ރައީސް ޑރ. މުޙައްމަދު މުޢިއްޒުގެ ސަރުކާރުން އިންޑިއަން އޯޝަންގެ ފުރަތަމަ ޒީރޯ ކާބަން "އީކޯ-ސިޓީ" ގެ ގޮތުގައި ތަރައްގީކުރުމަށް ނިންމާފައިވާ ރަސްމާލެ މުޅިން ހިއްކުމަށް ހޭދަވާނީ ގާތްގަނޑަކަށް 330 މިލިއަން ޑޮލަރު (5.1 ބިލިއަން ރުފިޔާ) ކަމަށް ސަރުކާރުން ހާމަކޮށްފިއެވެ. މިއީ 2024 ވަނަ އަހަރުގެ ޖެނުއަރީ މަހު ހައުސިންގ މިނިސްޓަރު ލަފާކުރެއްވި 500 މިލިއަން ޑޮލަރާއި 700 މިލިއަން ޑޮލަރާ އަޅާބަލާއިރު ވަރަށް ބޮޑު ކުޑަވުމެކެވެ.
މި އައު ހިސާބު ހާމަކުރައްވާފައިވަނީ ސަރުކާރުން ބޭއްވި 10 ވަނަ "އަހާ" ފޯރަމްގައި ހައުސިންގ އަދި އިންފްރާސްޓްރަކްޗަރ މިނިސްޓަރު ޑރ. ޢަބްދުﷲ މުއްޠަލިބެވެ. މިނިސްޓަރު ވިދާޅުވި ގޮތުގައި ކުރީގެ އަންދާޒާތައް ހަދާފައިވަނީ މާކެޓް ރޭޓްތަކަށާއި، ކުރީގެ ސަރުކާރުން ގުޅިފަޅާއި ގިރާވަރުފަޅު ހިއްކުމަށް ހޭދަވި ޚަރަދަށް ބަލައިގެންނެވެ. ނަމަވެސް މިފަހަރު ޚަރަދު ކުޑަވީ ދައުލަތުގެ ކުންފުނިތަކުން ކުއްޔަށް ނަގާފައިވާ ޑްރެޖަރުތައް މެދުވެރިކޮށް މަސައްކަތް ކުރުމާއި، ގިނަ ފައިސާ ދިވެހި ރުފިޔާއިން ދެއްކުމުގެ ސަބަބުން ބޭރު ފައިސާގެ ރިޒަރވަށް ކުރާ ބާރު ކުޑަވެގެން ކަމަށް އޭނާ ފާހަގަކުރެއްވިއެވެ.
މި މަޝްރޫއާ ގުޅިގެން އިދިކޮޅު ފަރާތްތަކުން ބުނަމުންދަނީ މަޝްރޫއުގެ ޖުމްލަ ޚަރަދު ގާތްގަނޑަކަށް 800 މިލިއަން ޑޮލަރަށް އަރާނެ ކަމަށެވެ.
ދުނިޔޭގެ މާކެޓުގައި ތެލުގެ އަގު އުފުލެމުންދާ މިފަދަ ދަނޑިވަޅެއްގައި، ޚަރަދު ކުޑަވި ސަބަބާ މެދު ބަުހުސްތައް އުފެދެއެވެ. ޚާއްސަކޮށް، އެމެރިކާއާއި އީރާނާ ދެމެދު އޮތް ނުތަނަވަސްކަމާއި، ހުރުމުޒު ކަނޑުއޮޅި ސަރަހައްދުގައި ދަތުރުފަތުރަށް ހުރަސްއެެމުންދިއުމުގެ ސަބަބުން ތެލުގެ އަގު މައްޗަށް ގޮސްފައިވާކަން ފާހަގަކުރެވެއެވެ.
މި މަޝްރޫއުގެ އެއްބަސްވުމުގެ ދަށުން، ދުބާއީގެ އީގަލް ހިލްސް ކުންފުންޏަށް ދޫކޮށްފައިވާ 500 ހެކްޓަރުގެ ބިމުގައި 8,800 ޕްރޮޕަޓީއާއި، ހޮޓާތަކާއި، މެރީނާއެއް ތަރައްގީކުރުމަށް ހަމަޖެހިފައިވެއެވެ.
މިނިސްޓަރު ވިދާޅުވި ގޮތުގައި މި ކުންފުންޏަށް ބިން ދޫކޮށްފައިވަނީ އެއްވެސް ބިމުގެ ކުއްޔެއް ނުވަތަ އެކުއިޒިޝަން ފީއެއް ނުނަގާ ގޮތަށެވެ. އޭގެ ބަދަލުގައި ފުރަތަމަ ވިއްކާ މުޢާމަލާތްތަކުން ލިބޭ އާމްދަނީގެ 10 އިންސައްތަ ދައުލަތަށް ލިބޭނެ ކަމަށް ލަފާކޮށްފައިވެއެވެ.
މި މަޝްރޫއާ ގުޅޭގޮތުން ރައީސް ޑރ. މުޢިއްޒު ވިދާޅުވީ، މިކަމާ ގުޅޭގޮތުން ޢާންމު ފެންނަ ނުފެންނަ ވޯޓެއް ނުނަގާނެ ކަމަށާއި، މިހާރު ހުށަހަޅާފައިވާ ބިލުން ރައްޔިތުންގެ ޙައްޤުތަކާއި ޤައުމުގެ ސިޔާދަތު ފުރިހަމައަށް ރައްކާތެރިކޮށްދީފައިވާނެ ކަމަށެވެ.
އިދިކޮޅު އެމްޑީޕީން ވަނީ މި މަޝްރޫއާ ގުޅޭގޮތުން ރެފަރެންޑަމެއް ބޭއްވުމަށް ގޮވާލާފެވެ. ޚާރިޖީ ވަޒީރު ޑރ. އިރުތިޝާމް އާދަމް ވެސް އަހާ ފޯރަމްގައި ވިދާޅުވީ މިފަދަ މަޝްރޫއުތަކަށް ސިޔާސީ ފަރާތްތަކުން ކިޔާ ފާޑުކިޔުންތަކުގެ ސަބަބުން ކޮންޓްރެކްޓަރުގެ ގައުމާއެކު އޮތް ޑިޕްލޮމެޓިކް ގުޅުންތަކަށް ނުރައްކާވެދާނެ ކަމަށެވެ.
