ސައްހަނޫން ޕޯސްޓޭޖް ލޭބަލްތަކެއް އިންޓަނެޓު މެދުވެރިކޮށް ވިއްކައިގެން އެމެރިކާގެ ޕޯސްޓަލް ސާވިސް (ޔޫއެސްޕީއެސް) އަށް 125 މިލިއަނަށްވުރެ ގިނަ ޑލަރުގެ މާލީ ގެއްލުން ދިން މައްސަލައެއްގައި ޕާކިސްތާނުގެ ރައްޔިތެއްގެ މައްޗަށް އެމެރިކާގެ ފެޑެރަލް ކޯޓެއްގައި ދައުވާ އުފުލައިފިއެވެ.
އެމެރިކާގެ ޖަސްޓިސް ޑިޕާޓްމަންޓުން ނެރުނު ބަޔާނެއްގައިވާ ގޮތުން، މި މައްސަލައިގައި ދައުވާ އުފުލާފައިވަނީ ޕާކިސްތާނުގެ ޚާނެވާލް ސަރަހައްދަށް ނިސްބަތްވާ އުމުރުން 33 އަހަރުގެ ފިރިހެނެއްގެ މައްޗަށެވެ. އެމެރިކާގެ ސަދަން ޑިސްޓްރިކްޓް އޮފް ފްލޮރިޑާގެ ފެޑެރަލް ގްރޭންޑް ޖޫރީއަކުން އޭނާގެ މައްޗަށް ދައުވާ ކުރަން ނިންމާފައިވަނީ، ހުއްދައެއް ނެތި ވެބްސައިޓެއް ހިންގައިގެން 5 މިލިއަނަށްވުރެ ގިނަ ސައްހަނޫން ޔޫއެސްޕީއެސް ޕޯސްޓޭޖް ލޭބަލް ވިއްކި ކަމުގެ ތުހުމަތުގައެވެ.
ކޯޓުގެ ލިޔެކިޔުންތަކުން އެނގޭ ގޮތުގައި، އެ ވެބްސައިޓު މެދުވެރިކޮށް ސައްހަނޫން ލޭބަލްތައް ވިއްކާފައިވަނީ ފިކްސްޑް ރޭޓެއްގައި، އާންމުކޮށް ލޭބަލެއް 2 ޑޮލަރަށެވެ. ޕާރުސަލުގެ ބޮޑުމިނަށާއި، ބަރުދަނަށް އަދި ފޮނުވާ މަންޒިލަށް ބެލުމެއް ނެތް ގޮތަށް މި ފީ ކަނޑައެޅުމުގެ ސަބަބުން، ޔޫއެސްޕީއެސްގެ ރަސްމީ އަގުތަކަށްވުރެ މާ ހެޔޮ އަގުގައި ތަކެތި ޕޯސްޓުކުރުމުގެ ފުރުސަތު ކަސްޓަމަރުންނަށް ލިބިގެންދިޔައެވެ. ނަމަވެސް، މި ޚިދުމަތް ދިނުމަށް ބޭނުންކުރި ވެބްސައިޓަކީ ޔޫއެސްޕީއެސްގެ އުފެއްދުންތަކާއި ޚިދުމަތްތައް ވިއްކުމުގެ އެއްވެސް ހުއްދައެއް އޮތް ތަނެއް ނޫން ކަމަށް ތަހުގީގީ އިދާރާތަކުން ފާހަގަކުރެއެވެ.
ތަހުގީގަށް އެނގިފައިވާ ގޮތުގައި، 5.200 އަށްވުރެ ގިނަ މީހުން ވަނީ އެ ވެބްސައިޓު މެދުވެރިކޮށް 5.1 މިލިއަނަށްވުރެ ގިނަ ސައްހަނޫން ޝިޕިން ލޭބަލް ގަނެފައެވެ. އޭގެ ސަބަބުން އެމެރިކާގެ ޕޯސްޓަލް ސާވިސްއަށް 126 މިލިއަން ޑލަރަށްވުރެ ބޮޑު މާލީ ގެއްލުމެއް ލިބިފައިވާ ކަމަށް އެމެރިކާގެ އެޓާނީ އޮފީހުން ނެރުނު ބަޔާނުގައި ބުނެފައިވެއެވެ.
"އެމެރިކާގެ ޕޯސްޓަލް އިންސްޕެކްޝަން ސާވިސްއާއި އަޅުގަނޑުމެންގެ ޕްރޮސެކިއުޓަރުން ކުރެއްވި މަސައްކަތުން، އެ ވެބްސައިޓު މިހާރު ވަނީ ބަންދުކޮށް، ޑޮމެއިން ސަރުކާރުގެ ބެލުމުގެ ދަށަށް ގެންގޮސްފައި. އަދި މި އަމަލު ހިންގި ކަމަށް ތުހުމަތުކުރެވޭ މީހާގެ މައްޗަށް ވަނީ ފެޑެރަލް ދައުވާތައް އުފުލާފައި،" ފްލޮރިޑާގެ ސަދަން ޑިސްޓްރިކްޓްގެ އެމެރިކާ އެޓާނީ ޖޭސަން ރެޑިންގް ކީނޯނެސް ވިދާޅުވިއެވެ. އޭނާ ސިފަކުރެއްވި ގޮތުގައި މިއީ "އާދައިގެ، ނަމަވެސް އިންތިހާއަށް ބޮޑު" އޮޅުވާލުމެކެވެ.
މި ދައުވާތައް ސާބިތުވެއްޖެނަމަ، ކޮންސްޕިރަސީގެ ދައުވާއަށް ގިނަވެގެން ފަސް އަހަރުގެ ޖަލު ހުކުމެއް އަންނާނެއެވެ. އަދި ފްރޯޑުގެ ކޮންމެ ދައުވާއަކަށް 20 އަހަރުގެ ޖަލު ހުކުމެއް އައުމުގެ ފުރުސަތު އޮތުމާއެކު، އޭނާއަށް ބޮޑު އަދަބެއް ކުރިމަތިވުމުގެ ފުރުސަތު އެބައޮތެވެ.
ޖަސްޓިސް ޑިޕާޓްމަންޓުން ވަނީ، ކޯޓުގައި ދައުވާ ސާބިތުނުވާހާ ހިނދަކު، ކޮންމެ ދައުވާލިބޭ މީހަކީވެސް ކުށެއް ނެތް މީހެއްގެ ގޮތުގައި ބެލެވޭނެ ކަމަށް ބުނެފައެވެ.
މީގެ އިތުރުން، ފާއިތުވި ފެބްރުއަރީ މަހުގެ ތެރޭގައިވެސް، އެމެރިކާގެ މެޑިކެއާއާއި އަމިއްލަ އިންޝުއަރެންސް ޕްރޮގްރާމްތަކަށް އަމާޒުކޮށްގެން 10 މިލިއަން ޑލަރުގެ ސިއްހީ އޮޅުވާލުމެއް ހިންގި މައްސަލައެއްގައި ޕާކިސްތާނުގެ ދެ ރައްޔިތެއްގެ މައްޗަށް އެމެރިކާގައި ދައުވާ އުފުލާފައިވާކަން ފާހަގަކޮށްލެވެއެވެ.
