މިޞްރު ސަރުކާރަށް ފާޑުކިޔައި ޚަބަރުތައް ގެނެސްދޭ މިނިވަން ނޫސް އެޖެންސީއެއް ކަމަށްވާ "މަތުޞަދައްޝް" ގެ އެޑިޓޯރިއަލް ޓީމުގައި ހިމެނޭ ހުރިހާ ނޫސްވެރިން އެޤައުމުގެ ޖާސޫސީ އިދާތާއިން ހައްޔަރުކޮށްފިއެވެ.
މީޑިއާއާއި އިޖްތިމާއީ އަދި އިންސާނީ ޙައްޤުތަކަށް މަސައްކަތްކުރާ "އިޖިޕްޝަން އިނިޝިއަޓިވް ފޯ ޕާސަނަލް ރައިޓްސް" (އީއައިޕީއާރު) އިންކަށަވަރުކޮށްދިން ގޮތުގައި، "މަތުޞަދައްޝް" ގެ 6 ނޫސްވެރިން ވަނީ ހައްޔަރުކޮށްފައެވެ. މިއީ އެ އެޖެންސީގެ މުޅި އެޑިޓޯރިއަލް ޓީމެވެ.
އީއައިޕީއާރުން ވަނީ ޖާސޫސީ އިދާރާއާއި ފުލުހުން ފެށި މީހުން ހައްޔަރު ކުރުމުގެ މި އަމަލު ކުށްވެރިކޮށްފައެވެ. ހައްޔަރުކުރި 6 ނޫސްވެރިންގެ ތެރެއިން 4 ނޫސްވެރިއަކު ހައްޔަރު ކޮށްފައި ވަނީ ޤާހިރާއާއި ޣަރްބިއްޔާ އަދި ޕޯރޓް ސަޢީދުގައި ހުންނަ އެމީހުންގެ ގޭގޭގައި ތިއްބައެވެ. އަދި އަނެއް ދެ ނޫސްވެރިން ހައްޔަރުކުރީ ޤާހިރާގެ މަގުމަތިންނެވެ. އެމީހުން މިހާރު ބަންދުކޮށްފައި ތިބި ކަމަށް ބެލެވެނީ ލާޒޮޣްލީގައި ހުންނަ ޖާސޫސީ އިދާރާގެ އެތެރޭގައެވެ.
"މަތުޞަދައްޝް" އަކީ 2018 ވަނަ އަހަރުން ފެށިގެން މިޞްރާއި އަރަބި ދުނިޔޭގެ ޚަބަރުތަކުގެ ތެދުދޮގު ބަލައި ފެކްޓް-ޗެކްކޮށް، އޯޕަން ސޯސް ތަޙުޤީޤީ ރިޕޯޓްތައް ޝާއިއު ކުރަމުންދާ މަޤްބޫލު މީޑިއާއެކެވެ. ފޭސްބުކްގައި އެކަނިވެސް އެ މީޑިއާގެ 1 މިލިއަނަށްވުރެ ގިނަ ފޮލޯވަރުން ތިބެއެވެ.
އެ މީޑިއާއިން ނެރުނު ބަޔާނެއްގައި ބުނެފައިވަނީ، ހައްޔަރުކުރި ނޫސްވެރިންނަކީވެސް މިޞްރުގެ މަޝްހޫރު މީޑިއާގައި ޚިދުމަތްކޮށް، ނޫސްވެރިކަމުގެ އަޚްލާޤީ މިންގަނޑުތަކާ އެއްގޮތަށް ފެކްޓް-ޗެކްކޮށް މައުލޫމާތު ފަތުރަމުންދިޔަ ޕްރޮފެޝަނަލް ނޫސްވެރިން ކަމަށެވެ.
މި ފަހުން "މަތުޞަދައްޝް" އިން ވަނީ މިސްރުގައި ތިބި ރެފިއުޖީންގެ އަދަދުތަކާ ގުޅޭގޮތުން މިޞްރުގެ ޚާރިޖީ ވަޒީރު ބަދުރު އަބްދުލްއާތީ ހެއްދެވި އިތުރުފުޅުތައް ހާމަކޮށް ފައެވެ.، އަދި އޭގެ އިތުރުން ޕްރޮސެކިއުޓަރ ޖެނެރަލް އޮފީހަށް މީހުން އައްޔަންކުރުމުގައި ކޮރަޕްޝަނާއި ވަކިފަރާތަކަށް ޖެހުން އޮތްކަން ހާމަކޮށް ރިޕޯޓްތަކެއް ވެސް ނެރެފައެވެ.
ސީސީ ރައީސްގެ ވެރިކަމުގައި މިސްރަކީ ނޫސްވެރިކަން ކުރުމަށް ނުރައްކާތެރި ގައުމެކެވެ. އީއައިޕީއާރުގެ މައުލޫމާތުން ދައްކާ ގޮތުގައި، ނޫސްވެރިކަން ކުރުމާ ގުޅިގެން މިޞްރުގައި މިހާރުވެސް 26 ނޫސްވެރިއަކު ވަނީ ޖަލުގައި ބަންދުކޮށްފައެވެ. އަދި މީގެ އިތުރުން މިސްމީޑިއާ 'ޑިސްކޯޑް' ބޭނުންކުރާ މީހުންނާއި، އިންޓަނެޓް ކޮންޓެންޓް ކްރިއޭޓަރުންނާއި، ކޮމެޑިއަނުން އަދި މިނިވަން ކަމާއެކު ޚިޔާލުފާޅުކުރާ އެހެން އެތައް ބަޔަކު ވެސް ވަނީ ހައްޔަރުކޮށްފައެވެ.
އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން މިޞްރު ސަރުކާރުން ސިޔާސީ ދެކޮޅުވެރިންނާއި ޚިޔާލުފާޅުކުރާ މީހުން ހައްޔަރުކުރާ ކަމަށް ތުހުމަތުކުރި ނަމަވެސް، މިޞްރު ސަރުކާރުން ބުނަމުންދަނީ އެމީހުން ހައްޔަރުކުރަނީ ޖިނާއީ ކުށްތައް ބޮލުގައި އަޅުވފައި ގާނޫނަށް ފައްތައިގެން ކަމަށެވެ.
