ފިލްމްމޭކަރ އޯމް ރާއުޓް ވަނީ އިންޑިއާގެ 11 ވަނަ ރައީސް އަދި މަޝްހޫރު ސައިންޓިސްޓް ޑރ. އޭ.ޕީ.ޖޭ އަބްދުލް ކަލާމްގެ ބައޯޕިކް "ކަލާމް: ދަ މިސައިލް މޭން އޮފް އިންޑިއާ" ގައި އެކްޓަރު ދަނުޝް ކާސްޓްކުރި ސަބަބު ހާމަކޮށްދީފައެވެ. 78 ވަނަ ކާން އިންޓަނޭޝަނަލް ފިލްމް ފެސްޓިވަލްގައި ބައިވެރިވުމަށް ދިޔުމަށްފަހު، އޭނާ ވަނީ މި ފިލްމުގެ ޕޯސްޓަރު ދައްކާލާފައެވެ.
ރާއުޓް ވަނީ އިންޑިއާގެ ކުރީގެ ރައީސް އަދި އެއަރޯސްޕޭސް ސައިންޓިސްޓްގެ ބައޯޕިކް އަށް އޭނާގެ ވިޝަން އަދި ދަނުޝް މައި ރޯލްގައި ކާސްޓްކުރި ސަބަބު ހިއްސާކޮށްފައެވެ. މި ބައޯޕިކްގައި ބައިވެރިވުމަށް ދަނުޝް ނިންމި ކަމަށްޓަކައި އޭނާ ވަނީ ޝުކުރު އަދާކޮށްފައެވެ.
"ރާންޖަނާ" އެކްޓަރުގެ އެކްޓިންގ ހުނަރަށް ތަޢުރީފުކޮށް، އާޓިސްޓެއްގެ ގޮތުން އޭނާ ގެންނަ ހުނަރުވެސް ރާއުޓް ފާހަގަ ކުރިއެވެ.
"ޑރ. އޭ.ޕީ.ޖޭ އަބްދުލް ކަލާމް ސިފަކުރާއިރު، އެ ރައިސްގެ ކާމިޔާބީތަކުގެ އިތުރުން، ރޫޙާނީ ދަތުރާއި އުނގަންނައިދެއްވި ކަންކަން ވެސް ސިފަކުރުމަކީ މުހިންމު ކަމެކެވެ. އެއީ މިފަދަ ބައޯޕިކްއެއްގެ އެންމެ ގޮންޖެހުންތެރި ބައެވެ. އަދި މި ރޫޙާނީ އަދި ފިކުރީ މުއްސަނދިކަން ސްކްރީނުގައި ދިރުވުމަށް ދަނުޝްއަށް ވުރެ ރަނގަޅު ޗޮއިސްއެއް އޮތް ކަމަކަށް އަހަރެން ނުދެކެމެވެ. އޭނާއަކީ ވަރަށް ރަނގަޅު ފިޓެކެވެ. އަދި އަހަރެންގެ މުޅި ޓީމުގެ ފަރާތުން، މި މުހިންމު ޕްރޮޖެކްޓްގައި ބައިވެރިވުމަށް ނިންމި ކަމަށްޓަކައި އޭނާއަށް ޝުކުރު އަދާކުރަމެވެ" ރާއުޓްއާ ހަވާލާ ދީ މީޑިއާގައި ބުނެއެވެ.
ޑރ. ކަލާމް ތަމްސީލުކުރެއްވި އަގުތަކާއި އުނގަންނައިދެއްވި ކަންކަމުގެ މުހިންމުކަން ރާއުޓް ވަނީ ފާހަގަކޮށްފައެވެ. ކުރީގެ ރައީސް އޭނާގެ މަސައްކަތުގައި "އިންޑިއާ ފަސްޓް" ގެ ޚިޔާލު ކުރިއެރުވި ކަމަށް ބުނެއެވެ. ޑރ. ކަލާމްގެ ދިރިއުޅުއްވުން ބިނާވެފައިވަނީ މައިގަނޑު ތިން ކަމެއްގެ މައްޗަށެވެ. ފުރަތަމަ ކަމައީ ތަޢުލީމެވެ. ދެވަނައަށް ކިޔަވައި ދިނުމެވެ. އަދި ތިން ވަނައަށް އީޖާދުކުރުމެވެ.
