އިންޑިއާއިން އެކުލަވާލަމުންދާ ހައި-ސްޕީޑް ރެއިލް ނެޓްވޯކަށް ބޭނުންވާ ޓެކްނޮލޮޖީ އެހެން ޤައުމުތަކަށް ބަރޯސާވުން ކުޑަކުރުމުގެ ގޮތުން، ގަޑިއަކު 350 ކިލޯމީޓަރުގެ ބާރުމިނުގައި ދުއްވުމުގެ ޤާބިލުކަން ލިބިގެންވާ "ބީ35″ މޮޑެލްގެ ބުލެޓް ޓްރޭން އަމިއްލައަށް އުފެއްދުމުގެ އަމަލީ މަސައްކަތް އެ ޤައުމުގެ ރެއިލްވޭސްއިން ފަށައިފިއެވެ. 2030 ވަނަ އަހަރާ ހަމައަށް އަމިއްލަ އުފެއްދުންތެރިކަމުގެ ހައި-ސްޕީޑް ޓްރޭންތައް ރޭލު ދަގަނޑަށް ނެރުމަށް އަމާޒުހިފާފައިވާއިރު، މިއީ އެ ޤައުމުގެ ދަތުރުފަތުރުގެ ދާއިރާއަށް އަންނާނެ ބޮޑު އިގްތިސާދީ އަދި ފަންނީ ކުރިއެރުމެކެވެ.
މި މަޝްރޫޢުގެ ދަށުން ކުރިއަށްދާ މުމްބާއީ-އަހުމަދުއާބާދު ހައި ސްޕީޑް ރެއިލް (އެމްއޭއެޗްއެސްއާރު) މަޝްރޫޢުގެ ބަޖެޓު ބޮޑުކުރުމަށް އިންޑިއާގެ ސަރުކާރުން ވަނީ ނިންމާފައެވެ. 2015 ވަނަ އަހަރު އަންދާޒާކުރި އަދަދަށްވުރެ ދެގުނަ އިތުރުވެ، މި މަޝްރޫޢުގެ މުޅި ޚަރަދު މިހާރު ވަނީ 2 ލައްކަ ކްރޯޑު އިންޑިއަން ރުޕީސްއަށްވުރެ މަތިވެފައެވެ. މީގެ ތެރެއިން 1 ލައްކަ ކްރޯޑު ރުޕީސް ހަމަޖައްސައިދެނީ މަރުކަޒީ ސަރުކާރުގެ ބަޖެޓުގެ ތެރެއިންނެވެ.
އިންޑިއާއިން އަމިއްލަ "ބީ35″ ބުލެޓް ޓްރޭން އުފެއްދުމުގެ މަސައްކަތް އަވަސްކޮށްފައިވަނީ، ކުރިން ބޭނުންކުރަމުން އައި ޖަޕާނުގެ "އީ5″ ސީރީޒްގެ ޓްރޭންތައް އުފެއްދުން މަޑުމަޑުން ހުއްޓާލުމަށް 2024 ވަނަ އަހަރުގެ ޑިސެމްބަރު މަހު ޖަޕާނުން ނިންމުމާ ގުޅިގެންނެވެ. ޖަޕާނުން އާ "އީ10″ ސީރީޒްގެ ޓްރޭންތައް އުފައްދަން ފަށާނީ 2030 ގައި ކަމަށާއި، ޚިދުމަތަށް ނެރެވޭވަރު ވަނީ 2034 ގައި ކަމަށްވާތީ، އިންޑިއާގެ ކަމާބެހޭ އިދާރާތަކުން ދަނީ އެ މުއްދަތުގައި އަމިއްލަ އުފެއްދުންތަކަށް އިސްކަންދިނުމަށް ސްޓްރެޓެޖީ ބަދަލުކުރަމުންނެވެ.
މީގެއިތުރުން، ގަޑިއަކު 280 ކިލޯމީޓަރުގެ ބާރުމިނުގައި ދުވާ "ބީ28″ މޮޑެލްގެ ޓްރޭންތައް އިންޓެގްރަލް ކޯޗް ފެކްޓަރީ (އައިސީއެފް) އާއި ބާރަތު އާތު މޫވާސް ލިމިޓެޑް (ބީއީއެމްއެލް) ގުޅިގެން އަންނަނީ ފަރުމާކުރަމުންނެވެ. އަދި ރޭލުތަކުގެ ސަލާމަތީ ކަންކަން ބެލެހެއްޓުމަށާއި، ދުވެލި ކޮންޓްރޯލްކޮށް، ދެ ރޭލު ދެމެދުގައި ރައްކާތެރި އިންތިޒާމެއް ހަމަޖެއްސުމަށްޓަކައި "ބާރަތު ޓްރޭން ކޮންޓްރޯލް ސިސްޓަމް" (ބީޓީސީއެސް) ގެ ނަމުގައި ޚާއްސަ ސިގްނަލިންގ ސިސްޓަމެއްވެސް އަންނަނީ ތަރައްޤީކުރަމުންނެވެ. މިއީ ޗައިނާގައި ބޭނުންކުރާ ސީޓީސީއެސް ސިސްޓަމާ އެއްފަދަ ޓެކްނޮލޮޖީއެކެވެ.
ޖުމްލަ 508 ކިލޯމީޓަރުގެ ދިގުމިނުގެ އެމްއޭއެޗްއެސްއާރު ރޫޓު ގުޖުރާތާއި، މަހާރާޝްޓްރާ އަދި ދާދުރާ އެންޑް ނާގަރު ހަވެލީ ހުރަސްކުރާއިރު، މުޅިއެކު 12 ސްޓޭޝަނެއް ޤާއިމުކުރުމަށް ވަނީ ހަމަޖެހިފައެވެ. މީގެ ތެރޭގައި މުމްބާއީ، ތާނޭ، ސޫރަތު، ވަޅޯދްރާ އަދި އަހުމަދުއާބާދު ފަދަ މުހިންމު ސިޓީތައް މި މަގުގައި ހިމެނެއެވެ.
