އެމެރިކާއިން ބައިނަލްއަގުވާމީ ޖިނާއީ ކޯޓު (އައިސީސީ) އާ ދެކޮޅަށް އަޅަން ތައްޔާރުވަމުންދާ އައު ދަތިކުރުމުގެ ފިޔަވަޅުތަކުގެ ސަބަބުން، އެ ކޯޓުގެ އޮޕަރޭޝަންތައް މުޅިން ހުއްޓުމަކަށް އަތުވެދާނެ ކަމުގެ ބިރު ބޮޑުވެއްޖެއެވެ.
އިނގިރޭސިވިލާތުގެ "ޓައިމްސް" ނޫހުން ނެރުނު ރިޕޯޓެއްގައި ބުނެފައިވަނީ، އެމެރިކާއިން ތަންފީޒުކުރަން ނިންމާފައިވާ ފިޔަވަޅުތައް އެ ކޯޓާ ގުޅުންހުރި އަދި އެހީތެރިކަން ފޯރުކޮށްދޭ އެހެން މުއައްސަސާތަކަށްވެސް އަމާޒުވާނެ ކަމަށެވެ. އެގޮތުން، އެމެރިކާގެ ފިޔަވަޅުތަކުގެ ނުރައްކާ އޮތުމާއެކު، އެއްވެސް ކުންފުންޏަކަށް ނުވަތަ ޚިދުމަތް ފޯރުކޮށްދޭ ފަރާތަކަށް އައިސީސީއާއެކު މަސައްކަތް ކުރުމުގެ ފުރުސަތު ބަންދުވެގެންދާނެއެވެ. މީގެ ސަބަބުން އެ ކޯޓުގެ ވުޖޫދު މުޅިން ފޮހެވިގެން ގޮސްދާނެ ކަމުގެ ކަންބޮޑުވުން، ކޯޓަށް ތާއީދުކުރާ ފަރާތްތަކުން ވަނީ ފާޅުކޮށްފައެވެ.
ޔޫރަޕުގެ ޑިޕްލޮމެޓަކު އެ ނޫހަށް މައުލޫމާތު ދެއްވަމުން ވިދާޅުވީ، އެމެރިކާއިން އަޅަން އުޅޭ ފިޔަވަޅުތަކުގެ ޚަބަރަކީ ކޯޓުގެ މަސައްކަތްތަކަށް ތާއީދުކުރާ އެންމެހައި ފަރާތްތަކަށް ހިތާމަވެރި ޚަބަރެއް ކަމަށެވެ.
އެމެރިކާގެ "ވޯލް ސްޓްރީޓް ޖާނަލް" އިން މި އަހަރުގެ ސެޕްޓެމްބަރު މަހު އެމެރިކާގެ މަސްއޫލުވެރިންނާއި ލިޔެކިޔުންތަކާ ހަވާލާދީ ރިޕޯޓުކޮށްފައިވާ ގޮތުގައި، ރައީސް ޑޮނަލްޑް ޓްރަމްޕްގެ އިދާރާއިން ދަނީ އައިސީސީގެ މަސައްކަތްތައް ހަނިކުރެވޭނެ ފަދަ ފުޅާ ދާއިރާއެއްގެ ދަތިކުރުމުގެ ފިޔަވަޅުތަކެއް އެކުލަވާލަމުންނެވެ. އެ ކޯޓުން ހާމަކޮށްފައިވާ ގޮތުގައި، މި ފިޔަވަޅުތަކުގެ ސަބަބުން އެމެރިކާ ޑޮލަރުން ކުރާ އެންމެހައި މާލީ މުއާމަލާތްތައް ހިންގުން އެކީގައި މަނާވެގެންދާނެއެވެ.
މި ފިޔަވަޅުތަކުގެ ނޭދެވޭ އަސަރުތައް ކުރަން ފަށާފައިވާއިރު، އެމެރިކާގެ ފިޔަވަޅުތަކުން ރައްކާތެރިވުމުގެ ގޮތުން އައިސީސީން ވަނީ އެ ކޯޓަށް ސިއްހީ އިންޝުއަރެންސް ފޯރުކޮށްދެމުންދިޔަ "އެކްސާ" ކުންފުންޏާއެކު ހެދި އެއްބަސްވުން އުވާލާފައެވެ. "ފައިނޭންޝަލް ޓައިމްސް" އިން ރިޕޯޓުކޮށްފައިވާ ގޮތުގައި، ކޯޓުގެ ތަރުޖަމާނަކު ވަނީ ދެފަރާތް އެއްބަސްވެގެން އެއްބަސްވުން އުވާލާފައިވާކަން ކަށަވަރުކޮށްދެއްވާފައެވެ. އަދި އައިސީސީން އާ ޚިދުމަތްތެރިއަކު ހޯދުމުގެ މަސައްކަތް ކުރަމުންދާ ކަމަށް ބުންޏެވެ.
