އިންޑިއާއާއި ބަންގްލަދޭޝްއާ ދެމެދު ވައިގެ ދަތުރުފަތުރުގެ ނިޒާމު އިތުރަށް ތަރައްޤީކޮށް، ސިވިލް އޭވިއޭޝަންގެ ދާއިރާއިން އެއްބާރުލުން އިތުރުކުރުމާ ގުޅޭގޮތުން ދެ ޤައުމުން މުހިންމު މަޝްވަރާތަކެއް ބާއްވައިފިއެވެ.
މި މަޝްވަރާތައް އަމާޒުކޮށްފައިވަނީ ދެ ޤައުމުގެ ދެމެދުގައި އޮތް ވިޔަފާރިއާއި، ފަތުރުވެރިކަމުގެ އިތުރުން ރައްޔިތުންގެ މެދުގައި އޮންނަ ގުޅުންތައް މިހާރަށްވުރެ ހަލުވިކޮށް އަދި ހަރުދަނާ ގޮތެއްގައި ކުރިއަށް ގެންދިޔުމަށެވެ. ޚާއްސަކޮށް، ވައިގެ މަގުން ކުރެވޭ ދަތުރުތައް ފަސޭހަކޮށް، ޓިކެޓުގެ އަގުތައް ކުޑަކޮށް ޚިދުމަތުގެ ފެންވަރު މަތިކުރުމަށް ދެ ޤައުމުގެ ކަމާބެހޭ އިސް އޮފިޝަލުން ވަނީ މަޝްވަރާކުރައްވާފައެވެ.
މި މަޝްވަރާތައް ބާއްވާފައިވަނީ ބަންގްލަދޭޝްގައި ހުންނަ އިންޑިއާގެ ހައި ކޮމިޝަނަރު ޝްރީ ދިނޭޝް ޓްރިވެދީއާއި، ބަންގްލަދޭޝްގެ މިނިސްޓަރ އޮފް ސިވިލް އޭވިއޭޝަން އެންޑް ޓޫރިޒަމް އެމް. ރަޝީދުއްޒާމާން މިއްލަތު ބޭއްވި މަޝްވަރާތަކުގައެވެ. މި ބައްދަލުވުމުގައި ވައިގެ ދަތުރުފަތުރުގެ ނިޒާމު ހަރުދަނާކުރުމަށް ބައިލެޓަރަލް ވޯކިންގ މެކޭނިޒަމް ރަނގަޅުކޮށް ފަތުރުވެރިކަން ކުރިއެރުވުމާ ގުޅޭގޮތުން މަޝްވަރާކޮށްފައިވެއެވެ.
މި މަޝްވަރާތަކާ ގުޅޭގޮތުން ބަންގްލަދޭޝްގައި ހުންނަ އިންޑިއަން ހައި ކޮމިޝަނުން ހާމަކޮށްފައިވާ ގޮތުގައި، މިއީ ދެ ޤައުމުގެ ރައްޔިތުންގެ މެދުގައި އޮތް ގުޅުންތައް ބަދަހިކޮށް، ކުރިއެރުވުމަށް އަޅާ ފިޔަވަޅެކެވެ. މިދިޔަ އަހަރުތަކުގައި އިންޑިއާއާއި ބަންގްލަދޭޝްއާ ދެމެދު ސިވިލް އޭވިއޭޝަންގެ ދާއިރާއިން ވަނީ ގިނަ ކުރިއެރުންތަކެއް ހޯދާފައެވެ. ނަމަވެސް، ޒަމާނީ ޓެކްނޮލޮޖީއާއި، ވައިގެ ބަނދަރުތަކުގެ ޖާގަ އިތުރުކުރުމާއި، އަދި ދަތުރުފަތުރުގެ ސަލާމަތާއި ރައްކާތެރިކަން ކަށަވަރުކުރުމަށް އިތުރު މަސައްކަތްތަކެއް ކުރަންޖެހިފައިވާ ކަމަށް ދާއިރާގެ މާހިރުން ވަނީ ފާހަގަކޮށްފައެވެ.
