އެފްރިކާގެ ސިޔާސީ ޗާޓުން މިއަހަރު ފެންނަނީ ބޮޑެތި ބާރުތަކުން އެ ބައްރާ މެދު ގެންގުޅޭ އުސޫލުތައް ވަރަށް ތަފާތުކޮށެވެ. ރަޝިޔާއިން ދަނީ ސަލާމަތީ ކަންކަމަށް ފޯކަސް ކޮށްގެން ޓެރަރިޒަމާ ދެކޮޅަށް މަސައްކަތް ކުރާ ހަނގުރާމަވެރި ކުލީ ސިފައިން ފޯރުވައި ދެމުންނެވެ. އަދި ޗައިނާއިން ދަނީ އެފްރިކާއިން މައުދަންތައް ނެގުމުގެ މަސައްކަތް ކުރަމުންނެވެ. މި ބާރާއި ޚިލާފަށް، އިންޑިއާއިން ދަނީ ހިމޭން ކަމާއެކު ސަރުކާރުން ސަރުކާރަށް އެއްބާރުލުން ދިނުމުގައި މަސައްކަތް ކުރަމުންނެވެ. އިންޑިއާގެ އެފްރިކާ އެންގޭޖްމެންޓު ވަނީ ދެ ގުނައަށް އިތުރު ވެފައެވެ.
އިންޑިއާ އިން ދަނީ ހޮސްޕިޓަލްތައް ބިނާކޮށް، ކަނޑުގެ ސިފައިން ތަމްރީނުކޮށް، ކުދި ވިޔަފާރިތަކަށް ފައިނޭންސްކޮށް، އަގުހެޔޮކޮށް ވެކްސިން ފޯރުކޮށް ދެމުންނެވެ. ޗައިނާ އާއި ރަޝިޔާއާ ހިލާފަށް އިންފްރާސްޓްރަކްޗާ ލޯނާއި ސެކިއުރިޓީ ކޮންޓްރެކްޓަރުން ފަދަ މަޖުބޫރު ވަސީލަތްތަކަށް އިންޑިއާއިން ބަރޯސާވެފައެއް ނުވެއެވެ. އެފްރިކާގެ ގިނަ ދައުލަތްތަކަކަކީ، ބޭރުގެ ދަރަނި އިތުރު ވެފައިވާ ބޭރުގެ އެހީއަށް ބޮޑުކޮށް ބަރޯސާވުމުގެ ބުރަ އުފުލާ ގައުމުތަކެވެ. ބޮޑެތި ބާރުތަކުގެ ކަސްތޮޅު އެޅުވުން ފެނިގެން ދަނީ އިރުމަތީ ކޮންގޯގެ މިނަރަލް ބެލްޓުން ފެށިގެން އެފްރިކާގެ ސާހިލްގެ ހަނގުރާމައިގެ މައިދާންތަކުންނެވެ.
މިސާލަކަށް ބަލާއިރު، މާލީގައި ހިއުމަން ރައިޓްސް ވޮޗުން ވަނީ މި އަހަރު ސިފައިންނާއި ރަޝިޔާގެ ތާއީދު އޮންނަ ވެގްނާގެ އޮޕަރޭޓިވުންނާ ގުޅިފައިވާ ލަޝްކަރުތަކުން ޝަރީއަތުން ބޭރުގައި މީހުން މަރާލުމާއި ގެއްލުމުގެ އާ ހަރަކާތްތައް އިތުރު ވެފައިވާ ކަމަށް ޑޮކިއުމެންޓް ކޮށްފައެވެ.
ޗައިނާއިން ހަރަކާތްތެރިވާ ގޮތުގެ މޮޑެލް ރަޝިޔާއާ ޚިލާފު ކަމަށް ފެނެއެވެ. ޗައިނާއިން ހަރަކާތްތެރި ވަނީ ދަރަނި ދިނުމުގައެވެ. ކެންޔާގައި ބެއިޖިން އިން ހޭދަކޮށްގެން ގަދާފައިވާ ރޭލްވޭގެ ދަރަނި ބޮޑުވެ، ނައިރޯބީން މިހާރު ދަނީ ދަރަނި ދެއްކުން ލުއިކޮށް ދިނުމަށާއި ދަރަނި ޑޮލަރުން ދެއްކުމުގެ ބަދަލުގައި ޔުއާނަށް ބަދަލު ކުރުމަށް މަޝްވަރާ ކުރަމުންނެވެ. މުޅި އެފްރިކާ ބައްރުގައި ވެސް ދަރަނީގެ ބުރަތައް ބޮޑު ވެފައި ވެއެވެ.
އައިއެމްއެފް އިން އިންޒާރު ދެނީ ޒެމްބިއާ އަށް "ދަރަނީގެ ދަތިކަމުގެ ބޮޑު ނުރައްކަލެއް" އޮތް ކަމަށެވެ. ޑިމޮކްރެޓިކް ރިޕަބްލިކް އޮފް ކޮންގޯގައި ޗައިނާގެ ކުންފުނިތަކާއެކު މައުދަންތަކަށް ހަދާފައިވާ އެއްބަސްވުންތަކުން ރިސްކުތައް ކުރިމަވަމުން ދެއެވެ.
އޮގަސްޓް މަހު ހުޅަނގު އެފްރިކާގެ އީބީއައިޑީން ވަނީ އިންފްރާސްޓްރަކްޗާ، ހަކަތަ، ދަނޑުވެރިކަމާއި ސިއްހީ މަޝްރޫއުތަކަށް ފައިސާ ހޯދުމަށް އިންޑިއާގެ އެގްޒިމް ބޭންކުން 40 މިލިއަން ޑޮލަރުގެ ލައިން އޮފް ކްރެޑިޓެއް ހޯދައިފަ އެވެ. އެފްރިކާގެ ބެންކުން ދެކޭ ގޮތުގައި މިއީ ދެކުނުގެ ބިތުގެ ގައުމުތަކުގެ މެދުގައި ގުޅުމުގެ ނަމޫނާއެއް ކަމަށެވެ.
އިންޑިއާއިން ފޯކަސް ކުރަނީ އެފްރިކާގެ އިސްކަންދޭ ކަންކަމަށެވެ. އަދި އިންޑިއާއިން ފައިނޭންސް ކުރަމުންދަނީ އެފްރިކާއިން ބޭނުންވާ ކަންކަމަށާއި އިންޑިއާގެ ހުނަރާއި މައުލޫމާތު އެފްރިކާއަށް ފޯރުކޮށްދިނުމަށެވެ. އަދި ވަކިން ޚާއްސަކޮށް އިންޑިއާއަކީ ސިއްޙީ ދާއިރާއިން އެފްރިކާގެ ގައުމުތަކުގެ ބައިވެރިއެކެވެ. ޖޫން މަހު އެފްރިކަން ޔޫނިއަން އާއި އިންޑިއާ އިން ވަނީ އަގުހެޔޮ ބޭސްތަކާއި ޑިޖިޓަލް ހެލްތު ކެއަރއާއި ޓެލެމެޑިސިންގެ ދާއިރާއިން ދެފަރާތުން ގުޅިގެން ކުރިއަށް ދިއުމަށް އައު ކަންކަމެއް މެޕްކޮށްފައެވެ،
