ރަޝިޔާގެ އިގްތިސާދަށް ކުރިމަތިވެފައިވާ ގޮންޖެހުންތަކުން އަރައިގަތުމަށާއި ގައުމުން ބޭރަށް ނަގުދު ފައިސާ ދައުރުވުން ހުއްޓުވުމުގެ ގޮތުން، އެ ގައުމުން ބޭރަށް އެކަކަށް ގެންދެވޭނެ ނަގުދު ފައިސާގެ އަދަދު އެއް މިލިއަން ރޫބަލް (ގާތްގަނޑަކަށް 11,850 އެމެރިކާ ޑޮލަރު) އަށް ލިމިޓްކުރާ ގަރާރެއްގައި ރަޝިޔާގެ ރައީސް ފްލަޑިމީރް ޕޫޓިން ސޮއިކުރައްވައިފިއެވެ.
ރަޝިޔާގެ މީޑިއާ ރިޕޯޓްކޮށްފައިވާ ގޮތުގައި، މި ގަރާރުގެ ދަށުން ޔޫރޭޝިއަން އިކޮނޮމިކް ޔޫނިއަން (އީއޭއީޔޫ) ގެ ގައުމުތަކުގެ އިތުރުން އަޒަރުބައިޖާން، ތަޖިކިސްތާން އަދި އުޒްބެކިސްތާނަށް ފަރުދުންގެ އަތުން ނަގުދު ފައިސާ ބޭރުކުރެވޭނެ އެންމެ މަތީ އަދަދަކީ 1 މިލިއަން ރޫބަލްއެވެ. މީގެ އިތުރުން، ކުންފުނިތަކާއި އަމިއްލަ ވިޔަފާރިވެރިން އަޒަރުބައިޖާން، ތަޖިކިސްތާން އަދި އުޒްބެކިސްތާނަށް ނަގުދު ފައިސާ ގެންދިއުން ވަނީ އަދަދަކަށް ބެލުމެއް ނެތް ގޮތަށް އާންމު އުސޫލުން މަނާކޮށްފައެވެ. އަދި ސާފުކޮށްފައިވާ ރަން ބޭރަށް ގެންދިއުމަށް ވެސް މި ގަރާރުގެ ދަށުން ވަނީ ކޮންޓްރޯލްތަކެއް ކުރިމަތިކުރުވާފައެވެ.
މި ގަވާއިދުގެ ދަށުން ބައެއް ޚާއްސަ ހާލަތްތަކުގައި ފައިސާ ބޭރުކުރުމުގެ ހުއްދަ ދިނުމަށް ވަނީ ނިންމާފައެވެ. އެގޮތުން، ރަޝިޔާގެ ސަރުކާރުން ކަނޑައަޅާ އިންޓަނޭޝަނަލް އެއާޕޯޓްތައް މެދުވެރިކޮށް، އެ ފައިސާއަކީ ބޭންކް އެކައުންޓަކުން ނަގާފައިވާ ފައިސާކަން އަންގައިދޭ ބޭންކް ސްޓޭޓްމަންޓް ހުށަހެޅުމުން ފައިސާ ގެންދެވޭނެއެވެ. މީގެ އިތުރުން، ބޭރު ގައުމުތަކުގައި ހުންނަ ރަޝިޔާގެ ޑިޕްލޮމެޓުންނާއި ކޮންސިއުލާ މިޝަންތަކުގެ ބޭނުންތަކަށް ބޭނުންވާ ފައިސާ ގެންދިއުން ވެސް މި ގަރާރުގެ ދަށުން ވަނީ އިސްތިސްނާކޮށްފައެވެ.
ރަޝިޔާގެ މީޑިއާ ބުނާ ގޮތުގައި، ފަރުދުން މިއެންގުމާ ޚިލާފްވެއްޖެނަމަ 1 މިލިއަން ރޫބަލްއަށްވުރެ އިތުރުވާ ބައި ދައުލަތަށް ނަގާނެއެވެ. އަދި ކުންފުނިތަކާއި އަމިއްލަ ވިޔަފާރިވެރިން މިއުސޫލާ ޚިލާފުވެއްޖެނަމަ، އެމީހުން ބޭރުކުރަން އުޅުނު މުޅި ފައިސާ ދައުލަތަށް ނެގުމުގެ ބާރު ގާނޫނުން ލިބިދެއެވެ. މި ގަރާރާ ގުޅިގެން ރަޝިޔާގެ ސަރުކާރާއި ސެންޓްރަލް ބޭންކް ގުޅިގެން، ބޭރަށް ގެންދެވޭ ނަގުދު ފައިސާގެ ހިސާބުތައް ބަލަހައްޓައި ރެކޯޑްކުރާނެ ނިޒާމެއް ކުރިއަށް އޮތް ތިން މަސްދުވަހުގެ ތެރޭގައި އެކުލަވާލުމަށް ވަނީ ހަވާލުކޮށްފައެވެ.
މި ނިންމުމަކީ ރަޝިޔާއިން ބޭރަށް ނަގުދު ރޫބަލް ދައުރުވުން ހުއްޓުވުމާ މެދު ސަރުކާރުގެ ތެރޭގައި ބަހުސްތަކެއް ކުރެވުމަށްފަހު ނިންމި ނިންމުމެކެވެ. ރަޝިޔާގެ ޑެޕިއުޓީ ފައިނޭންސް މިނިސްޓަރު އަލެކްސީ މޮއިސީވް މީގެ ކުރިން ވިދާޅުވެފައިވަނީ، އީއޭއީޔޫގެ ގައުމުތަކަށް ބޮޑެތި އަދަދުތަކުން ނަގުދު ފައިސާ އޮހެމުންދާ ތަން ފެންނަން ނެތް ކަމަށެވެ. ނަމަވެސ ބޭރަށް ގެންދަން އުޅުނު ބައެއް ނަގުދު ފައިސާ ހުއްޓުވައި، ދައުލަތަށް ނަގާފައިވާކަން އޭނާ ވަނީ ފާހަގަކުރައްވާފައެވެ.
އީއޭއީޔޫގެ ތެރޭގައި ހިމެނެނީ ރަޝިޔާ، ބެލާރުސް، ކަޒަކިސްތާން، އަރްމީނިއާ އަދި ކިރްގިޒްސްތާންއެވެ. ހުޅަނގުގެ ގައުމުތަކުން ކުރިމަތިކުރުވާފައިވާ އިގްތިސާދީ ފިޔަވަޅުތަކުގެ ސަބަބުން ރަޝިޔާއިން ދަނީ އިގްތިސާދީ މަސްރަހު ބަދަލުކޮށް، އޭޝިއާގެ ގައުމުތަކާ އެކު އޮންނަ ގުޅުން ބަދަހިކުރުމުގެ ސްޓްރެޓެޖީއެއް ބޭނުންކުރަމުންނެވެ.
