ރާއްޖޭގެ ތާރީޚުގައި ކުރިއަށް ގެންދިޔަ އެންމެ ފުރަތަމަ އަދި އެންމެ ބިޔަ އިމާރާތް ކުރުމުގެ މަޝްރޫޢަށް 40 އަހަރު ފުރިއްޖެއެވެ. ރައީސް މައުމޫނު ޢަބްދުލްޤައްޔޫމުގެ ވެރިކަމުގައި ކުރިއަށް ގެންދެވި އިސްލާމީ މަރުކަޒުގެ މަސައްކަތަކީ އެހާތަނަށް ރާއްޖޭގައި ކުރިއަށް ގެންދެވުނު އިމާރާތް ކުރުމގެ އެންމެ ބިޔަ މަޝްރޫޢެވެ. ގިނަ ބަޔަކަށް އައު ހުނަރުތަކެއް އެ މަޝްރޫޢުން ދަސްވިއެވެ.
އިސްލާމީ މަރުކަޒަށް 40 އަހަރު ފުރުން ކުލަގަދަކޮށް ފާހަގަކުރުމަށް ސަރުކާރުން ވަނީ ނިންމަވާފައެވެ.
ރައީސް މައުމޫންގެ ވެރިކަމުގައި އިސްލާމީ މަރުކަޒު އިފްތިތާޙު ކޮށްފައި ވަނީ، ނޮވެމްބަރު 11، 1984 ގައެވެ. އެ އިޙުތިފާލަށް ބޭރުގެ އިއްޒަތްތެރިންގެ ގިނަ ބޭފުޅުންތަކެއް ރާއްޖެ ވަޑައިގަތެވެ. އޭގެ ތެރޭގައި ބުރުނާއިގެ ރަސްގެފާނު ހަސަނުލްބުލްޤިޔާއާއި ޝެއިޚުލްއަޒުހަރާއި އެފަދަ މަތީފެންވަރުގެ އެތައް ބޭފުޅުންނެއް ހިމެނުނެވެ.
އިސްލާމީ މަރުކަޒު ބިނާ ކުރައްވާފައި ވަނީ، 4،500 މީހުންނަށް ނަމާދުކުރެވޭ ޖާގަ ތަނަވަސް މިސްކިތަކާއި ފަސް ކުލާހާއި ލައިބްރަރީއަކާއި ބޮޑު ކޮންފަރެންސް ހޯލެއް ހިމަނައިގެންނެވެ. ބޮޑު ލައިބްރަރީއެއް ހުރި އިސްލާމީ މަރުކަޒުގެ ލައިބްރަރީ ވަނީ މަޑުމަޑުން ހުލިވަމުންގޮސް ހުލިވެފައެވެ.
