އިންޑިއާގެ ޑިފެންސް ރިސާޗް އެންޑް ޑިވެލޮޕްމަންޓް އޯގަނައިޒޭޝަން (ޑީއާރުޑީއޯ) އިން ކުއަންޓަމް ޓެކްނޮލޮޖީ އުފެއްދުމަށް ބޭނުންވާ ޚާއްސަ ވަސީލަތެއް ގައުމީ ފެންވަރުގައި ތަރައްގީކުރުމަށްޓަކައި 500 ބިލިއަން ރުޕީސްގެ އަގުހުރި ބޮޑު އެއްބަސްވުމެއްގައި ސޮއިކޮށްފިއެވެ. މިއީ އެ ގައުމުގެ ޓެކްނޮލޮޖީ ޑިވެލޮޕްމަންޓް ފަންޑު (ޓީޑީއެފް) ސްކީމުގެ ދަށުން "ޑީޕް-ޓެކް" ދާއިރާއިން ސޮއި ކުރި އެންމެ ބޮޑު އެއްބަސްވުމެވެ.
ނިއުދިއްލީ ގައި ބޭއްވި ޚާއްސަ ރަސްމިއްޔާތެއްގައި މި އެއްބަސްވުމުގައި ސޮއިކުރީ ޑީއާރުޑީއޯއާއި އަމިއްލަ ކުންފުންޏެއް ކަމަށްވާ "ޒީރޯ އެމްކޭ އިންޑިއާ ޕްރައިވެޓް ލިމިޓެޑް" ގެ ވެރިންނެވެ. މި މަޝްރޫއުގެ މައިގަނޑު މަގުސަދަކީ ކުއަންޓަމް ޓެކްނޮލޮޖީގެ އެކި ކަންކަމަށް ބޭނުންވާ 20 މިލިކެލްވިން (އެމްކޭ) ގެ "ޑައިލޫޝަން ރެފްރިޖަރޭޓަރެއް" އިންޑިއާގައި އަމިއްލައަށް އުފެއްދުމެވެ.
ޑައިލޫޝަން ރެފްރިޖަރޭޓަރަކީ އާދަޔާ ޚިލާފަށް މަތީ މިންވަރަކަށް ފިނިހޫނުމިން ދަށްކޮށްދޭ، ކްރަޔޯޖެނިކްސް ދާއިރާގެ ޚާއްސަ ނިޒާމެކެވެ. ކުއަންޓަމް ކޮމްޕިއުޓިންގ މައިދާން ގައި ބޭނުންކުރާ ތަފާތު ޕްލެޓްފޯމްތަކާއި އެނޫންވެސް އެޑްވާންސްޑް ކުއަންޓަމް ޓެކްނޮލޮޖީތައް މަސައްކަތްކުރަނީ އަދި އެތަކެތި ޓެސްޓުކުރެވެނީ މިފަދަ އިންތިހާއަށް ފިނިހޫނުމިން ދަށް މާހައުލުތަކެއްގައެވެ.
ކްރަޔޯޖެނިކްސްއަކީ ނުހަނު ގަދައަށް ފިނިކޮށްފައިވާ އިންތިހާއަށް ފިނި މާހައުލުގައި މާއްދާތައް އުފެއްދުމާއި، އެ މާއްދާތަކަށް އަންނަ ބަދަލުތަކާއި ސުލޫކު ދިރާސާކޮށް ބޭނުންކުރާ ސައިންސާއި ޓެކްނޮލޮޖީގެ ގޮފިއެވެ.
މި 5 ބިލިއަން ރުޕީސްގެ ފަންޑުގެ އެއްބަސްވުމަކީ، އެ ގައުމުގެ "ނޭޝަނަލް ކުއަންޓަމް މިޝަން" ގެ އަމާޒުތަކާ އެއްގޮތްވާ ގޮތުގެ މަތިން ނިންމުނު ނިންމުމެކެވެ. މީގެ މައިގަނޑު ބޭނުމަކީ ކުއަންޓަމް ޓެކްނޮލޮޖީއާއި، އެޑްވާންސްޑް ކްރަޔޯޖެނިކްސް އަދި އެހެނިހެން ސްޓްރެޓެޖީ ދާއިރާތަކުން އިންޑިއާގެ ގާބިލުކަން އިތުރުކުރުމެވެ. އަދި ބޭރު ގައުމުތަކުން އެތެރެކުރާ ކްރަޔޯޖެނިކް ވަސީލަތްތަކަށް ބަރޯސާވާ މިންވަރު ކުޑަކޮށް، ގައުމީ ފެންވަރުގައި މިފަދަ ޓެކްނޮލޮޖީތައް ކުރިއަރުވައި ވަރުގަދަކުރުމެވެ.
މި މަޝްރޫގެ ސަބަބުން ކުރިއަށް އޮތް ތަނުގައި ޑީއާރުޑީއޯ އާއި އަމިއްލަ ކުންފުނިތަކާ ދެމެދު އުފެދޭ ގުޅުންތަކަށް އާ ދިރުމެއް ލިބިގެންދާނެއެވެ.
