ޕާކިސްތާނުގެ ކަރާޗީގައި ހުންނަ މައި ސަރުކާރު ހޮސްޕިޓަލް، ޖިނާ ޕޯސްޓްގްރެޖުއޭޓް މެޑިކަލް ސެންޓަރު (ޖޭޕީއެމްސީ) ގެ ޒުވާން ޑޮކްޓަރުންނަށް މުސާރަ ނުލިބޭތާ ތިން މަސް ދުވަސް ވުމާ ގުޅިގެން، ހޮސްޕިޓަލުގެ އެޑްމިނިސްޓްރޭޝަނާއި ސިންދް ޕްރޮވިންސް ސަރުކާރާ ދެކޮޅަށް އިހުތިޖާޖެއް ފަށައިފި އެވެ.
މުސާރަ ނުލިބިގެން އިހުތިޖާޖުކުރާ ޑޮކްޓަރުން ވަނީ ޖޭޕީއެމްސީގެ އައުޓްޕޭޝަންޓް ޑިޕާޓްމަންޓް (އޯޕީޑީ) ކޮމްޕްލެކްސް ކުރިމައްޗަށް އެއްވެ، ހޮސްޕިޓަލް މެނޭޖްމަންޓާއި ސިންދް ސަރުކާރުގެ އިހުމާލާ ދެކޮޅަށް އަޑުއުފުލާފައެވެ. މުސާރަ ނުލިބި ދިގުލައިގެންދިޔަ ނަމަވެސް، ބަލިމީހުންނަށް ފަރުވާދިނުމުގެ މަސައްކަތް މެދުކެނޑުމެއްނެތި ކުރިއަށްދިޔަ ކަމަށާއި، ނަމަވެސް ކަމާބެހޭ އިދާރާތަކުން މައްސަލައިގެ މަސްއޫލިޔަތު އެކަކު އަނެކަކުގެ ބޮލުގައި އަޅުވަމުންދާ ކަމަށް ޑޮކްޓަރުން ބުނެއެވެ.
މި މައްސަލައިގައި ހޮސްޕިޓަލުގެ އެޑްމިނިސްޓްރޭޝަނުން ބުނަމުންދަނީ މައްސަލަ އުޅެނީ ސިންދް ސަރުކާރުގެ ތެރޭގައި ކަމަށެވެ. އަދި ސިންދް ސަރުކާރުގެ އޮފިޝަލުން މައްސަލައިގެ އިނގިލި ދިއްކުރައްވަނީ ހޮސްޕިޓަލުގެ މެނޭޖްމަންޓަށެވެ. މިއާއެކު ޑޮކްޓަރުން ތިބީ އިދާރީ ދެމެދުގައި ތަށިވެފައި ކަމަށް އެފަރާތްތަކުން ފާހަގަކުރެއެވެ.
މުސާރައިގެ މައްސަލަ ބޮޑުވެގެންދިޔައީ ސިންދް ސަރުކާރުން މި އަހަރުގެ މޭ މަހު ހައުސް އޮފިސަރުންނަށް މުސާރަ ދޫކުރުމުގެ ނިޒާމަށް ގެނައި ބަދަލަކާ ގުޅިގެންނެވެ. ކުރިން އޮންނަ އުސޫލުގެ ދަށުން ހޮސްޕިޓަލްތަކަށް ފައިސާ ޖަމާކުރުމަށްފަހު، ޑޮކްޓަރުންނަށް މުސާރަ ދެމުންދިޔައީ ބޭންކް ޗެކު މެދުވެރިކޮށެވެ. ނަމަވެސް އާ އުސޫލުގެ ދަށުން ޑޮކްޓަރުންގެ ބޭންކް އެކައުންޓްތަކަށް ސީދާ މުސާރަ ޖަމާކުރަންޖެހެއެވެ. އޮފިޝަލުން ވިދާޅުވާ ގޮތުގައި، މި އާ ނިޒާމުގެ ދަށުން ސިންދް އެކައުންޓަންޓް ޖެނެރަލް (އޭޖީ) އޮފީހަށް ޑޮކްޓަރުންގެ އައިޑީ ކާޑުގެ ކޮޕީއާއި ކުރީގެ މުސާރައިގެ މައުލޫމާތުތައް ހުށަހަޅަންޖެހުމުން އިދާރީ ލަސްތަކެއް ވަނީ ކުރިމަތިވެފައެވެ.
ސިންދް ޔަންގް ޑޮކްޓާސް އެސޯސިއޭޝަންގެ ރައީސް ޑރ. ޝާހިދު އަވާން ވިދާޅުވީ، ކުރިއަށް އޮތް މަދު ދުވަސްކޮޅެއްގެ ތެރޭގައި ނުލިބި ހުރި މުސާރަތައް ދޫނުކޮށްފިނަމަ އިހުތިޖާޖުތައް އިތުރަށް ވަރުގަދަކުރާނެ ކަމަށެވެ. އަދި ހޮސްޕިޓަލުގެ އެޑްމިނިސްޓްރޭޝަން ބްލޮކާއި ކައިރީގައިވާ މައި މަގުތަކަށް އިހުތިޖާޖު ފުޅާކުރާނެ ކަމުގެ އިންޒާރުވެސް އޭނާ ދެއްވިއެވެ. މީގެއިތުރުން، 2020 ވަނަ އަހަރަށްފަހު މުސާރައަށް އެއްވެސް ކުރިއެރުމެއް ލިބިފައިނުވާތީ، މުސާރަ ބޮޑުކޮށްދިނުމަށްވެސް ޑޮކްޓަރުން ވަނީ އެދިފައެވެ.
މި މައްސަލައިގައި ސިންދް ހެލްތު ޑިޕާޓްމަންޓުން ވަނީ ހޮސްޕިޓަލުގެ މެނޭޖްމަންޓުގެ އިހުމާލެއް އޮތް ކަމަށް ކުރެވޭ ތުހުމަތުތައް ދޮގުކޮށްފައެވެ. އެ މިނިސްޓްރީން ނެރުނު ބަޔާނެއްގައި ބުނެފައިވަނީ، މުސާރަ ލަސްވީ ސީދާ އެކައުންޓަށް ފައިސާ ޖަމާކުރާ އާ ނިޒާމަށް ބަދަލުވުމުގެ މަރުހަލާގައި އޭޖީ އޮފީހުގައި ވެންޑާ އެކައުންޓްތައް ހުޅުވުމުގެ މަސައްކަތް ކުރިއަށްދާތީ ކަމަށެވެ.
