރުން ފަދަ ކަންކަމުގެ ސަބަބުން ސިކުނޑިއަށް ވަޒީފާގެ މާހައުލުން އެކީއެކަށް މިނިވަންކަމެއް ނުލިބެއެވެ.
ބައިނަލްއަގުވާމީ ވަޒީފާއާ ބެހޭ ޖަމިއްޔާ (އައިއެލްއޯ) ގެ ތަފާސްހިސާބުތަކުން ދައްކާ ގޮތުގައި ދުނިޔޭގެ އާބާދީގެ ތިންބައިކުޅައެއްބަޔަށްވުރެ ގިނަ މަސައްކަތްތެރިން އަދިވެސް ހަފުތާއަކު 48 ގަޑިއިރަށްވުރެ ގިނައިން މަސައްކަތްކުރެއެވެ. އޭގެ އިތުރުން، ސިއްހީ ހިދުމަތްތެރިންނާއި، ސެކިއުރިޓީ، އަދި ކޭޓަރިންގ ފަދަ ހިދުމަތްދޭ ދާއިރާތަކުގެ މިލިއަނުން މުވައްޒަފުންނަށް "ވީކެންޑް" ގެ އަރާމު އެއްގޮތަކަށްވެސް ނުލިބެއެވެ.
ކޮވިޑް-19 ގެ އާލަމީ ވަބާއަށްފަހު ގޭގައި ތިބެގެން މަސައްކަތްކުރުމާއި "ހައިބްރިޑް" މޮޑެލްތައް އާންމުވުމާއެކު، ވަޒީފާގެ ވަގުތާއި އަމިއްލަ ވަގުތުގެ އިމުގެ ހުރަސް އިތުރަށް ކުޑަވިއެވެ. ގޭގައި ތިބެގެން މަސައްކަތްކުރުމުގެ ލުއިފަސޭހަކަން މުވައްޒަފުންނަށް ލިބުނު ނަމަވެސް، އެކަމުގެ ނަތީޖާއަކަށްވީ 24 ގަޑިއިރު ވަޒީފާއަށް ތައްޔާރަށް ތިބެންޖެހޭ ސަގާފަތެއް އަށަގަތުމެވެ.
ކާރުޚާނާގެ މަސައްކަތްތެރިންގެ ހައްގުގައި ފެށުނު ބަންދު ދުވަހުގެ ނިޒާމަށް ސަތޭކަ އަހަރު ފުރެންދާއިރު، މިހާރު ކުރިމަތިވެފައިވާ އެންމެ ބޮޑު ގޮންޖެހުމަކީ ގާނޫނީ ގޮތުން ދީފައިވާ ދެ ދުވަހުގެ ބަންދުގެ މުއްދަތު ކުޑަވުމެއް ނޫނެވެ. ނަމަވެސް، ޓެކްނޮލޮޖީގެ ސަބަބުން ސިކުނޑިއަށް ލިބެންޖެހޭ އަރާމާއި، ވަޒީފާގެ ނުފޫޒުން އެކީއެކަށް މިންޖުވުމަށް އޮތް ހުރަސްތަކެވެ.
