އެމެރިކާގެ ޓްރެޜަރީ ޑިޕާޓްމަންޓުން ވަނީ ރަޝިޔާގެ އެންމެ ބޮޑު ޕޭމެންޓް ގޭޓްވޭ އޭ7 އާ ދެކޮޅަށް ދަތިކުރުިުގެ ފިޔަވަޅު އަޅާފައެވެ. އަދި އެމެރިކާއިން ވަނީ އެ ޕްލެޓްފޯމާއެކު އެއްވެސް މުއާމަލާތެއް ކުރުން މަނާކޮށްފައެވެ. އަދި އީރާނަށާއި ސައިބަރ ކުށްވެރިންނަށް ޣައިރުޤާނޫނީ ބައިނަލްއަޤްވާމީ މުއާމަލާތްތައް ހިންގުމަށް އެހީތެރިވެދޭ ކަމަށް ބުނެ އެ ޕްލެޓްފޯމަކީ "ބައިނަލްއަޤްވާމީ ޖަރީމާތައް ހިންގާ ޖަމާޢަތެއް" ގެ ގޮތުގައި އެމެރިކާއިން ވަނީ ކަނޑައަޅާފައެވެ.
"A7 އަށް އަމާޒުކޮށް މިއަދު އެޅި ފިޔަވަޅަކީ އީރާނާއި އެގައުމަށް މާލީގޮތުން އެހީތެރިވާ ފަރާތްތައް އެކަހެރިކުރުމަށް ޓްރެޜަރީން ކުރަމުންދާ އާދަޔާޚިލާފު މަސައްކަތްތަކުގެ ތެރެއިން ކުރިއަށްދިޔަ ކަމެއް," ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވިއެވެ.
ޓްރެޜަރީގެ ފައިނޭންޝަލް ކްރައިމްސް އެންފޯސްމަންޓް ނެޓްވޯކާއި އޮފީސް އޮފް ފޮރިން އެސެޓްސް ކޮންޓްރޯލް އިން ތުހުމަތުކުރާ ގޮތުގައި A7 އިން ވަނީ ހުޅަނގުގެ ބޭންކިންގ ފިޔަވަޅުތަކުން ރެކުމަށްޓަކައި ވަގު ކުންފުނިތަކާއި "ސަބް-އޭޖެންޓުން" ގެ ބޮޑު ބައިނަލްއަޤްވާމީ ނެޓްވޯކެއް އުފައްދާފައެވެ.
އެމެރކާ ބުނަނީ A7 ނެޓްވޯކުން ވަނީ އީރާނުގެ ސެންޓްރަލް ބޭންކަށާއި، އައިއާރްޖީސީގެ އިތުރުން ތެލާއި ހަތިޔާރު ވަގަށް އެތެރެކުރާ ނެޓްވޯކްތަކަށް ސިއްރު ބޭންކިންގ މަގުތައް ބޭނުންކޮށްގެން ޣައިރުޤާނޫނީ ގޮތުން ފައިސާ ދައުރުކުރުމަށް މަގުފަހިކޮށްދީފައެވެ.
މީގެ އިތުރުން A7 ނެޓްވޯކުން ސައިބަރ ކުށްވެރިންނަށް އެހީތެރިވެދީފައިވާ ކަމަށްވެސް ޓްރެޜަރީން ތުހުމަތުކުރެއެވެ.
ޓްރެޜަރީގެ އޮފިޝަލުން ދައުވާކުރައްވާ ގޮތުގައި 2025 ޖަނަވަރީ އާއި 2026 ޖޫން މަހާ ދެމެދު A7 ގެ ސަބް-އޭޖެންޓުން ވަނީ 17 ބިލިއަން ޑޮލަރަށްވުރެ ގިނަ ބައިނަލްއަޤްވާމީ މުއާމަލާތްތައް ހިންގާފައެވެ.
ދިފާއީ ދާއިރާއަށް ހާއްސަ ބޭންކެއް ކަމަށްވާ ޕްރޮމްސްވިއާޒްބޭންކުން 2024 ވަނަ އަހަރު އުފެއްދި A7 އަކީ، ރަޝިޔާގެ މައިގަނޑު ވިޔަފާރި ބައިވެރިންނާއެކު ސްވިފްޓް ނިޒާމުގެ ބަދަލު ފައިސާ ފޮނުވުމުގެ މަގެވެ.
މަނީ ލޯންޑަރިންގ މައްސަލައެއްގައި މޮލްޑޯވާގައި 15 އަހަރުގެ ޖަލު ހުކުމެއް އައިސްފައިވާ މޮލްޑޯވާގެ ވިޔަފާރިވެރިޔާ އިލާން ޝޯރ އަކީ މި ކުންފުނީގެ 51 އިންސައްތަ ހިއްސާދާރެވެ. ޝޯރ މޮލްޑޯވާއިން ފިލައިގެން އެންމެ ފުރަތަމަ ދިޔައީ އިސްރާއީލަށެވެ. އަދި އޭގެ ފަހުން ރަޝިޔާއަށެވެ.
ވޮޝިންގޓަން ޕޯސްޓުން ކުރި ތަޙުޤީޤަކުން ރިޕޯޓުކޮށްފައިވާ ގޮތުގައި ރަޝިޔާގެ ފެޑެރަލް ސެކިއުރިޓީ ސަރވިސް އިން ވަނީ ޝޯރ އާއެކު ގާތުން މަސައްކަތްކޮށް، އޭނާގެ ސިޔާސީ ހަރަކާތްތަކަށް މާލީ އެހީތެރިކަން ފޯރުކޮށްދީފައެވެ.
އެމެރިކާއިން ވަނީ މޮލްޑޯވާގެ ހަމަޖެހުން ނަގާލުމަށް އަމާޒުކޮށްގެން ހިންގި ހަރަކާތްތަކާ ގުޅިގެން 2022 ވަނަ އަހަރު ޝޯރ އާއި އޭނާގެ އަންހެނުން، ރަޝިޔާގެ ލަވަކިއުންތެރިޔާ ޖެސްމިންއާ ދެކޮޅަށް ފިޔަވަޅުތައް އަޅާފައެވެ. ޝޯރ އަކީ ޔޫރަޕިއަން ޔޫނިއަން އާއި އިނގިރޭސިވިލާތުގެ ފިޔަވަޅުތައްވެސް އެޅިފައިވާ މީހެކެވެ.