އެކްސާ ކުންފުނިން ބުނެފައިވަނީ މި ނިންމުން ނިންމީ އެމެރިކާގެ ދަތިކުރުމުގެ ފިޔަވަޅުތައް ބޯޑަރުތަކުން ބޭރަށް ހިންގުމުގެ ނުރައްކާ ބޮޑުވުމާއި، މައްސަލައިގެ ހުރި ނާޒުކުކަމަށް ބެލުމަށްފަހު ކަމަށެވެ. އދ. ގެ އާންމު މަޖިލީހުގައި ތަގުރީރު ކުރައްވަމުން ރައީސް ޓްރަމްޕް ވަނީ އައިސީސީއަކީ "ނުބައި" އަދި "ބާޠިލު" މުއައްސަސާއެއްގެ ގޮތުގައި ސިފަކުރައްވައި، އެ ކޯޓުގެ މެންބަރު އެންމެހައި ގައުމުތަކުން ކޯޓުން ވަކިވުމަށް ގޮވާލައްވާފައެވެ.
އެމެރިކާއިން ހިންގާފައިވާ ހަނގުރާމައިގެ ޖަރީމާތަކާ ހެދި އެ ކޯޓު އެމެރިކާ ސިފައިންގެ ފަހަތުން ހިނގައިދާނެ ބޮރު ބޮޑު ވެފައި ވެއެވެ.
އައިސީސީގެ އިސް ދިފާއީ ވަކީލު ގާޓް-ޔާން އަލެކްސަންޑާ ކްނޯޕްސް "ރިއާ ނޮވޮސްތީ" އޭޖެންސީއަށް މައުލޫމާތު ދެއްވަމުން ވިދާޅުވީ، އެމެރިކާގެ ބްލެކްލިސްޓުގައި އައިސީސީ ހިމެނިއްޖެނަމަ، އެ ކޯޓުގައި މިހާރު ކުރިއަށްދާ އެންމެހައި ޝަރުއީ މައްސަލަތައް މުޅިން ހުއްޓުމަކަށް އަންނާނެ ކަމަށެވެ.
އެމެރިކާއިން ވަނީ 2025 ވަނަ އަހަރު އައިސީސީގެ ބައެއް މަސްއޫލުވެރިންނާ ދެކޮޅަށް ދަތިކުރުމުގެ ފިޔަވަޅުތައް އަޅާފައެވެ. އޭގެ ތެރޭގައި ކޯޓުގެ ނުވަ ފަނޑިޔާރުންނާއި، ދެ ނައިބު ޕްރޮސެކިއުޓަރުންނާއި، ސަސްޕެންޑުކޮށްފައިވާ ޕްރޮސެކިއުޓަރު ކަރީމް ޚާންގެ އިތުރުން ޕްރޮސެކިއުޓަރުގެ އޮފީހުގެ މުއައްޒަފަކު ހިމެނެއެވެ.
މި ފިޔަވަޅުތަކާ ދެކޮޅަށް، މިދިޔަ ޖޫން މަހު ކެނެޑާގެ ފަނޑިޔާރު ކިމްބަރލީ ބްރޯސްޓް އަދި ފަނޑިޔާރު ރެއިން އަލާޕިނީ-ގޭންސޫ އާއި ސޮލޯމީ ބަލުންގީ ބޯސާ ވަނީ ނިއުޔޯކުގެ ފެޑެރަލް ކޯޓަކަށް ރައީސް ޓްރަމްޕާއި އޭނާގެ މަސްއޫލުވެރިންނާ ދެކޮޅަށް މައްސަލައެއް ހުށަހަޅުއްވާފައެވެ. އެ ފަނޑިޔާރުން ބަޔާންކުރެއްވި ގޮތުގައި އެމެރިކާގެ މި ނިންމުންތަކަކީ ޣައިރުގާނޫނީ ފިޔަވަޅުތަކެކެވެ.
